\"Sən bizə əmanətsən\"

Prezident yanında Gənclər Fondunun maliyyə dəstəyi, Cənub Regional Televiziya Şirkəti və Lənkəran Gənclər və İdman İdarəsinin tərəfdaş təşkilatçılğı ilə Salyan Dövlət Kukla Teatrında “Sən bizə əmanətsən” adlı kompozisiya-tamaşanın təqdimatı olub.

Ölkə.az-ın məlumatına görə, məktəblilər və gənclər qarşısında nümayiş olunan layihənin rəhbəri Orxan Cahangirovdur.

Kompozisiya-tamaşada əvvəlcə 1992-ci ilin 26 fevralında Xocalı soyqırımında amansız işgəncələrə məruz qalan faciə qurbanları, həmçinin vətən uğrunda canlarından keçən şəhidlər haqqında şerlər və kadrlar nümayiş olunub, azərbaycanlılara qarşı zaman-zaman vəhşilik aktları törədən ermənilərin iç üzü göstərilib və bu vəhşiyə müasir Azərbaycanın memarı, ulu öndər Heydər Əliyevin qayıdışı ilə son qoyulması bir daha tamaşaçıların diqqətinə çatdırılıb.

Rejissoru Tural Kərimov olan kompozisiya-tamaşada rolları Lənkəran Dövlət Dram Teatrının aktyorları - Əməkdar artisti Sücəddin Mirzəyev, aktrisa Aynur Əhmədova və gənclər canlandırıblar. Tədbir çərçivəsində ən əsas məqamlardan biri də Azərbaycan himninin sədaları altında böyük ölçülü üçrəngli dövlət bayrağının tamaşaçıların başı üzərindən dalğalandırılaraq səhnəyə gətirilməsi olub. Hansı ki, bu Azərbaycan gəncinin dövlətinə və onun bayrağına olan sevgisinin, sadiqliyinin təcəssümüdür. Layihənin adı da məhz burdan qaynaqlanır.

Qeyd edək ki, “Sən bizə əmanətsən” adlı kompozisiya Salyandan əvvəl Neftçala və Biləsuvar rayonlarında gənclər və məktəblilər qarşısında nümayiş olunub.

İntiqam Valehoğlu
Ölkə.az