Tarixi qalanın damına niyə dəmir şifer vurulub? - RƏSMİ

Lənkəranda yerləşən tarixi abidə olan "Dairəvi Qala"nın (Zindan Qala) dam örtüyünə dəmir şifer vurulması sosial şəbəkələrdə müzakirələrə səbəb olub.

Ölkə.Az xəbər verir ki, bir çox sosial şəbəkə istifadəçisi tarixi abidəyə laqeyd yanaşıldığını deyərək aidiyyəti qurumları tənqid edib.

Mövzu ilə bağlı Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən Ölkə.Az-ın sorğusuna cavab olaraq dam örtüyünün müvəqqəti olduğu bildirilib:

“Bir neçə il öncə Lənkəran şəhərində yerləşən "Dairəvi qala"nın (Zindan qala) dam örtüyünün çökməsi nəticəsində abidə qəzalı vəziyyətə düşüb.
Hazırda daxili imkanlar hesabına qalanın ətrafında və içərisində təmizlik, abadlıq işləri görülür, qalanın mühafizəsi istiqamətində zəruri tədbirlər həyata keçirilir.
Həmçinin aparılacaq bərpa işlərinin başlanılmasına qədər tarixi tikilinin təbii təsirlərdən, yağıntılardan qorunması məqsədilə qalanın damı müvəqqəti örtüklə əvəz olunub”, - deyə cavabda qeyd olunub.

Billurə Yunus