\"Qalmaqallarla sənəti ucuzlaşdırmaq ağlımdan keçməyib\" - Gənc tarzən

Ölkə.Az gənc tarzən, müxtəlif yerli və beynəlxalq müsabiqə və festivalların qalibi və laureatı olan Rəhman Abdullayev ilə söhbətləşib.

Həmin müsahibəni təqdim edirik:

- Rəhman Abdullayev kimdir?
- 27 oktyabr 1998-ci ildə Bakıda anadan olmuşam. İlk musiqi təhsilimi 2008-ci ildə 28 nömrəli musiqi məktəbində almışam. 2012-ci ildə Konservatoriyanın tərkibindəki İncəsənət Gimnaziyasında davam etmişəm. 2015-ci ildə Milli Konservatoriyanın İfaçılıq fakültəsinin Tar ixtisasına daxil olmuşam və 2019-cu ildə bakalavr təhsilimi fərqlənmə ilə bitirmişəm. 2019-2021-ci illərdə isə yenə orada magistr pilləsi üzrə təhsil almışam.

2010-2015-ci illərdə Filarmoniyanın Uşaq orkestrinin konsertmesteri olmuşam. 

Hazırda vaxtikən təhsil aldığım İncəsənət Gimnaziyasında müəllim işləyirəm.

- Gənc olmanıza baxmayaraq, illərinizi sənətinizin inkişafı üçün xərcləmisiniz. Bu illər ərzində hansı nailiyyətlər əldə etmisiniz?  
- Müxtəlif yerli və beynəlxalq müsabiqə və festivallarda təltif olunmuşam. Yaxın keçmişə nəzər salsaq - 2019-cu ildə İtaliyanların Azərbaycanda keçirdiyi "TasteArt" beynəlxalq müsabiqəsində I yer tutmuşam. Bundan başqa 3 il öncə Rusiya Federasiyasında keçirilən beynəlxalq müsabiqədə 2-ci yerə layiq görülmüşəm.
 

- Bu qədər aktiv fəaliyyətdəsiniz, vaxt tapıb albom buraxa bilmisinizmi, yoxsa...?
- Əlbəttə. Albom buraxmaq da elə fəaliyyətimiz bir hissəsidir. Ötən il "National Treasure" adlı musiqi albomum işıq üzü görüb. Yeri gəlmişkən, qeyd edim ki, 100-dən çox trekim musiqi platformalarında da yayımlanıb.

- Bu sahədə gündəmdə olmaq, məşhurlaşma üçün sənətçilərimiz qalmaqalsız ötüşmür. Bəs siz qalmaqalla gündəmə gəlmək kimi fikriniz olubmu və ya bunu sizə təklif ediblərmi?
- Əlbəttə, qalmaqal dünyanın hər yerində həmçinin Azərbaycanda məhşurluğun gündəmdə qalmağın ən başlıca yollarından biridir. Lakin bu tar, muğam sənətini çox qədim və ali bir incəsənət növü sayıram. Açığı, belə qalmaqallarla sənəti ucuzlaşdırmaq ağlımdan keçməyib.