"Səxavət Məmmədov gələndə kim ayağa qalxıb onun üzünə hırıldamırsa, yaltaqlanmırsa, mütləq "vurulmalıdır"-

Mingəçevir Dövlət Dram Teatrının keçmiş aktyoru İbrahim Salamamovla (Türksoy) teatr rəhbərliyi arasında məhkəmə çəkişməsi davam edir.

Aktyor bu günlərdə Mingəçevirdən Ölkə.az-ın redaksiyasına təşrif buyuraraq son vaxtlar baş verənlərdən danışıb.

- İbrahim bəy, bir müddət öncə saytımıza müsahibə verərək Mingəçevir Dövlət Dram Teatrı barədə sərt ittihamlar səsləndirmişdiniz və qarşı tərəf də bu ittihamları cavabladı. Ancaq bu günlərdə bildirdiniz ki, müsahibə vermək istəyirsiniz...

- Ölkə.az-a verdiyim müsahibədən sonra edilən açıqlamalara cavab vermədim. Müsahibə vermək istəməkdə məqsədim var və bəzi şeyləri açıqlamaq istəyirəm. Apellyasiya Məhkəməsindən öncə bir saytın rəhbəri mənə dedi ki, xəbərin varmı teatr rəhbərliyi prosesi udmaq üçün məhkəməyə min manat pul verib?

- Söhbət Şəki Məhkəməsində sizin apellyasiya şikayətiniz üzrə keçirilən prosesdən gedir?

- Bəli, məsələ Ali Məhkəməyə qədər gedib çıxdı və heç bir prosesi uda bilmədim. Əslində, bunu gözləmirdim də. Çünki bu tip prosesləri heç vaxt udmaq mümkün deyil.

- Səbəb?

- Səbəb o idi ki, həmin proseslər tapşırılmışdı. Məsələn, Mingəçevir icra başçısının bəzi müavinləri maraqlıydılar ki, mən uduzum.

- Konkret söhbət hansı müavindən gedir?

- Ramiz Əliyevin adını çəkə bilərəm.

- Bu qədər söz-söhbət, qalmaqal, məhkəmə proseslərindən sonra o teatra qayıtmaq, həmin rəhbərliklə işləmək sizinçün nə dərəcədə qəbulolunandır?

- Mingəçevir Dövlət Dram Teatrının direktoruyla eyni avtobusda da getmək mənimçün ayıbdır. Mənim mübarizəmin məqsədi var. O teatrda maaşlar bir "şirvan" olan dövrdən işləmişəm. Bu yaşda saqqal ağartmazlar, amma mənim saqqalım o teatrda ağarıb. Təsəvvür edin ki, 2-3 "şirvan" maaş alırdım, kirayəyə 5 "şirvan" ödəyirdim. Demək istədiyim odur ki, lazım olanda fədailik də eləmişəm. Yalandan hər yerdə deyirlər ki, teatrın neçə mükafatı var. Bizim teatrın bir mükafatı var, o da "Qızıl dərviş"dir. Həmin mükafatın da beş sahibi var ki, biri mənəm. Əgər söhbət dövlət tədbirlərindən gedirsə, onların yetmiş faizinin iştirakçısı və bir neçəsinin quruluşçusu olmuşam.

- İndi məqsədiniz nədir?

- Sənədlər tam hazırdı, vəkilim Avropa Məhkəməsinə müraciət edəcək. Ancaq ola bilsin ki, bu məsələ Avropa Məhkəməsi üçün bir o qədər əhəmiyyətli sayılmasın.

- Elə o məqamı soruşacaqdım...

- İstənilən halda müraciət olunacaq. Bəlkə də ədalətli məhkəmə qərarından sonra ən azı bir alverçini öz yerinə göndərə biləcəyik.

- Məndə belə bir təəssürat yaranıb ki, sizin teatrdan alacağınız əməkhaqqı, sənət və bu kimi məsələlər bir kənarda qalıb. Söhbət artıq prinsipdən gedir...

- Hazırda belə demək olar. İndiyə kimi o qədər xərclərim çıxdı ki...

- Yaxın ətrafınız, ailəniz deyirlərmi ki, bu məsələdən əl çək?

- Mingəçevirdə əksəriyyət mənə deyir ki, onunla niyə mübarizə aparırsan, bir adam ki, "Çinar" restoranından gəlib. Yəni bu adamın arxivinə bələdik. Əgər bunun məqsədi xalça-palaz yumaqdırsa, gedib işini görsün də. Axı sən gedib palazını başqa yerdə də yuya bilərdin? Mingəçevir Dövlət Dram Teatrında bu sahə üzrə cəmi 5-6 ixtisaslı mütəxəssis var idi ki, onların da yarısı işdən çıxıb. Onlarla da söhbət eləmişəm. Adlarını açıqlamayacağam, çünki orada Səxavət Məmmədovun "Gestapo rejimi" var. Həmin təhsilli adamlar küçədən tutulub teatra gətirilənlərlə eyni səviyyədə tutulurlar. Halbuki nazirlik tövsiyyə edir ki, diplomlu insanlar heç olmasa, layiqli dərəcədə olmalıdırlar. Səxavət Məmmədov gələndə kim ayağa qalxıb onun üzünə hırıldamırsa, yaltaqlanmırsa, mütləq "vurulmalıdır".

- Belə bir deyim var ki, tənqid inkişafa gedən yoldur. Mingəçevir Teatrını son illər sizin qədər tənqid edən yoxdur. Hansısa irəliləyiş, inkişaf var?

- Bəli, teatrda bir irəliləyiş var. "Xalçaların yuyulması" elanı yığışdırılıb, əvəzinə "Avtodayanacaq" yazılıb. Dərs vaxtı azyaşlı məktəblilərin əsnəyə-əsnəyə tamaşaya gətirilməsi halları da çoxalıb. İnkişaf bunlardan ibarətdir.

- Bəs bunları əvvəl niyə demirdiniz?

- Bu sualı mənə məhkəmədə də vermişdilər. Bəli, elə o vaxt da demişəm. Uşaqları tamaşaya elə vaxt gətirmək lazımdır ki, dərsə mane olmasın. Mənim də övladım məktəblidir və tamaşayla dərs üst-üstə düşəndə bilet almağa icazə vemrirəm.
...Apellyasiya Məhkəməsinin son iki prosesindən öncə Səxavət Məmmədovun vəkili Dərgah müəllim məni 2-3 dəfə söhbətə çağırıb. Bir dəfə sosial şəbəkədə də yazmışdım ki, ailəm, problemlərim var, elə bir qazancım yoxdur ki, məhkəmələrə gedib gəlim. Məqsədim odur ki, direktorla ortaq məxrəcə gələk, mən bu söhbəti qurtarım. Onlar belə başa düşüblər ki, mən mübarizəmi tam dayandırıram.

- Vəkil sizə nə dedi?

- Vəkil dedi ki, sən gəl işə qəbulla bağlı ərizə yazırsan, qəbul olunursan və iyirmi gündən sonra ərizə yazırsan ki, işdən çıxıram. Təkliflə razılaşmadım. Məndən sonra truppa müdiri Elşən Məmmədov bəzi aktyorları necə sıxışdırdısa, özləri ərizə yazıb işdən çıxdılar. Onların işdən çıxmağını da belə təqdim elədilər ki, guya bütün bunlar mənə görə baş verib. Ümumiyyətlə, mənim və bir neçə nəfərin işdən uzaqlaşdırılmağının səbəbkarı Elşən Məmmədovdur. O Elşən Məmmədov ki sizin sayta müsahibə verib deyirdi ki, heç yerə qaçmamışam, teatrda öz işimdəyəm. Bəs hanı Elşən Məmmədov?

- Teatrdan uzaqlaşıb tamamilə?

- Bəli, qaçdı getdi və yerinə də bütün bəlaların başında olan keçmiş səhnə rəisi Könül Hacıyeva oldu truppa müdiri. Elşən Məmmədov da Goranboyda anadan olub. Bir ay əvvələ kimi Goranboyda olub. Hətta "Xəzər" televiziyasının işçilərindən biri ora gedəndə tanış çıxıblar. Həmin əməkdaşdan 2-3 manat araqpulu da alıb. Gör hansı həddə gəlib çıxdın, ay Elşən Məmmədov? "Qara volqa" filmi çəkmişəm" deməklə deyil e. Bunun özü qara adamdı, volqası qara deyil. Səxavət Məmmədov onu da qovdu. Elşən Məmmədov məsələni ona görə böyüdə bilmir ki, çoxlu borcları, çoxlu səhvləri var.

- Səxavət Məmmədova da borcu var?

- Onu bilmirəm. Səxavət Məmmədov özü ordan burdan borc alır, kiməsə brc verən deyil.

İntiqam VALEHOĞLU
Fotolar: Nurlan Gülməmmədov
Ölkə.az