İstəyəndə sevib, istəyəndə söyən xalq artisti və qorxaq aktrisa
İntiqam Valehoğlu
Gəncə Azərbaycanın ikinci şəhəridir, mədəniyyət beşiklərindəndir, dəyərli ziyalıların vətənidir, Nizami yurdudur, kinomuza və teatrımıza Adil İsgəndərov, Məmmədrza Şeyxzamanov, Ələddin Abbasov və daha neçə-neçə önəmli simalar bəxş edib.
Amma bu gün Gəncə teatrı canı üstdə olan xəstəni xatırladır. Ən pisi odur ki, bu "xəstə" onu sağaltmaq istəyən "həkimi" döyüb söyməklə məşğuldur. Hansısa jurnalistin bu teatr haqda bircə cümlə tənqid yazması kifayətdir ki, teatrın faktiki rəhbəri Pərvanə Qurbanova igid-ərənləri, dəliləri, klaviatura cəngəvarlərini töksün bu feysbukun canına. Yazıq Mark bilsəydi ki, Pərvanə xanımın, teatrın direktoru Əli Qasımovun belə bir məqsədi var, məncə, bu sosial şəbəkənin imkanlarını daha geniş edərdi, virtual döyüş meydançaları, məşq zalları, uzunluğa hoppanma, eninə tullanma zolaqları düzəltdirərdi. Sonra Pərvanə xanımın faktiki olaraq rəhbərlik etdiyi teatrın klaviatura qoçuları həftədə üç gün o dediyim məkanlarda məşq keçər, teatrlarını tənqid edən jurnalistləri linç etməyin yollarını öyrənərdilər. Elə indicə iş yoldaşım başımın üstündə yazdıqlarımı oxuyur. Deyir ki, yenə niyə əl çəkmirsən bu teatrlardan? Cavab verdim ki, teatrlardan əl çəkdim, indi də teatrlar məndən əl çəkmir. Açıb Gəncə Dövlət Dram Teatrının aktrisası Kəmalə Məmmədovanın ötən gün yazdığım yazı haqqında olan cızmaqara statusunu oxuyuram. Deyirəm ki, Səxavət, canım üçün bu qızdan jurnalist də ola bilərmiş, sözüm yox. Amma stil yenə də eynidir. Maşallah, xalq artisti olmağın başqa özəllikləri var. Dərhal stil və janrını bütün teatra yansıda bilirsən.
Məlumatı olmayanlar üçün xatırladım ki, K.Məmmədova 15 ildir Gəncə Dövlət Dram Teatrında çalışır, son iki ilədək teatrdakı əksər tamaşalarda baş rolları oynayıb, məsələn, xalq artisti Pərvanə Qurbanovadan fərqli olaraq orta təhsilli deyil, Mədəniyyət və İncəsənət Universitetini yaxşı qiymətlərlə bitirib. İntəhası, zəif adamdır. Zəng vurur ki, müsahibə vermək istəyirəm, on dəqiqədən sonra yenidən zəng vurur ki, vaz keçdim.
Şübhəsiz ki, bütün bunlar anlaşılandır. Son iki ildə şəhər tədbirlərinin aparıcılığından (Yalnız ötən il 28 Mayda keçirilən tədbir istisna olmaqla), yeni rollardan uzaqlaşdırılan, məcbur olub Şəkiyə pənah aparan bu aktrisa indi böyük təzyiq altındadır. Yoxsa, adam niyə on dəqiqə öncə odlu-alovlu danışıb, on dəqiqə sonra muma dönsün ki? Sizcə anormal deyil?
Düşünün ki, bu adam "Pərvanə Qurbanova istəsə sevər, istəsə söyər" deyir. Əli Qasımovu çox səmimi adlandırır. Durum ortada deyilmi? İş yoldaşım məni niyə söysün ki? Axı Pərvanə Qurbanovanı bu teatrda fövqəlstatuslu edən səbəb nədir? Artıq şərh vermədən aktrisanın statusunu təqdim edirəm:
"Bir neçə gün öncə mənim haqqımda bəzi sosial şəbəkələrdə informasiyalar yazılmağa başladı. Guya mən doğma teatrımdan didərgin düşmüşəmmiş. Hətta bütün bunlar mənim Şəki teatrına sığınmağım kimi təqdim olundu. Kimlərə dəqiq məlumat lazımdırsa, oxusun və bilsin. Mən Şəki Dövlət Dram Teatrına baş rejissor Mirbala Səlimlinin təklifi əsasında getmişdim, bir tamaşada oynadım və yenidən 15 ilə yaxın çalışdığım teatrıma qayıtdım. İndi yazılanlarla bağlı deyirəm. Bəli, mən İntiqam Valehoğluna zəng vurub müsahibə istədiyimi demişəm. Sonra atdığım addımın doğru olmadığını düşünüb müsahibə verməkdən vaz keçmişəm və jurnalist də bunu olduğu kimi qeyd edib.
O ki qaldı Pərvanə Qurbanovanın iclasda mənim haqqımda dediklərinə, mən iclasda olmamışam. Ancaq indi sizlərdən bir sualıma cavab verməyinizi rica edirəm. Sizi böyüyünüz heçmi danlamayıb? Pərvanə xanım, teatrın yeganə qadın xalq artistidir, sənətini və şəxsiyyətini sevdiyim xanımdır. Əgər mənimlə bağlı nəsə deyibsə, haqqı var. Böyüyümdür, həm sevər, həm söyər. Burada doğru olmayan nə var ki? Sizi də anlayıram, mən də jurnalist işləmişəm. Lakin rica edirəm, hansısa anormalın mətbəxdən daşıdığı informasiyaları yayımlamayın. Zibil çölə daşınanadək mətbəxə tökülür. Teatrın rəhbərliyinə gəldikdə, direktor Əli Qasımovla illərdir səmimi münasibətimiz var. Biz onunla yalnız işçi-direktor deyilik. Əli Qasımov insanı anlayan, dərdinə bacardığı qədər şərik olmağa çalışan son dərəcə səmimi biridir. Mətbəxdən xəbər daşıyanlara gəlincə, ey dili qafil, məqsədin nədir, de bilək? Mən bu günədək iş üzərində şəxsi münasibətlərlə çalışmamışam və bir kimsənin bəzi oynlarında iştirak etməmişəm. Yala hürən köpəklər kimi az quyruq bulayın. O yal bitdiyində nə edəcəyinizi görmək arzusundayam. Yaradan o günü mənə qismət eləsin. Bu yazıdan sonra bir daha bulanıq mövzularda danışmayacağam. Hər birinizi Allaha həvalə edirəm".
Məncə bu statusdan sonra geniş şərhə yer qalmır. Ancaq söylənilməsi vacib olan daha bir neçə kəlməm var. Əvvəla, 15 il teatrda baş rolları oynamış, şəhər tədbirlərini aparmış aktrisa niyə hələ də fəxri ad almayıb? Cavab verirəm. Görünür, Pərvanə Qurbanovanın teatrda "yeganə xalq artisti olan qadın" statusuna xələl gəlməsindən qorxublar. Yoxsa, 34 yaşında xalq artisti almış orta təhsilli biri ilə müqayisədə ali təhsilli 37 yaşlı aktrisaya niyə fəxri ad verilməsin ki?
Hörmətli Kəmalə Məmmədova, fikrimcə, sizə qarşı olunan bütün haqsızlıqlar tamamilə haqlıdır. Çünki haqqını istəməyənə öz haqqını kimsə verməz. Sizə teatrınız və hörmətli rəhbərləriniz barədə yeni mədhiyyə-statuslar yazmaqda uğurlar arzulayıram. Özünüz demişkən, istəsələr söyərlər, istəsələr sevərlər, lap istəsələr...
P.S. Sonda orta təhsilli xalq artistinin ali təhsilli qorxaq aktrisaya verdiyi məsləhəti və "xanım ağam" müraciəti ilə başlayan cavabı da mütləq oxuyun. Hər şey aydın deyil?
