İsrafilovun jurnalistə qarşı iddiası əsassız sayıldı

Bu gün Nəsimi Rayon Məhkəməsində Akademik Milli Dram Teatrının direktoru İsrafil İsrafilovun jurnalist Ənvər Börüsoya qarşı qaldırdığı iddia üzrə növbəti proses keçirilib

Bu barədə Ölkə.Az-a Ənvər Börüsoy məlumat verib.

"Nəsimi rayon məhkəməsinin hakimi Rəşid Səmədovun sədrliyi ilə keçirilən ikinci proses idi. Proses saat 3-ə təyin olunmuşdu. Bir neçə dəfə mən və vəkillərim əlaqə saxladılar. Qarşı tərəf bildirdi ki, indi məhkəməyə çatırıq. Daha bir neçə dəfə də bu formada vaxtı uzatdılar. İlk prosesdə də belə olmuşdu. Onda da bir neçə dəfə gəlirik deyib gəlib çıxa bilməmişdilər. Qarşı tərəf gəlməsə də, hakim Rəşid Səmədov məhkəmə heyətinin qərarını açıqladı və işə xitam verildiyini bildirdi. Bəzən məhkəmələr və hakimlər barədə xoşagəlməz fikirlər irəli sürülür. Ancaq Azərbaycanda Rəşid Səmədov kimi vicdanlı və işinə peşəkarlıqla yanaşan hakimlər də var".

Qeyd edək ki, İsrafil İsrafilov Ənvər Börüsoyu Cinayət Məcəlləsinin işgüzar nüfuza xələl gətirmə, şərəf və ləyaqəti alçaltma, böhtan atma maddələri ilə məhkəməyə vermişdi. Buna səbəb jurnalistin "Teatrın estetikasını və poetikasını bilməyənlər", "Dövlət Teatrı “şəxsi mülkiyyət”ə çevrilib", ""Azdrama"nın azmış dramı" adlı məqalələrində Milli Dram Teatrının direktoru, sənətşünaslıq elmləri doktoru İsrafil İsrafilovu, aparıcı aktyorları, Mədəniyyət və Turizm Nazirliyinin rəsmilərini tənqid etməsi idi. Teatr rəhbərliyi hesab edirdi ki, sözügedən yazılar həqiqəti əks etdirmir və böhtan xarakterlidir.

İntiqam VALEHOĞLU
Ölkə.Az