Azərbaycanlı rejissor qalib oldu

Azərbaycanlı gənc rejissor Oktay Namazovun çəkdiyi qısametrajlı film Şərqi Avropada mədəniyyət müxtəlifliyi üzrə ADAMİ Media Mükafatını (ADAMİ Media Prize for Cultural Diversity in Eastern Europe) qazanıb.

Ölkə.Az xəbər verir ki, rejissor Oxu.Az-a açıqlamasında bildirib ki, “30 ailə” adlı filmin çəkilişləri Quba rayonunun Qrız kəndində aparılıb:

“Bir il əvvəl Qrız kəndinə səyahət zamanı Azərbaycandakı etnik xalqlardan kiçik video-çarx hazırlamaq qərarına gəldim. Bu il həmin sənədli filmi ADAMI Media Mükafatı festivalına göndərdim.

Mükafatlandırma mərasiminin qala gecəsi Gürcüstanın paytaxtı Tiflis şəhərində keçirildi. Ötən gün veb videolar üzrə kateqoriyada qalib oldum”.

Qeyd edək ki, Şərqi Avropada mədəniyyət müxtəlifliyi üzrə ADAMİ media mükafatı Avropa Birliyinin Şərq Tərəfdaşlığı ölkələrindən – Ermənistan, Azərbaycan, Belarusiya, Gürcüstan, Moldova və Ukraynadan olan jurnalistlər və media mütəxəssisləri üzərində cəmlənir.

ADAMİ Media mükafatı ŞT ölkələrində miqrasiya, inteqrasiya və mədəniyyət müxtəlifliyi mövzusunda ən yaxşı proqramları qəbul edir. 

Qaliblər pul mükafatı ilə təmin edilir.