59 yaşlı cavan oğlan
İntiqam VALEHOĞLU
Mən uşaq olanda AZTV-dən tez-tez onun baş rollarından birini-Toğrulu oynadığı "Pəncərədə işıq" teletamaşasını göstərirdilər. Uca boyu, gənc yaşında hər aktyora nəsib olmayan zəhmi, xarizması... Ancaq hər dəfə də ürəyimdən bir sual keçirdi: bir cavan oğlan bu qədər sərt ola bilərmi? Axı o niyə belə qısqancdır? Hətta bəzən seyr etdiklərimin real olduqlarına inanırdım... İnandıra bilirdi... Bəzən də Leylaya (Zemfira Nərimanova) o qədər yazığım gəlirdi ki. Buna görə Toğrula çox hirsliydim...
Ancaq etiraf edim ki, o vaxt adını bilmirdim. İllər ötdü, onu oynadığı digər tamaşalardan, televiziya proqramlarından tanımağa başladım, adını da öyrəndim. Bir az da "hirsim soyumuşdu".
Mənə elə gəlirdi ki, illər öncə teletamaşada "xoşuma gəlməyən" ADAM bir qədər mülayimləşib.
Yenə illər ötdü...
Düz on il öncə 2005-ci ildə ilk dəfə canlı gördüm, kənardan davranışlarını müşahidə elədim... Xeyli yanılmışdım. O vaxt mənim də jurnalistikada ilk addımlarım idi. Bir neçə dəfə telefon vasitəsilə açıqlamalarımız oldu.
...Ancaq son dönəmlərdə çalışdığı, illərini verdiyi sənət məbədinin-Akademik Milli Dram Teatrının taleyi uğrunda aparılan mübarizənin önündə olması ona olan münasibətimi kökündən dəyişdi. Əslində bu, mənim ona olan münasibətim də deyildi. Sadəcə, rolunu oynayıb tamaşaçını "qıcıqlandıra" bilmişdi. Şübhəsiz ki, bu da aktyor kimi qəhrəmanımın xoşbəxtliyidir.
Bəlkə də çoxları, hətta deyərdim ki, yüz aktyordan 95-i eyni titullara və üstünlüklərə sahib olsaydı, heç zaman onun indi etdiklərini etməzdi və etmir də. Əməkdar artist olan (əksəriyyəti) xalq artisti olmaq üçün susur, xalq artisti "Şöhrət" ordeni gözləyir ...və susur..."Şöhrət" ordeni alan "Şərəf" ordeni umur...
O isə çoxlarının sahib ola bilmədiklərini qazanıb, xalq artistidir, yanılmıramsa, doğum günündə Prezident tərəfindən mənzil hədiyyə edilmiş yeganə aktyordur, çox aktyorların arzu etdiyi bir mərasimin-ölkə başçısının inaqurasiya mərasiminin 3 dəfə aparıcısı olub.
Təbii ki, bütün bunlar hər bir azərbaycanlı aktyoru arzusu, hətta daha dəqiq desək əlçatmaz xəyalıdır. Dünyanın tanınmış siyasətçilərinin, dövlət başçılarının qatıldığı mərasimi idarə etmək doğrudan da xəyaldır...
O, yenə də rolları ilə tamaşaçını əsəbləşdirməyi, qıcıqlandırmağı, sevdirməyi, sevməyi bacarır. Son dəfə baxdığım “21:15 qatarı” tamaşasında isə formada olduğunu bir daha göstərdi. Axı hələ nə yaşı var ki... Bu gün əvvəldə dediyim zəhmli cavan oğlanın-Nurəddin Mehdixanlının cəmi 59 yaşı tamam olur. Təbriklər, SƏNƏTKAR!
Ölkə.az
