"Əqrəb mövsümü" serialının aktyoru məşhur səhnədən danışdı: "Yeganə səhnədir ki, uğurlu alınıb"

Son günlər sosial şəbəkə istifadəçilərinin ən çox müzakirə etdiyi mövzulardan biri də İTV-də yayımlanan “Əqrəb mövsümü” serialıdır.  Bu gün sonuncu bölümü yayımlanacağı bildirilən serial qısa zamanda tamaşaçıların rəğbətini qazanıb.

Ölkə.Az serialda Vaqif obrazını canlandıran Azərbaycan Dövlət Gənc Tamaşaçılar Teatrının aktyoru Manaf Dadaşovla həmsöhbət olub:

- Manaf bəy, sonuncu dəfə rol aldığınız “Əqrəb mövsümü” serialı Azərbaycan tamaşaçısı tərəfindən çox sevildi. Seriala olan reaksiyalara münasibətiniz necədir? Təəssüratlarınızı öyrənmək istərdik.

- Yəqin ki, o məşhur səhnədən (8-ci bölümdə Vaqifin ata evində rəqs etdiyi səhnə - red.) söhbət gedir. Serialda yeganə səhnədir ki, uğurlu alınıb. Digər səhnələrdən bir-iki yerdə özüm narazıyam. Amma ekran işi ümumilikdə uğurlu alınıb, səs salıb. Söhbət təkcə o səhnədən getmir. Tamaşaçı da gözəl qarşılayıb. Məncə, Azərbaycanda belə səmimiyyətə doğru gedən serial indiyə qədər olmayıb.

- Dediniz ki, məhz həmin səhnə uğurlu alınıb. Nə üçün belə qənaətə gəlmisiniz?

- Bəzi səhnələrim uğursuz alınıb. Qənaətim aktyor sənətinin xırdalıqları ilə bağlıdır. Onu ancaq özüm və işi bilən adamlar görə bilərlər. Sadəcə olaraq şəxsi fikirimdir, bunu tamaşaçı demir.

- Adətən insanlar filmi/serialı çox bəyənəndə onu yaşayır. Bəzən gerçəkliklə serialı qarışdırıb aktyoru təhqir edirlər. Bildiyim qədərilə, siz də sosial şəbəkələrdən istifadə edirsiniz. Canlandırdığınız məni obraza görə “niyə belə elədin” kimi  sual verənlər olurmu?

- Mən artıq 20 ildən çoxdur ki, bu sənətlə məşğulam. Azərbaycan teleməkanında başqa serial və filmlərdə mənfi rollarım olub. Həmin rollar daha mənfi obrazlar idi deyə təpkilərlə qarşılaşdığım olub. Hətta bəzən küçədə yaxınlaşıb reaksiya verənlər olurdu. “Əqrəb mövsümü” isə yeni yayımlanıb. Hələ ki, bəzi saytlarda mənfi yazanlar olsa da, özümə nə isə deyən olmayıb.

- Canlandırdığınız obrazı necə qiymətləndirirsiniz? Vaqif necə adam idi?

- Mən ümumiyyətlə, bütün rollarımın hamısını tamaşaçıdan fərqli olaraq daha müsbət qiymətləndirirəm. Çünki mən onu yaşayıram. Hər bir insan özünə görə doğru yaşayır. Heç kim demir ki, mən səhv yaşayıram, mənfiyəm. Heç kim bunu boynuna almır. Vaqif də bir insan kimi çox doğru-düzgün yaşayan insandır. Onu heç də mənfi obraz saymıram, əksinə, müsbət obrazdır. Çünki ən düzgün yolu o seçib. Vaqif düzgün yaşayan, çörəyini qazanan, gəmidə işləyən biridir. Sadəcə mənfi reaksiyalarla qarşılaşır. Həyat yoldaşının xəyanətinə görə, arvadını öldürür. Çünki o təpkiylə üzləşib, nəticədə pis işlər görüb. O pis insan olsaydı, elə əvvəldən pis işləri görərək pul qazanardı.

- Yəni demək istəyirsiniz ki, Vaqifi o həddə çatdıran cəmiyyət qınağı, “ailəm, qonşular nə deyər” fikridir?

- Əlbəttə ki, Vaqifləri bu həddə çatdıran cəmiyyət qınağıdır. Onu bu səviyyəyə gətirib çıxaran həyat yoldaşının hərəkətləri, cəmiyyətin ona qarşı şantajıdır. Məhz bunun nəticəsində Vaqif gedir kərpici kişinin başına vurur, maşın qaçırır və s.

- Manafla Vaqif arasında oxşar cəhətlər varmı?

- Hardasa axtarsan tapmaq olar. Oxşarlıq olub-olmamasını yalnız həmin anda qərarlaşdıra bilərəm. Amma ümumilikdə Manafla Vaqifin oxşar cəhətləri yoxdur.

- Müsahibə üçün çox sağ olun.

- Siz də sağ olun, diqqətinizə görə minnətdaram.

Qeyd edək ki, Ceyhun Hidayətlinin "Əqrəb" romanına əsaslanan serialın rejissoru Emil Quliyev, ssenaristi Azər Aydəmirdir.

Billurə Yunus