Azərpaşa Nemətov: \"Çalışacam ki, \"Azdrama\"ya Azərpaşa teatrı desinlər\"
Dünən Akademik Milli Dram Teatrının yeni təyin olunmuş bədii rəhbəri və baş rejissoru Azərpaşa Nemətov mətbuat konfransı keçirib.
Ölkə.Az xəbər verir ki, Nemətov teatrın tarixi barədə danışıb və görüləcək işlər haqda məlumat verib:
"Bu teatr 143 ildə keşməkeşli yol keçib. Zirvəyə də qalxıb, tənəzzül də edib, 1937-ci ilin repressiyalarını da görüb. Ulu öndər Heydər Əliyev bu teatrın bütün tamaşalarına gəlib baxıb. Bu özü də böyük bir nailiyyətdir. Ölkənin hazırkı rəhbərliyi də bu teatra çox böyük qiymət qoyur. Ona görə Teatr haqqında, Mədəniyyət haqqında qanun qəbul olunub, sərəncamlar verilir, teatrlar təmir olunur, müasir avadanlıqlarla təmin olunur, qərb texnologiyaları bura gətirilir. Sentyabrın 14-də Gəncə şəhərində bütün Azərbaycan üzrə teatr sezonunun açılışı olacaq. Bütün Azərbaycan teatrları orada iştirak edəcək. Sentyabrın 18-də isə "Azdrama" "Qarabağnamə" ilə mövsümü açacaq. Bu gün böyük təntənə ilə qeyd olunacaq. Mən tamaşaçıların qarşısında çıxış edəcəyəm ondan sonra tamaşa başlayacaq. Çox təəssüf ki, işə başladığım ərəfədə tanınmış aktyorumuz İlham Əsgərov dünyasını dəyişdi. Ou çox sadiq və yüksək mədəniyyətli insan kimi tanımışam və tanıyıram, bütün rollarını görmüşəm. Ümumiyyətlə, bu gün çalışan bəzi rejissorlar və aktyorlar görmədiyi tamaşaları da mən görmüşəm. Bu da yaşımla bağlıdır. Amma hər halda qoca kişi deyiləm ki, əsa ilə gəzim. Çox gümraham. Ələsgər Ələkbərovu, Sidqi Ruhullanı görmüşəm, Adil İsgəndərovla təmasda olmuşam".
Azərpaşa Nemətov görüləcək işlərlə bağlı planlarını da açıqlayıb:
"Biz bu teatrın gələcəyi ilə bağlı çoxlu iş görməliyik. Çox istəyirəm ki, gözəl tamaşalarımız olsun. Bundan ötrü müəyyən işlər görülməlidir, yaradıcılıqda nizam-intizam bərpa olunmalıdır. Ümumiyyətlə, teatrda intizam yüksək olanda ilər də yaxşı gedir. Dünyanın heç yerində intizamsız teatr inkişaf edə bilməz. Vaxtında məşqə gəlmək lazımdır. Aktyor heyətinin ifaçılıq prinsiplərini, potensialını qaldırmağa çalışacağıq. Hər halda bu mənim arzumdur. Əvvəllər tək öz tamaşama cavab verirdimsə, bu gün bütün tamaşalara cavab verməliyəm. Çünki afişalarda teatrın bədii rəhbərinin adı gedəcək".
Bədii rəhbər bildirib ki, teatrda gənc istedadlar üçün studiya da fəaliyyət göstərəcək:
"Yeni istedadlar olacaqsa, onları bu teatra cəlb edəcəyik. Zəif tamaşaları repertuardan çıxarıb, daha maraqlı əsərlərə quruluş verəcəyik. Teatrda sağlam, mənəvi psixoloji iqlimin bərpası fəal axtarış və yaradıcılıq mühitinin yaradılması prosesi gedəndən sonra gənclər üçün studiya yaradacağıq. İnanıram ki, məni dəstəkləyəcəklər. Ola bilər studiyada elə tamaşalar hazırlansın ki, biz onu böyük səhnəyə də çıxaraq. İstərdim ki, o studiyaya mərhum rejissorumuz Tofiq Kazımovun adını verək. Onun da adı eksperimentlərlə bağlı olsun. Eyni zamanda orada hazırlanan tamaşalara da baxışlar olacaq. Ümumiyyətlə, planlar çoxdur. Amma hansı qabağa düşəcək, bunu zaman gösətərəcək".
Azərpaşa Nemətov bildirib ki, təyin olunduğu gündən əllidən artıq aktyorla təkbətək söhbəti olub:
"İstədim ki, dərdlərini mənə deyə bilsinlər. Digərləri ilə isə qarşıdakı həftə görüşəcəyəm. Düzdür, onlar mənə sevgi və məhəbbətləri izhar edirlər. Amma mən aktyorları həmişə sevmişəm və sevəcəyəm. Hesab edirəm ki, teatrda aktyorun rolu az deyil. 21-ci əsr rejissorluqla bağlıdır. Biz çalışacağq ki maraqlı rejissorları cəlb edək. Hamı deyirdi ki, məndən güclüsü yoxdur. Vaxt verildi və hər şey saf-çürük edildi. Kimin nə bacardığını da hamı gördü. Yenə imkan veriləcək, amma bu qədər yox. Teatr həmişə rəhbəri ilə tanınıb. Çalışacam ki, "Azdrama"ya Azərpaşa teatrı desinlər. Hətta mən olmayanda da. Hər halda mən buna can atıram. Əgər imkanlar uyğunlaşsa, yəqin ki nəyəsə layiq olarıq".
Sonda Azərpaşa Nemətov jurnalistlərin suallarını cavablandırıb.
Fotolar: Nurlan G.M
