Cazın Vaqifinin vəfat etdiyi gündür

Bu gün Azərbaycan caz sənətinin incisi, mirvarisi olan Vaqif Mustafazadənin vəfat etdiyi gündür.

Ölkə.Az-ın məlumatına görə, sənətkar 1979-cu ilin bu günündə Özbəkistanın paytaxtı Daşkənddə qastrol zamanı ürək tutmasından vəfat edib.

V.Mustafazadə bakıda dəfn olunub.

Xatırladaq ki, dünya şöhrətli musiqiçi 1940-ci ildə Bakıda anadan olub.
1963-cü ildə Asəf Zeynallı adına Bakı Musiqi Kollecini bitirib, Bakı Musiqi Akademiyasına daxil olub.

1964-cü ildən "Orero" ansamblına, "Qafqaz" caz üçlüyünə, "Leyli" və "Sevil" qadın vokal instrumental və "Muğam" instrumental ansambllarına rəhbərlik edib. Beynəlxalq caz müsabiqələri və festivallarının ("Tallin-66", "Tbilisi-78", Monte-Karlo) laureatı olub.

Fortepiano və simfonik orkestr üçün konsertin, "Muğam" simfoniyasının (tamamlanmamış), bir sıra caz kompozisiyalarının və pyeslərin müəllifidir. Vaqif Mustafazadə Azərbaycan caz musiqisinin banisi və yeni caz fikrinin (devizinin) təsisçisidir. O, Azərbaycan musiqisinin, muğamın klassik Amerikan caz musiqisi ilə sintezini yaradıb.

Xalq musiqisi, muğamdakı improvizələrdə caz elementləri görmüş və orijinal bir janr ortaya çıxarmış "Muğam" simfoniyasının müəllifi Vaqif Mustafazadə 1979-cu ildə əməkdar artisti fəxri adına, 1982-ci ildə ölümündən sonra isə Dövlət Mükafatına layiq görülüb.

İntiqam VALEHOĞLU

Ölkə.Az