Hacı Taleh aşiqi olan azərbaycanlı aktyor və onun direktoru
İntiqam VALEHOĞLU
Mətbuatda olduğum müddətdə, xüsusən də mədəniyyət sahəsindən yazdığım son bir neçə ildə çox şeylərin şahidi olmuşdum. Yalandan balasının canına and içən xalq artistindən tutmuş, məşuqunu ərinə nümunə göstərən aktrisaya qədər. Hələ mən işçilərinə zülm edən, onları haqqımda statuslar yazmağa vadar edən direktorları demirəm. Mingəçevir Dövlət Dram Teatrı haqda yazdığım yazılardan sonra edilən təhdidlər isə başqa aləmdir. Deməli, əvvəlcə direktor Səxavət Məmmədov məni təhdid elədi, ardınca sosial şəbəkədəki profilini dondurdu. Sonra isə minnətçi minnətçi ardınca. Şübhəsiz ki, onların arasında xoşməramlıları da var idi, 5-10 manat alıb mənim hesabıma qabağa düşmək istəyənləri də. Son iki gündə yazdığım yazılar isə ömründə bircə dəfə mənə zəng vurmamış direktor Səxavət Məmmədovu da dilə gətirdi. Ötən gün zəng vurub bir həftə yazıları dayandırmağımı xahiş elədi. Baxdım ki, yaşı-başı, bığı, saqqalı, üstəlik də teatr direktoru boyda vəzifəsi olan adamı heç olmasa bir dəfə dinləmək olar. Söz verdim ki, bir həftə gözləyəcəm. Amma bu o demək deyil ki, bizim söhbətimizdən sonra yazılar dayandırılacaq. Sadəcə maraqlı idi ki, bu adam mənə qarşı etdiyi təhdidlərə hansı formada haqq qazandıracaq.
Bu gün "Facebook" profilimi açıram, nə görsəm yaxşıdır? Elə həmin teatrın Amil Fərzəliyev adlı aktyoru, Taleh Bağırzadə aşiqi Amil Fərzəliyev ad çəkmədən mənim və işlədiyim saytın ünvanına yekə bir status yazıb. Yalan olmasın, bu status onun olmayan karyerasından təxminən 78 dəfə uzundur. Yorucu da olsa əvvəlcə aktyor adını daşıyan bu şəxsin statusunu olduğu kimi oxuyun:
"Əziz və hörmətli dostlar, son günlər öz murdar məqsədlərindən əl çəkməyən, hansısa xoşagəlməz əməlləri ilə insanlıqdan kənar olan şəxslər yenə də öz murdar məqsədlərindən qalmırlar. Hansı ki, "Ölkə.az" saytı kimi fəaliyyət göstərən bu yalançı qurum, öz yalançı və qərəzli yazıları ilə adı çəkilən sayt yenə də gündəmdə oldu. İki gün öncə baş verən bu xoşagəlməz vəziyyətin bir çoxlarımız şahidi olduq. Teatrımızın hər bir əməkdaşı öz kollektivinin hər birinin doğum günündə çox gözəl iştirak edib. Həmin günü bütün kollektiv təbrikdə iştirak edib. Paylaşılan qısa müddətli videoda isə bu açıq aydın görünür. Kollektivimiz hər zaman şəhidlərimizə qarşı böyük hörmət göstərib və hər bir çıxışda öndə gedib. Doğum günü təbriki isə sadəcə quru təbrik olub və bütün kollektiv həmin təbrikdə iştirak edib. Paylaşılan videoda və həmin video haqqında yazılanlar isə bir-birini heç də təsdiqləmir. Guya ki, həmin gün kollektivimiz şəhidlərimizə qarşı böyük hörmətsizlik edib. Bu cür yalançı yazıları yazmaqla özlərinə nifrət qazanan insanlar, əslində sizə "insan" kəliməsi demək də utanc vericidir, ən azından yazanda bir düşünün ki, nə yazırsınız, nəyi paylaşırsınız. Hansı ki, həmin sayt Mədəniyyət və Turizm Nazirliyi tərəfindən boykot olunub. Bunu da bilməyənlər bilsinlər. Yazılanlara cavab olaraq, qərəzli məqaləni paylaşanlara və bu işdə rolu olan şəxslərə səslənmək istəyirəm ki, Şəhidlərimiz gələrkən kollektivimiz şəhər ictimaiyyəti ilə birlikdə şəhərə çıxanda, dəfələrlə bu barədə tədbirlərdə iştirak edəndə, Şəhidimizin üç və yeddi mərasimində şəhidlərimizin ailəsi ilə birgə olanda harda idiniz? İndi kişilik damarınız tutub, ay vicdansızlar? Heç olmasa yazanda kişi kimi, dürüst məqalələr yazıb, ölkədə nümayiş etdirin. Şəhidimizin atası, teatrımızın əməkdaşı Kamran əmi haqqında da yazdığınız uydurma fikrlərə görə, Kamran əminin halının pis olduğunu qeyd etmisiniz. Vaxtınız olanda gəlin bircə dəfə Kamran əmidən soruşun. Şəhidimizin ilk xəbərini alanda onun ailəsinin yanında olan, onlara ürək-dirək verən yenə də biz idik. O zamanlar siz harada idiniz, ay əcaib məxluqlar? Siz isə bir küncə çəkilib bu hadisələri heç izləmədən, öz murdar məqsədlərinizin arxasında idiniz. Siz də özünüzü "Kişi" hesab edirsiniz? Sizin kimilərə məsləhətim budur ki, vaxtınız olanda, kollektivimizə yaxınlaşıb, onlardan kişilik dərsi alın. Dərs alın ki, bəlkə ağıllandınız. Buna isə heç cür inanmağım gəlmir. Mənim bunları yazmaqda məqsədim budur ki, Mingəçevir Dövlət Dram Teatrının kollektivi heç vaxt Şəhidlərimizə qarşı hörmətsizlik etməyib və heç vaxt da etməz. Yazılanlara gəlincə isə, sonda onu məsləhət görürəm ki, hansısa yazılanları oxuyanda və ya oxuyub rəy bildirəndə diqqətlə nəzərdən keçirib dəqiqləşdirək sonra isə öz vicdanımızla münasibət bildirək. Çalışın ki, bu cür fitnəkarlardan uzaq olun".
Əvvəla deyim ki, statusun yazılışından belə bir qənaətə gəldim ki, Amil burada yalnız "enter" düyməsini vuran rolunda iştirak edib. Yəni mətn hazırlanıb, o isə sadəcə paylaşıb. Çünki ətrafından aldığım bilgilərə görə, o ağılın yiyəsi öz adını yazanda ən azı 3 hərf səhvi buraxmalıydı. İkincisi, statusdan dərhal sonra Səxavət Məmmədovla əlaqə saxladım ki, xahiş etdiniz, qəbul etdik, indi qarnınızın dərdi nədir? Bildirdi ki, 15 dəqiqəyə məsələ həllini tapacaq. Nəinki 15 dəqiqə, 42 saniyədən sonra status yerində yox idi. Deməli, bir adam şəxsi profilində yazmağa azad deyilsə, eyni məntiqlə kiminsə yazdığını da səhifəsində zorla da olsa paylaşa bilər.
Məsələnin digər diqqətçəkən tərəfi budur ki, ölkədə dini ekstremizmə, milli təhlükəsizliyimizə təhlükə yaradan qüvvələrə qarşı tədbirlərin görüldüyü bir vaxtda, bu adamın profili Taleh Bağırzadənin fotoları ilə göz oxşayır. Taleh Bağırzadə aşiqi olan bu adam, hər ay məvacibini alıb yediyi dövlətinə qarşıdırsa, niyə bu barədə bir tədbir görülmür? Olmaya, teatr rəhbərliyi də Amil Fərzəliyev kimi düşünür ki, doğrudan da Taleh Bağırzadə səcdə olunası şəxsdir? Hər halda inanıram ki, Mədəniyyət və Turizm Nazirliyi adını daşıyan qurum məsələyə münasibətini bildirəcək. Heç olmasa bu dəfə.
