Bakıda Türkiyə əleyhinə filmin nümayişi baş tutmayacaq - YENİLƏNİB
Bakıda anti-Türkiyə filmi olan “Odda - İki bacı”nın nümayişi olmayacaq.
Avropa İttifaqının Azərbaycandakı nümayəndəliyinin Mətbuat Xidmətindən “Report”a verilən məlumata görə, Avropa Film Festivalı çərçivəsində “Odda - İki bacı” filminin dekabrın 5-nə planlaşdırılan nümayişi ləğv edilib.
Xatırladaq ki, daha əvvəl Bakıda fəaliyyət göstərən kinoteatrlar Almaniya və Yunanıstan istehsalı olan bu filmin nümayişindən imtina ediblər. Buna səbəb filmin məzmununun ölkəmizdə narazılıq yaratmasıdır.
***
Mövcud qanunvericiliyə əsasən ölkə ərazisində kütləvi nümayiş üçün nəzərdə tutulan yerli və xarici filmlər Mədəniyyət Nazirliyi tərəfindən Dövlət Reyestrində qeydiyyata alınaraq Yayım vəsiqəsi ilə təmin edildikdən sonra kino nümayişi müəssisələrində tamaşaçılara təqdim olunur.
Bu barədə Ölkə.Az-a Mədəniyyət Nazirliyinin Mətbuat Xidmətindən məlumat verilib.
"Odda - İki bacı" filmi ilə bağlı bildiririk ki, sözügedən filmə Nazirlik tərəfindən Yayım vəsiqəsi verilməyib və istər Nazirliyin tabeliyində fəaliyyət göstərən Nizami Kino Mərkəzində, istərsə də ölkədəki özəl kinoteatrlarda həmin filmin nümayişi nəzərdə tutulmayıb.
Filmin qeyri-kino profilli hansısa məkanda nümayişinə gəldikdə isə bildiririk ki, bu kimi məsələlərin həlli Mədəniyyət Nazirliyinin səlahiyyətlərinə daxil deyil".
Nazirlik həmçinin sözügedən filmin qeyri-kino profilli müəssisədə nümayişini məqbul hesab etmədiyini bildirib.
Qeyd edək ki, Almaniyanın Bakıdakı səfirliyinin Aİ Film Festivalı çərçivəsində Aİ-nin Azərbaycandakı nümayəndəliyi ilə birlikdə "Odda - İki Bacı" ("Sisters Apart") filminin nümayişini təşkil etməyi planlaşdırması barədə məlumatlar yayılıb.
Film İraqda kürd silahlı dəstələrinin hərbi düşərgəsində təlim keçən Rojda adlı qızdan bəhs edir.
