Şəki möhtəşəm festivala hazırlaşır

Kanal S (Region TV) xəbər verir ki, Şəkidə ilk dəfə keçiriləcək "Nağara 2015" Ritm Festivalına hazırlıq görülür. Hazırlıq çərçivəsində artıq işlərin müəyyən qismi görülüb.

Şəki 22 avqust tarixində növbəti beynəlxalq festivala ev sahibliyi edəcək. 5 gün davam edəcək festivalda tamaşaçılar bir-birindən maraqlı və ritmik ifaların şahidi olacaqlar. Festival avqustun 22-də yürüşlə start götürəcək.

Yürüşün ardından möhtəşəm açılış konserti olacaq. Burada festival ərzində çıxış edəcək qruplar öz repertuarlarından qısa ifalar səsləndirəcəklər. Qafqazın ən böyük nağarasının da Şəkiyə gətiriləcəyi gözlənilir.

Beynəlxalq tədbirdə Azərbaycan da daxil olmaqla 4 ölkənin qrupları çıxış edəcək. Festivala olan marağı nəzərə alaraq, burada yerli sakinlər və qonaqların da daxil olduğu geniş tamaşaçı kütləsinin iştirakını elə indidən söyləmək olar. Avqustun 26-da festivalın bağlanış mərasimində də tamaşaçıları sürprizlər gözləyir. Bu tədbirin yüksək səviyyədə keçirilməsi üçün də hazırlıqlar davam etdirilr.

Qeyd edək ki, 5 gün davam edəcək festivalın çəkiliş hüququ Kanal S-ə məxsusdur.

Ölkə.Az