\"Qu gölü\"nü belaruslu ulduzlar göstərəcək

Dekabrın 5-də Azərbaycan Dövlət Akademik Opera və Balet Teatrında P.Çaykovskinin “Qu gölü” baletinin tamaşası keçiriləcək.

Ölkə.az xəbər verir ki, klassik balet sənətinin ən gözəl nümunələrindən olan “Qu gölü” baleti uzun illərdir Opera və Balet Teatrının repertuarındadır. Tamaşaçılar bu tamaşanı hər dəfə fərqli ifalarda seyr edirlər. Dekabrın 5-də baş tutacaq tamaşada Belarus Milli Akademik Böyük Opera və Balet Teatrının aparıcı solistləri, Belorusun Xalq artisti Olqa Qayko (Odetta-Odilliya) və Balet artistlərinin beynəlxalq müsabiqələrinin laureatı İqor Onoşko (Ziqfrid) çıxış edəcəklər.

Eyni zamanda tamaşada balet truppamızın solistləri – əməkdar artistlər Samir Səmədov (Rotbart), Tamilla Məmmədzadə və Cəmilə Kərimova, Leyla Narimanidze, Failə Bolqarova (kiçik qu quşları), Nigar İbrahimova, Elmira Süleymanova, Ayan Eyvazova, Samirə Məmmədova (böyük qu quşları), Kamran Qurbanov (Təlxək) və başqaları iştirak edəcəklər.

Ölkə.az