Tarixi binada narazılıq yaradan işlərlə bağlı RƏSMİ AÇIQLAMA 

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tarixi binanın fasadı üzərində aparılan işlərlə bağlı tənqidlərə münasibət bildirib.

Qurumdan Ölkə.Az-ın sorğusuna cavab olaraq bildirilib ki, Bakı şəhəri, Nəsimi rayonu, Süleyman Ələsgərov küçəsi 10A ünvanında yerləşən binada əsaslı təmir və tikinti işlərinin aparılması üçün İcbari Tibbi Sığorta üzrə Dövlət Agentliyi tərəfindən Dövlət Xidmətinə müraciət edilib:

“Bununla bağlı işçi qaydada görüş keçirilib, müzakirələr və fikir mübadiləsi aparılıb, qanunvericiliyin tələbləri diqqətə çatdırılıb.

Həmin tarixi abidədə mövcud qanunvericiliyə uyğun, mütəxəssislərin nəzarəti altında təmir-bərpa işlərinin aparılması məqsədəuyğun hesab edilib.

Bir neçə gün öncə binanın üzlük daşlarının xüsusi texniki vasitəsilə yonulması faktı aşkar edilərək, qarşısı alınıb. 

Bununla bağlı iş icraçılarına tarixi abidənin təmir-bərpa işlərinin təsdiq edilmiş layihə əsasında aparmalı olduqları diqqətə çatdırılıb”,- deyə məlumatda qeyd edilib.

Qeyd edək ki, bundan əvvəl memarlıq üzrə elmlər doktoru, professor Elçin Əliyev “Xalq evi” binasının üzərində aparılan işlərlə bağlı qurumu kəskin tənqid etmişdi.

Billurə Yunus