“Ağdam. 5 fraqment” filminin təqdimat mərasimi keçirilib
Nizami Kino Mərkəzində “Ağdam. 5 fraqment” filminin təqdimat mərasimi keçirildi.
Aprelin 21-də Nizami Kino Mərkəzində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Belçikanın “Qafqazın Qovuşma Nöqtəsi” təşkilatının hazırladığı “Ağdam. 5 fraqment” adlı filmin təqdimat mərasimi keçirilib.
Təqdimatda filmin yaradıcı heyəti, dövlət rəsmiləri, beynəlxalq təşkilatların və diplomatik korpusun nümayəndələri və QHT rəhbərləri iştirak edib.
Filin nümayişindən sonra “Qafqazın Qovuşma Nöqtəsi” təşkilatının sədri, filmin rejissoru Mişel İvor çıxış edərək ideyanın ərsəyə gəlməsi haqqında məlumat verib və filmin hazırlanmasına göstərdiyi dəstəyə görə Şuraya təşəkkürünü bildirib.
Sənədli filmdə Ağdam şəhərindən olan və məcburi köçkün həyatını yaşayan 5 nəfərin təəssüratları və xatirələri yer alıb.
Tədbirdə çıxış edən Milli Məclisin deputatı Bəxtiyar Əliyev, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev filmin yaradıcı heyətinin əməyinin yüksək qiymətləndirildiyini söyləyiblər, filmdə müsahib olan 5 nəfərin timsalında 1 milyondan çox azərbaycanlının acınacaqlı taleyindən dünya ictimaiyyətinə çatdırılmasını vurğulayıblar.
Sonda filmin rejissoru Mişel İvor Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının fəxri fərmanı ilə təltif olunub.
Qeyd edək ki, adıçəkilən film 11 fevral 2016-cı ildə Belçikanın paytaxtı Brüssel şəhərində nümayiş etdirilmiş və yerli ictimaiyyət tərəfindən böyük maraqla qarşılanmışdır.
