Bəhram Osmanov \"Son reportaj\"ını təhvil verdi

Mingəçevir Dövlət Dram Teatrında əməkdar incəsənət xadimi Bəhram Osmanovun quruluş verdiyi, "Son reportaj" tamaşasının premyerası keçirilib.

Ölkə.az-ın məlumatına görə, premyeradan sonra pyesin müəllifi İlqar Fəhminin təbrik məktubu oxunub, rejissor Bəhram Osmanov, əməkdar artist Ella Yaqubova çıxış ediblər. Bəhram Osmanov tamaşa barədə fikirlərini söyləyib:

"Burada əsas süjet xətti yaradıcı insanların sənətdə üzləşdiyi rəqabət üzərində qurulub. Ta qədimdən incəsənət adamları arasında rəqabət olub. Teatr qüvvətli sənət olduğu üçün bu rəqabət ön planda görünüb. Kimlərsə irəli çıxanda o biriləri onun əleyhinə min cür iftiralar yayaraq cəmiyyətdə hörmətdən salmağa çalışıblar. Kimlərsə öz imkanlarından istifadə edərək sənətdə birinci olublar, nəticədə isə itirən həqiqi sənət, qazanan isə diletantlar olub. “Son reportaj” pyesi məhz belə amillərə toxunur, hətta bəzən təkcə mənəvi yox, cismani ölümə də səbəb ola bilən yaxşı və pis sənətin doğurduğu faciələrə cavab tapmağa çalışır. Sevindirici hal budur ki, İlqar Fəhminin bu pyesi ilk dəfə olaraq Mingəçevir Dövlət Dram Teatrında hazırlanmış və bu teatrın yaradıcılarından sayılan Respublikanın əməkdar artisti Akif Mirabov və Şıxı Yaqubovun bir sənət benefisinə çevrilmişdir".

Qeyd edək ki, təcrübəli sənətkarlarla yanaşı Asim Əmirov, Firuz Hacıyev kimi gənc aktyorlar da rol alıblar. "Son reportaj"ın rəssami Yusif İmamverdiyev, musiqi tərtibatçısı Elnur Rəsulovdur.

İntiqam VALEHOĞLU
Ölkə.az