Azərbaycan teatrlarına bu peşə sahibləri rəhbərlik edir
Ölkə.az Azərbaycanın dövlət teatrlarının rəhbərləri barədə kiçik araşdırma aparıb.
Məlum olub ki, ölkənin mədəniyyət ocaqlarına rəhbərlik edənlər arasında televiziya işçisi də var, ehtiyatda olan zabit də, restoran adminstratoru da, Mədəniyyət və İncəsənət Universitetinin məzunu da. Beləliklə...
Ağdam Dövlət Dram Teatrının direktoru Məmməd Hüseynov 1955-ci ildə anadan olub, 1983-cü ildə Mədəniyyət və İncəsənət Universitetinin mədəni maarif fakültəsini bitirib. 1991-1996-cı illərdə Qarabağ müharibəsinin iştirakçısı olub, ehtiyatda olan kapitandır. 2014-cü ildən hazırkı vəzifəsində çalışır.
Azərbaycan Akademik Milli Dram Teatrının direktoru və bədii rəhbəri Azərpaşa Nemətov 1947-ci ildə anadan olub, Azərbaycan Dövlət Konservatoriyasında, dünya şöhrətli bəstəkar Qara Qarayevin sinfində oxuyub. 1965-ci ildə Teatr İnstitutunun rejissorluq fakültəsinə daxil olub. Məşhur rejissor Mehdi Məmmədovun kursunu bitirərək iki il sonra onun yanında assistent-müəllim işləyib. 2016-cı ilin yanvarından bu vəzifədədir.
Azərbaycan Dövlət Akademik Opera və Balet Teatrının direktoru Akif Məlikov 1950-ci ildə Bakı şəhərində anadan olub. 1973-cü ildə Azərbaycan Dövlət Konservatoriyasının ifaçılıq fakültəsini bitirib. 27 ildir bu teatra rəhbərlik edir.
Azərbaycan Dövlət Gənc Tamaşaçılar Teatrının direktoru Mübariz Həmidov 1956-cı ildə Göyçayda anadan olub, 1975-79-cu illərdə Azərbaycan Dövlət İncəsənət İnstitutunun dram-kino aktyorluğu fakültəsində ali təhsil alıb. 2006-cı il yanvar ayında Azərbaycan Dövlət Gənc Tamaşaçılar Teatrının direktoru vəzifəsinə təyin edilib.
Azərbaycan Dövlət Kukla Teatrının direktoru- Rəşad Əhmədzadə 3 aprel 1963-cü ildə Bakı şəhərində anadan olub. 1989-1994-cü illərdə Azərbaycan Dövlət Mədəniyyət və İncəsənət Universitetində təhsil alıb. 1996-ildən Abdulla Şaiq adına Azərbaycan Dövlət Kukla teatrında direktor müavini vəzifəsində çalışıb. 2010-cu ilin aprel ayından Abdulla Şaiq adına Azərbaycan Dövlət Kukla Teatrının direktorudur.
Azərbaycan Dövlət Musiqili Teatrının direktoru Əliqismət Lalayev 1956-cı ildə anadan olub. Mədəniyyət və İncəsənət Universitetinin rejissorluq fakültəsini fərqlənmə diplomu ilə bitirib. Mədəniyyət və Turizm Naziri Əbülfəs Qarayevin 6 may 2008-ci il tarixli əmri ilə Şıxəli Qurbanov adına Dövlət Musiqili Komediya Teatrının direktoru təyin edilib.
Azərbaycan Dövlət pantomima Teatrının direktoru Elman Rəfiyev 45 yaşındadır, 2000-ci ildən Dövlət Pantomima Teatrının direktoru müavini, 2009-cu ildən isə direktorudur.
Azərbaycan Dövlət "YUĞ" teatrının direktoru Tərlan Rəsulov 1968-ci ildə anadan olub, 2007-ci ildən bu teatrın direktorudur. Mədəniyyət və İncəsənət Universitetinin bakalavr pilləsini 2000-ci, magistraturasını isə 2015-ci ildə bitirib.
Füzuli Dövlət Dram Teatrının direktoru Vaqif Vəliyev 1958 ci ildə anadan olub, Mədəniyyət və İncəsənət Universitetinin məzunudur, 25 ildir bu teatra rəhbərlik edir.
Gəncə Dövlət Dram Teatrının direktoru Əli Qasımov 1956-ci ildə Qazax rayonunda anadan olub, 1981- ci ildə Azərbaycan Dövlət Mədəniyyət və İncəsənət Universitetinin Dram və kino aktyorluğu fakültəsini bitirib.
İrəvan Azərbaycan Dövlət Dram Teatrının direktoru İftixar Piriyev 1960-cı ildə Gürcüstan Respublikasının Qaraçöp mahalında doğulub. Mədəniyyət və İncəsənət Universitetinin dram və kino aktyorluğu fakültəsinin məzunudur. 2000-ci ildən bu vəzifədə çalışır.
Lənkəran Dövlət Dram Teatrının direktoru Tofiq Heydərov 1957-ci ildə anadan olub. 2014-cü ildən Lənkəran Teatrını direktorudur. O, Azərbaycan Dövlət Mədəniyyət və İncəsənət Universitetinin məzunudur. Əvvəllər Lənkəran teatrında aktyor kimi fəaliyyət göstərib.
Mingəçevir Dövlət Dram Teatrı - Səxavət Məmmədov Mingəçevir Politexnik İnstitutunu bitirib. Hazırda 39 yaşı olan Məmmədov bir müddət televiziya sahəsində, həmçinin restoran işində çalışıb.
Qazax Dövlət Dram Teatrı Qazax Dövlət Dram Teatrının direktoru Saqif İsgəndərovdur. Direktor barədə nə nazirliyin saytında, nə də digər mənbələrdə ətraflı məlumat yoxdur.
Qusar Dövlət Ləzgi Dram Teatrının direktoru Faiq Qardaşovla bağlı da ətraflı məlumat yoxdur.
Salyan Dövlət Kukla Teatrı direktoru Yavər Cəbrayılovun haqqında da demək olar ki, məlumat yoxdur.
Şəki Dövlət Dram Teatrının direktoru Hikmət Nəbili Mədəniyyət və İncəsənət Universitetinin aktyorluq fakültəsində təhsil alıb. 56 yaşlı direktor 16 ildir bu teatrın rəhbəridir.
Sumqayıt Dövlət Musiqili Dram Teatrının direktoru İslam Həsənov da Mədəniyyət və İncəsənət universitetinin məzunudur. O, dram kino aktyorluğu fakültəsini bitirib. Bir neçə il Lənkəran Teatrına rəhbərlik edib, 2014-cü ildən Sumqayıt teatrına rəhbərlik edir.
Şuşa Dövlət Musiqili Dram Teatrının direktoru Yadigar Muradov 1958-ci ildə Ağdam rayonunun Novruzlu kəndində anadan olub. 1980-ci ildə İncəsənət İnstitutunun dram və kino aktyorluğu fakültəsini bitirib. 1990-cı ildə Şuşa Dövlət Musiqili Dram Teatrı yaradılandan bu günə qədər teatrın direktorudur.
Xankəndi Dövlət Dram Teatrının isə nəinki direktoru, heç teatrın özü barədə məlumata rast gəlinmir.
Bakı Bələdiyyə Teatrının direktoru Amaliya Pənahova 1945-ci ildə Gəncə şəhərində anadan olub. Azərbaycan Dövlət Teatr İnstitutunun Dram və kino aktyorluğu ixtisasını bitirib, 1992-ci ildən yaratdığı teatra rəhəbrlik edir.
Hazırladı: İntiqam VALEHOĞLU
Ölkə.az
