"Bacısı dedi ki, nəslimizdə hamının başdaşı balacadır, Nuriyyənin başdaşı böyük ola bilməz"

Xalq artisti Nuriyyə Əhmədovanın vəfatı təkcə Azərbaycan mədəniyyəti üçün itki olmadı.

Baş verənlər göstərdi ki, aktrisa ilə ailə üzvləri, daha dəqiq desək bacı-qardaşlarının münasibəti sağlığında istənilən səviyyədə olmayıb. Hər halda bu mənim şəxsi fikrim yox, xalq artistinin ölümündən sonra yaranmış tragikomik durumdan gəldiyim qənaətdir. Yadınızdadırsa, Nuriyyə xanımın vəfatından bir neçə gün sonra xəbər yayıldı ki, aktrisanın başdaşını düzəltdirmək istəyən bir nəfər var. Bir müddət sonra isə başdaşının həmin şəxs tərəfindən deyil, başqa şəxslər tərəfindən düzəldildiyi xəbərləri yayıldı. Ölkə.az xalq artistinin ölümündən sonra onun və oğlunun başdaşının xərclərini üzərinə götürmüş həmin şəxsin-həkim Məhəmməd Məhərrəmovun müsahibəsini təqdim edir.

- Məhəmməd doktor, Nuriyyə Əhmədovanı sağlığında tanıyırdınızmı?

- Nuriyyə xanımı sağlığında şəxsən tanımamışam. O rəhmətə gedəndən sonra əməkdar artist Nahidə Orucova ilə əlaqə saxladım. Sual oluna bilər ki, əlaqə saxlamaqda məqsədim nə idi? Bir yazı oxumuşdum ki, Nuriyyə Əhmədova nəvəsini hamıya tapşırıb. Mən də Nahidə xanımla əlaqə saxladım ki, Nuriyyə xanımın nəvəsi Faiqlə görüşmək, onu işə düzəltmək istəyirəm. Yəni əli çörəyə, pula çatsın, tək-tənha qalmasın. Nahidə xanım mənə Nuriyyə xanımın bacısı Sevilin nömrəsini verdi. Sevil xanımla danışdım və o məni bacısının üç mərasiminə dəvət elədi. Üç mərasimində Nahidə Orucovayla, Sevil xanımla, həmçinin Faiqlə görüşdüm. Faiqə onunla görüşməyimin səbəblərini deyəndə bildirdi ki, hələ ki iş haqqında düşünmür. Mən də çıxıb yuxarıda bir neçə dəqiqə oturdum. Məclisdən çıxanda aktyor Elşad Yusubov məni yola saldı. Çıxanda dedim ki, Elşad, bunların deyəsən imkanı yoxdur, Nuriyyə xanımın başdaşını mən qoyduracağam. Razılaşdıq ki, vaxt təyin edib görüşərik. Məsələdən dörd-beş gün sonra Elşadla görüşüb qəbir üstünə getdik. Nə Nuriyyə xanımın, nə də oğlunun başdaşı qoyulmamışdı. Qara mərmərdən böyük başdaşı və oğlunun başdaşını sifariş etdik. Oğlunun başdaşı üçün ustaya 200 manat pul verdim.

- Bu, beh idi?

- Xeyr, oğlunun başdaşı ağ, sadəcə, daşdan olacaqdı, həm də xalq artistinin oğlu olduğu üçün 200 manata razılaşdılar. Dedim ki, qara mərmər daşın pulunu nə vaxt verək? Usta bildirdi ki, hazır olanda deyəcəyəm. İki-üç gündən sonra cümə axşamı idi. Nahidə Orucova mənə zəng vurdu və dedi ki, Nuriyyə xanımın bacısı Maya Həsənovagilə gələ bilərsən? Gedib iki cüməlik bazarlıq elədim.

- O bazarlığa nə qədər pul xərcləmişdiniz?

- Yüz manat. Yüz manat da Nahidə xanımdan göndərmişdim ki, birdən nəsə lazım olar. Getdim, Maya xanım başladı narazılıq eləməyə ki, Elşad kimdir onunla başdaşı düzəltməyə getmisən? Dedi ki, Nuriyyənin bütün qohumlarının başdaşı balacadır, sən ona niyə böyük başdaşı qoyurursan, nə olsun xalq artistidir? Xalq artistidirsə, dövlət başdaşı qoydurardı. Nəysə, axırda dedi ki, "ekran daş" qoydur, kifayətdir.

- "Ekran daş" neçəyədir ki?

- Böyük başdaşını 1900 manata danışmışdıq, balacanı 1500-ə danışdıq. Mən öz maşınıma Maya xanım da öz maşınlarına əyləşdik, getdik qəbir üstünə. Ustalara yenidən kiçik başdaşı sifariş verdim. Onlar da dedilər ki, hazır olanda deyəcəyik, pulu gətirib verərsən. Mən də dedim ki, oğlunun başdaşının pulu verilib, hazır olan kimi qoyun. Bir müddət sonra Nahidə xanımın əməliyyatı zamanı Maya xanım mənə zəng vurub, cavab verməmişəm. O da götürüb Nahidə xanımı yığıb, aktyorlardan biri cavab verib ki, o, əməliyyatdadır.

- Nahidə xanımı siz əməliyyat edirdiniz?

- Bəli. Əməliyyatdan sonra Maya xanım bildirdi ki, səndən küsmüşəm, telefonlarıma niyə cavab vermirsən? Dedim ki, birincisi əməliyyatda olmuşam, ikincisi ondan sonra öz anam xəstələnib, başım qarışıb. Bunlar da Nahidə Orucovaya deyib ki, o bizə fırıldaq gəlir, biz ona göstərərik. Soruşdum ki, niyə belə demisiniz? Pis söyüşlərlə cavab verdi. Özümə də demişdi ki, pulu göndər, kimə nə verəcəyimi özüm bilirəm. Onun məqsədi bu idi. Nahidə xanım da ona kinostudiyanın adından min manat pul verib. Heç o pulun adını çəkən yoxdur. Deyirlər ki, dövlət kömək etməyib. Bəs kinostudiya pulu nazirliyin göstərişi ilə verib də. Hələ üç mərasimi verilən Şüvəlan məscidinin də pulunu mənim üstümə yıxmaq istəyirdi. Halbuki Nahidə xanım onun pulunu verib. Dedi ki, məscidə 1500 manat borclu qalmışam, pulu vermək istəyirdim, Nahidə xanim dedi ki, mən ona min manat vermişəm. Sonra çıxıb Zaur Baxşəliyevin verilişində mənim adımı hallandırdı. Zaur orada hamımızın sevimlisi Nuriyyə xanımı qaldırdı qoydu dağın başına. Amma sən Zaur, heç olmasa gedib üç mərasimində, cümə axşamında iştirak edərdin, mən etdiyimin yarısını sən edərdin. Bilmədiyin sözü niyə efirdə danışırsan?

- Nə barədə dağın başına qoydu?

- Orada Zaur deyib ki, Məhəmməd başdaşını düzəltdirmədi, pislik özünə qaldı. Məhəmməd elədiyini elədi, başdaşının da pulunu göndərəcəkdim. Sadəcə, bacısı imkan vermədi, dedi ki, pulu göndər mənə. Niyə pulu ona göndərməliydim? Zaur bildiyi şeyi danışsın, bilmədiyini deməsin.

- Axırda başdaşını kim qoydu, xəbəriniz oldu?

- Oğlunun da, Nuriyyə xanımın da başdaşını prodüser Tolikin adına çıxartdılar. Amma hər iki daşı mən sifariş vermişəm, düzəltdirmişəm, oğlunun da başdaşının pulunu vermişəm. Nuriyyə xanımın öz başdaşının pulu göndərilməmişdi ki, buna da Maya imkan vermədi.

- İndiyə kimi sənət adamları ilə ünsiyyətiniz olub, yoxsa bu ilk dəfə idi?

- Afaq Bəşirqızı məni yaxşı tanyıır. Gülnar Salmanovanın axır vaxtlar həkimi də mən olmuşam.

İntiqam VALEHOĞLU
Ölkə.az