"Çobanlara başa saldım, veclərinə də almadılar" - Tarixi binaya görə narazılıq - FOTO
Bəşir Səfəroğlu və Dilarə Əliyeva küçələrinin arasında yerləşən “Xalq evi”nin binasının fasadı üzərində aparılan işlər narazılığa səbəb olub.
Ölkə.Az xəbər verir ki, bu barədə memarlıq üzrə elmlər doktoru, professor Elçin Əliyev paylaşım edib.
“Dövlət tərəfindən qorunan memarlıq abidəsi 1900-cü ildə tikilib və 122 ildir ki, bütöv və toxunulmazdır. Ancaq bu yaxınlarda bina İcbari Tibbi Sığorta üzrə Dövlət Agentliyinə verilib və binanın ələ salınması başlayıb.
Bu səhər təsadüfən binanın yanından keçəndə iki işçinin laqunda ilə artıq fasadı necə “təmizləməyə” başladığını gördüm. Yaxınlaşıb çobanlara başa salmağa çalışdım ki, bunu etmək olmaz. Qulaq asıb heç veclərinə də almadılar.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə zəng edirəm, cavab vermirlər.
İnsanlar, kömək edin, canavarları dayandırın”,- deyə o qeyd edib.
Ölkə.Az Məsələ ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinə sorğu ünvanlayıb.
Billurə Yunus
