Mingəçevir teatrından yeddisi çıxmamış şəhidə hörmətsizlik

Bu gün Mingəçevir Dövlət Dram Teatrında truppa müdiri Könül Hacıyevanın doğum günü münasibətilə geniş tədbir keçirilib.

Ölkə.az-ın teatrdakı mənbəyə istinadən verdiyi məlumatına görə, teatrın bir çox əməkdaşları buna etiraz etsə də, bir qrup sözügedən şadyanalıqda yaxından iştirak edib. Mənbənin dediklərindən:

"Teatrımızın əməkdaşı Kamran Adilzadənin oğlu Adil Adilzadə bir neçə gün öncə şəhid olub. Onun fotosu hələ teatrın foyesində ikən belə bir şadyanalığın təşkil olunmasının adı nədir? Bu dəqiqə bütün şəhər şəhidimiz Əhmədov Rüstəm Oruc oğlunun yeddi mərasiminə hazırlaşır. Rüstəmgilin də evləri düz teatrla üz-üzədir. Təsəvvür edin ki, bu adamlar şəhidin evi ilə üzbəüz musiqili, yeyib-içməkli ad günü keçirirlər. Əgər toy olsaydı, başa düşmək olardı ki, əvvəlcədən təyin olunub. Yəni bu ad gününü keçirməmək olmazdımı?"

Xatırladaq ki, truppa müdiri Könül Hacıyevanın çal-çağırlı ad günündə ona yaxın münasibəti ilə seçilən direktor Səxavət Məmmədov və müavini Vüsal Məmmədov da iştirak ediblər. Mərasimdən çəkilmiş gizli videonu təqdim edirik.

İntiqam VALEHOĞLU
Ölkə.az