Zəka Babazadə: "Mahnılarımın reklama, dinlənməyə ehtiyacı var"

Ramiz Rövşən, Aqşin Yenisey, Salam Sarvan kimi şairlərin şeirlərinə mahnılar bəstələmiş gənc bəstəkar Zəka Babazadə Ölkə.az-ın suallarını cavablandırıb.

- Zəka, bəstəkarlıq sizin hobbinizdir, yoxsa sırf irsidir?

- Ailədən gələn bir şeydir. Atamın gözəl səsi var, anam da piano məktəbini bitirib. Onlardan fərqli olaraq məndə yaradıcılıq daha güclüdür. Uşaqlıqda pianino məktəbinə getmişəm. İlk dəfə 10-cu sinifdə oxuyarkən “Dəli qız” adlı pozitiv musiqi bəstələmişdim. Dostlarıma göndərdim və bəyənildi. Artıq hiss elədim ki, məndə nəsə alınır. Kiçik işlərdən sonra 2012-ci ildə hərbi xidmətdə olarkən, “Səssizcə” adlı musiqi bəstələdim. Heç bir alət və şərait yox idi deyə, öz-özümə musiqini zümzümə edirdim. Musiqi yadımda qalmışdı. Gəldikdən sonra gitarada ifa etdim və həmin mahnım da bəyənildi.

- Bildiyimə görə musiqilərinizi not üzərinə köçürmürsünüz...

- Xeyr notlardan istifadə etmirəm, ali musiqi təhsilim yoxdur. Ələkbər Tağıyev də “Bakı gecələri”ni bu şəkildə yazmışdı.

- Toylara gedirsiniz?

- Bəli, toylara sintezator ifaçısı kimi gedirəm.

- İlk dəfə kimin sözlərinə musiqi bəstələmisiniz?

- Aqşin Yeniseyin “Sənə məktub yazıram” şeirinə musiqi bəstələmişəm.

- Sonradan təkliflər gəldi?

- Bəli. Aqşin Yenisey tanınırdı deyə bu səbəbdən mahnı dinlənilirdi. Mahnıya qulaq asan şairlərdən bəziləri mənə yazırdılar ki, bizim də şeirlərimizə mahnı bəstələ. Düşünürlər ki, bu çox sadə bir şeydir . Amma deyə bilərəm ki, musiqi bəstələmək kartof soymağa bənzəmir (gülür).

- Bəstələrinizi satırsınız?

- Xeyr. Pula görə musiqi yazsam, mahnılar süni çıxar. Bu, mənim sevdiyim işdir. Hərdənbir şeir cızmaqaralarım da olur.

- O zaman bu sual yerinə düşər. Söz, yoxsa musiqi?

- Əlbəttə, musiqi. Musiqi mənə daha doğmadır.

- Elə mahnılarınız var ki, sözlərlə musiqi təzad təşkil edir. Məsələn, qəmgin, lirik bir şeirə ritmik, pozitiv bəstələri nəzərdə tuturam.

- Yox, əslində diqqətlə fikir versəniz, musiqidə minor ladları var. Minor elə bir şeydir ki, istər-istəməz mahnıya qəmginlik verir. Doğrudur, son mahnımın əvvəlində ağızla ifa etdiyimiz musiqi şən abu-hava yaradır. Ancaq həmin hissə musiqi aləti ilə çalınsaydı, musiqi daha həzinləşəcəkdi.

- Müğənnilərlə işbirliyiniz olub?

- Hələ ki yox.

- Musiqilərinizi kimsə plagiat adlandırıbmı?

- Elə bir şey eşitməmişəm. Musiqilərim hansısa mahnıya bənzəyə bilər, amma sırf mahnını götürüb özümünküləşdirməmişəm. Oxşarlıqlar isə ladlardan ola bilər. Musiqi girişləri bənzəyə bilər. Bu o demək deyil ki, musiqilər eynidir. Belə şeylərdən qorxmuram. O zaman qorxaram ki, kiminsə mahnısını oğurlayaram və bunun üstünün açılmasından ehtiyat edərəm.

- Videolarınızın izlənmə sayı bir qədər azdır....

- "Youtube"da mahnılarımı ilk dəfə yerləşdirərkən kanalımda abunə sayı iki idi. Heç yerdə reklam etməmişəm, linklər göndərməmişəm ki mahnılarımı dinləyin. Ancaq şeirlərinə musiqi bəstələdiyim şairlərin oxucuları məni dinləməyə başladı və yavaş-yavaş izlənmə sayı artdı. Hələki izlənmədən razıyam.

- Bildiyiniz kimi ədəbiyyat və sənət nümayəndələri "Facebook" sosial şəbəkəsinin qüdrətindən yararlanıb özlərini reklam edirlər. Siz niyə bu imkandan yararlanmırsınız?

- Bilirəm ki mahnılarımın reklama, dinlənməyə ehtiyacı var. Ancaq özünü reklam etmək mənim təbiətimdə yoxdur. Göndərilən dostluqları qəbul edirəm.

- Sərbəst şeirə mahnı bəstələmək sizin üçün çətindirmi?

- Əsəd Qaraqaplanın "Sonuncu sevgi" şeirinə musiqi bəstələyərkən çətinlik çəkdim. Şeiri çox bəyəndim və qərara gəldim ki, bunu mahnıya çevirməliyəm. Ancaq bir neçə ay sonra bitirə bildim.

- Dünya və Azərbaycan bəstəkarlarından kimləri bəyənirsiniz?

- Köhnə Azərbaycan bəstəkarlarının əksəriyyətini bəyənirəm. Emin Sabitoğlu, Cahangir Cahangirov, Ələkbər Tağıyevi misal göstərmək olar. Dünya bəstəkarlarından isə daha çox klassik bəstəkarlara üstünlük verirəm. Özüm pianino təhsili aldığım üçün daha çox bunları dinləyirəm. Pianoda klassik üslubda bəstələrim var.

- Gələcək planlarınız nədən ibarətdir?

- Musiqi bəstələməyə davam edəcəyəm. Çox şad olaram ki, sənəti olan məşhur sənətçilərimizdən biri mahnımı ifa etsin. Mahnılarımı başqasının ifasında dinləmək xoş olardı. Gələcəkdə qrup yaratmaq planım var.

- Son olaraq nə demək istərdiniz?

- Uzun ömür can sağlığı, bağışla bu uşaqlığı (gülür). Çox sağ olun istedadlı gənclərə dəyər verdiyinizə görə. Bütün Ölkə.Az kollektivinə öz təşəkkürümü bildirirəm.