Əməkdar artistin əsərini bəyənmədilər

Gəncə Dövlət Dram Teatrının aktyoru, əməkdar artist Novruz Cəfərovla rəhbərlik arasında münasibətlər gözlənilmədən gərginləşib.

Ölkə.Az xəbər verir ki, buna səbəb hər zaman rəhbərliyi müdafiə etməsi ilə fərqlənən Cəfərovun yazdığı əsərin teatrda tamaşaya qoyulmamasıdır.

Qeyd olunur ki, əməkdar artistin özünü dramaturq kimi sınaması direktor Əli Qasımov tərəfindən qəbul edilməyib və əsərin tamaşaya qoyulmasından imtina edilib. Bu isə necə deyərlər, onun əməlli-başlı xətrinə dəyib. Hətta aktyor sosial şəbəkədə bu barədə status yazaraq "dərdini" virtual dostları ilə paylaşıb. Ancaq bir neçə saat sonra status "müəmmalı" şəkildə yoxa çıxıb.

Əməkdaşımız məsələ ilə bağlı Novruz Cəfərovun özü ilə əlaqə saxlayıb. N.Cəfərov əməkdaşımıza analoqu olmayan cavab verib. Belə ki, əməkdar artist əsərinin tamaşaya qoyulacağını desə də, əsərin adını açıqlamaq istəməyib və dəstəyi asıb: "Yox e, yox. Adını neynirsiniz? Adı lazım deyil..."

İntiqam VALEHOĞLU

Ölkə.Az