Cavanşir Məmmədovun 100 illik yubileyinə həsr olunmuş tədbir keçirilib

Oktyabrın 22-də Nizami Kino Mərkəzində Mədəniyyət və Turizm Nazirliyi, Dövlər Film Fondu, Azərbaycan Respublikası Kinematoqrafçılar İttifaqı və Nizami Kino Mərkəzinin birgə təşkilatçılığı ilə görkəmli kinooperator və rejissor, Xalq Artisti Cavanşir Məmmədovun 100 illik yubileyinə həsr olunmuş tədbir keçirilib.

Tədbirdə iştirak edən Azərbaycan Respublikası Kinematoqrafçılar İttifaqının icraçı katibi Cəmil Quliyev xalq artistinin sənətə olan sevgisindən və professional sənətkarlıq qabiliyyətindən, əməkdar incəsənət xadimi Aydın Kazımzadə Cavanşir Məmmədov haqqında olan xatirələridən və onun 60 il kinematoqrafiya sahəsinə xidmət etdiyindən söz açıblar.

Sonra iştirakçılar, Cavanşir Məmmədovun çəkdiyi “Xəzər neftçiləri haqqında dastan” sənədli filmini izləyiblər.

Mərasimində mədəniyyət və turizm nazirinin əməkdaşları, sənət adamları və digər qonaqlar iştirak edib.

Cavanşir Məmmədovun qızı Almaz Məmmədova tədbirin təşkilində əməyi olan hər kəsə minnətdarlığını bildirib.

İştirakçılar həmçinin, Nizami Kino Mərkəzinin foyesində Cavanşir Məmmədovun həyat və fəaliyyətinin müxtəlif dövrlərini əks etdirən fotosərgi ilə tanış olublar.

Ölkə.Az