Gənc Tamaşaçılar Teatrında bu gün premyeradır

Bu gün Gənc Tamaşaçılar Teatrında yeni tamaşanın premyerası olacaq.

Ölkə.az-ın məlumatına görə, gənc yazar Sevinc Elsevərin "Ürəyində arzu tut" əsəri əsasında hazırlanmış tamaşa "Arzu və Murad" adlanır.

Yeni səhnə əsərində əsas obrazları Əməkdar Artist Gülər Nəbiyeva, aktyorlar Roza İbadova, Səbinə Məmmədova, Güşvər Şərifova, Nuriyə Əliyeva, Anar Seyfullayev, Eşqin Quliyev, Vüsal Mehrəliyev, Kərəm Hadızadə, Elşən Şıxəliyev, İlham Əsədov oynayırlar.

Xatırladaq ki, “Anamın kitabı” ədəbi müsabiqəsinin qalibi, gənc yazar Sevinc Elsevərin “Ürəyində arzu tut” pyesi əsasında hazırlanmış “Arzu və Murad” adlı tamaşanın quruluşçu rejissoru Gülnar Hacıyeva, bədii rəhbəri, teatrın baş rejissoru, Əməkdar İncəsənət Xadimi Bəhram Osmanovdur.

Tamaşada Xocalı faciəsi baş verən zaman əsir düşmüş gənc qızın acı taleyi, qaçqınlıq şəraitində yaşayan insanların saf hissləri, psixoloji və mənəvi durumu yeni səhnə əsərinin əsas ideyasını təşkil edir.

İntiqam VALEHOĞLU
Ölkə.az