Üzeyir bəyin ev muzeyinin yubileyi keçiriləcək

Dahi bəstəkar, Azərbaycan professional musiqisinin banisi Üzeyir Hacıbəylinin Ev Muzeyinin yaranmasının 40 illik yubileyi münasibətilə sərgi və tədbir keçiriləcək.

Ölkə.az-ın məlumatına görə, Ümummilli lider Heydər Əliyevin təşəbbüsü ilə Bakıda, Şamil Əzizbəyov 67 ünvanında yerləşən – bəstəkarın 1915-1942-ci illər ərzində yaşadığı evdə təşkil olunmuş muzeyin açılışı 1975-ci il noyabrın 20–də olub. Muzeyin təntənəli açılış mərasimində Heydər Əliyev şəxsən iştirak edib. Mədəniyyət və Turizm Nazirliyinin tabeliyində olan muzey bəstəkarın zəngin irsini qoruyaraq, çoxşaxəli yaradıcılıq fəaliyyətini özündə əks etdirir.

Xatırladaq ki, yubiley tədbiri dekabrın 18-də baş tutacaq. Sərgidə muzeyin 40 illik fəaliyyətini əks etdirən fotoşəkillər, eksponatlar, muzeyin nəşrləri nümayiş olunacaqdır.

Tədbirə respublikanın bir sıra tanınmış ziyalıları – əməkdar incəsənət xadimi, professor Kazım Əliverdibəyov, xalq yazıçısı Anar, xalq şairi Nəriman Həsənzadə, xalq artisti Firəngiz Əlizadə, xalq artisti Fərhad Bədəlbəyi, bəstəkar, professor Sevda İbrahimova, professor, əməkdar incəsənət xadimi Zemfira Qafarova, professor Telman Ağdamski, professor Elturan Avalov, Respublika Səsyazmalar Arxivinin direktoru Yaqub Mədətov və başqaları dəvət olunublar.

Tanınmış aktyorların ifasında ev muzeyinə həsr edilmiş şeirlər söyləniləcək, bəstəkarın musiqilərindən parçalar səslənəcək.

İntiqam VALEHOĞLU
Ölkə.az