Stiven Spilberqin “Cəsus körpüsü” filmi Nizami Kino Mərkəzinin ekranında

Nizami Kino Mərkəzində dekabrın 3-dən etibarən ABŞ istehsalı olan 3D formatda çəkilmiş “Dənizin ürəyində” və ABŞ, Hindistan və Almaniyanın “Cəsus körpüsü” filmlərinin nümayişinə başlanıb.

“Dənizin ürəyində” filmini Çarlz Livvit və Rik Caffanın ssenarisi əsasında rejissor Ron Xovvard döyüş, triller, tarixi–bioqrafik dram və macəra janrında çəkib.

Yaş məhdudiyyəti:12+

1819-cu ildə amerika gəmisi “Esseks” göyərtəsində 20 nəfərdən artıq komandayla Massaçusets limanından balina vətəgələrinə yol alır. 1820-ci ilin payızına qədər davam edən uğurlu ov, nəhəng dişli balinanın hücumu nəticəsində yarıda qalır. Dənizçilər məcbur qalıb qayıqlara enirlər. Üç aydan artıq onlar okeanın ortasında sağ qalmaq üçün mübarizə aparırlar...

Filmdəki rollara Kris Hemsvort, Ben Uişou, Killian Merfi, Tom Holland,Şarlotta Rayli, Brendan Qlison, Frenk Dilleyn, Pol Anderson, Bendjamin Uoker, Mişel Feyrli və başqa aktyorlar çəkilib.

Məşhur rejissor Stiven Spilberqin Mett Çarmanın ssenarisi əsasında çəkdiyi “Cəsus körpüsü” filmi də triller, bioqrafik tarixi dram janrındadır.

Sloqanı: “Müharibənin kölgəsində bir nəfər nəyin üzərində durduğumuzu göstərdi”

Yaş həddi:16+

Real tarixi hadisələr üzərində qurulmuş film bruklinli advokat Ceyms Donovandan bəhs edir. Soyuq müharibənin episentrinə düşən vəkil, ABŞ-ın Mərkəzi Kəşviyyat İdarəsindən həlli mümkün olmayan tapşırıq alır. O, SSRİ–də tutulmuş U2 amerika cəsus təyyarənin pilotunun qaytarılması barədə əks tərəflə danışıqlar aparmalıdır...

Filmdə baş rolları Tom Henks, Mark Raylens, Emi Rayan, Alan Alda, Ostin Stouell, Skott Şeperd, Cessi Plemons, Domenik Lombardozzi, Sebastyan Kox, İv Xyuson və başqa aktyorlar canlandırıblar.