Aygün Bayramova: \"Röyanı dinləyirəm\"

O, Azərbaycanın güclü səslərindəndir. Həm ifa, həm səhnə mədəniyyəti ilə hər zaman seçilməyi bacarıb. Elə bu gün də muğamımızın öndəgedən simalarından biridir. Maraqlıdır, geridə qalmaqda olan il xanım sənətkarımız üçün nələrlə yadda qalıb.

Beləliklə, Ölkə.az-ın suallarını xalq artisti Aygün Bayramova cavablandırır.

- Aygün xanım, istərdim əvvəlcə sənət yenilikləriniz barədə danışasınız...

- Milli Konservatoriyada maraqlı və təqdirəlayiq bir ənənə var-müəllimlərin hesabat konserti olur. Noyabrın 24-də Milli Konservatoriyanın zalında konsertimiz oldu və çox yüksək səviyyədə keçdi.

- Qastrol səfərləri varmı?

- 2015-ci ildə heç bir qastrol səfəri gözlənilmir. Amma yəqin ki, gələn il səfərlərimiz olacaq. Diskim üzərində iş gedir, yaxın zamanlarda hazır olacaq.

- Ümumiyyətlə, 2015-ci il sizinçün hansı uğurları və uğursuzluqları ilə yadda qaldı?

- Deyə bilmərəm ki, sənətimdə istədiyim çox şeylərə nail oldum. Ancaq buna uğursuzluqlar da demək olar. Ümumi götürəndə uğursuz il olmadı.

- Nail olmaq istəyib bacarmadığınız nələrsə oldumu?

- Sözün açığı diskim işıq üzü görməliydi. Əslində, diskim 2015-ci ildə çıxmalıydı, müəyyən səbəblərə görə ləngidi. Konsertimizin hazırlıqlarına çox vaxt getdiyi üçün çatdıra bilmədik. İnşallah, fevral-mart aylarına kimi çalışacağıq ki, albom çıxsın.

- Bəlkə də yanılıram, amma son zamanlar sizi efirdə az-az görürəm.

- O əvvəllər elə idi. Deyə bilmərəm ki, son zamanlar hər gün efirdə olmuşam. Ümumiyyətlə, tez-tez efirə çıxmağı, bir gündə iki televiziya kanalına getməyi xoşlamıram. Hansı verilişdə özümü görürəmsə, dəvətlərini qəbul edirəm.

- Saytlarda şəxsi həyatınızla bağlı xəbərlər yazıldı. Ailə quracağınız bildirilirdi...

- (sözümü kəsir-İ.V.) Ümumiyyətlə, bu barədə danışmaq istəmirəm. Sənət aləmindən nə sualınız varsa, cavablandırım. Sənətin heç bir şeyə aidiyyatı yoxdur.

- Belə fikirlər var ki, muğam ifaçıları olmasa, musiqimiz tamamilə məhv olar. Yəni estrada ifaçılarının keyfiyyətindən xeyli narazılıq var. Siz necə düşünürsünüz?

- Estrada janrında da sənətini mükəmməl bilənlər, çalışanlar var. Bunu həm gənclərə, həm orta nəsilə aid etmək olar. Deməzdim ki, tam durğunluqdur.

- Estrada ifaçılarından kimləri dinləyirsiniz?

- Nəinki estrada musiqisinə, bütün janrlara qulaq asıram. Cazı da dinləyirəm.

- Kimlərin ifasına qulaq asırsınız?

- Salman Qəmbərov, Şahin Növrsəli, Elçin, İsfar Sarabski, Emil Əfrasiyabı dinləyirəm. Yaxşı caz ifaçılarına həmişə qulaq asmışam. Dünya cazını da dinləyirəm. Sadəcə, adları yadımda qalmaya bilər. Vaqif Mustafazadəni isə çox sevirəm. Harada bir musiqisini görsəm, dinləyirəm. O illərdə Azərbaycanda cazın banisi, təməlini qoyanlardan olub. Vaqif Mustafazadə mənimçün caz ifaçıları arasında birinci yerdə dayanır.

- Bəs estrada?

- Röyanı, Ramalı bəyənirəm. Ramal çox istedadlı gəncdir. Milli Konservatoriyada mənim tələbəm olmuş Elnarə Xəlilovanın da ifası xoşuma gəlir. Yəni, bu ifaçılara qulaq asmaq olur.

- Qarşıdakı ildə solo konsert vermək fikriniz varmı?

- Bu barədə ətraflı danışmaq istəmirəm, əvvəldən heç nə söyləməyi də sevmirəm. Deyə bilərəm ki, belə bir plan var.

İntiqam VALEHOĞLU
Ölkə.az