Folklor İnstitununun şöbə müdiri görün nələrdə ittiham olunur?

İran Aşıqlar Birliyinin qurucusu Aşıq Səlcuq Şəhbazi Ölkə.Az saytına müraciət məktubu göndərib. Məktubda Azərbaycanın Folklor İnstitutunun aşıq yaradıcılığı şöbəsinin müdiri Elxan Məmmədlinin birliyə qarşı qərəzli münasibətdə olduğu və digər məsələlər yer alıb. Aşıq Səlcuq Şəhbazinin məktubunu olduğu kimi təqdim edirik.

Hörmətli cənablar və xanımlar, hər birinizin dəyərli vaxtınızı belə xırda işlərlə aldığımızdan üzr istəyirəm. Amma başqa da çarəmiz qalmadı. Qısaca olaraq onu deyim ki, mən sizə İran Aşıqları Birliyinin adından müraciət edirəm və hörmətlı əsl türk saytlarından, qəzetlərindən, qələm sahiblərindən, radio və televiziyalardan xahiş edirəm bizə dəstək olsunlar. Xüsusən güneylı bacı və qardaşlarımızdan istəyim budur ki, İran Aşıqlar Birliyini tək qoymasınlar. Çünki bu birliyi gözü götürmüyən bir Azərbaycan vətəndaşı-Elxan Məmmədli adında bir tanınmış adam var ki bizim birlik yaranandan onun şəxsi mənafeyinə uyğun gəlmədiyi üçün gecə-gündüz üstümüzə qara ləkə atmağa çalışır. Onun Azərbaycan mətbuatında xeyli dost-tanışı var, telekanallarda bizim birliyin əleyhinə təbliğat aparır. Bu Elxan Məmmədlinin bir şagirdi var ki, İranda əleyhimizə işlər görür. Dediyimizin hamısını sənədlərlə sübut edə bilərəm.

Hörmətlı cənablar və xanımlar, onu da deyim ki, 2015-ci ilin yazınadək İranda aşıqların ayrıca birliyi olmamışdı. Nəhayət 2015-ci ildə çoxdankı zəhmətimiz öz bəhrəsini verməyə başladı. Düşünürdük ki, buna hər kəs, o cümlədən Azərbaycanda hər kəs sevinər. Amma bəzi məqamlarda bunun əksini gördük. Daha çox da Bakıdan bizə mane olmaq istəyənlər tapıldı. Bakıda Folklor İnstitutunun aşıq yaradıcılığı şöbəsinin müdiri olduğunu deyən Elxan Məmmədli özünün bu taylı Böyükbəy Ələkbəroğlu adlı dostunun xeyri naminə bizi aşağılamağa çalışdı. Bakıda hər addımda mətbuatda öz dostunu İran Aşıqlar Birliyinin rəhbəri kimi təqdim etdi ki, bu da biz aşıqların hiddətinə səbəb olur. Elxan Məmmədlinin özünə bu haqda müraciətimiz oldu, onu bu sayaq işlərdən çəkinməyə çağırdıq, amma o dostunun yanında sonadək olacağını dedi. Elxan Məmmədli dostunun yaramaz əməlləri haqda biz Azərbaycanda bir çox saytlara və mətbuatda da çox yazılıb. Hətta İran aşıqlarının geniş müraciəti də "Təzadlar" qəzetində dərc olunub, lakin nəticəsi olmayıb. Elxan Məmmədli hər yerdə deyib ki, guya İrandakı aşıqlar arasında təfriqə, 2-3 yerə bölünmə var. Bütün bunlar yalandır, daim şifahi xalq yaradıcılığı ilə məşğul olan bir adamın növbəti “yaradıcılıq məhsulu”dur. Bilmək istəyirəm, axı bizim burdakı işlərin, İran Aşıqlar Birliyinə kimin rəhbər seçilməsinin Elxan Məmmədliyə nə aidiyyatı var? Bilmək istəyirik ki Elxan Məmmədlinin başqa işləri yoxdurmu? Çalışdığı institutda başqa işi-gücü yoxdur ki, durub bu tayda bizim işlərə barmaq uzadır?
Hörmətli xalqımız, məcbur olub sizə müraciət edirəm. Elxan Məmmədliyə indiyədək birbaşa özünə dediklərim və deyəcəklərim çoxdur. Ancaq onlardan bəzilərini sizin diqqətinizə çatdırmaq istəyirəm və Elxan Məmmədlidən cavab almaq istəyirəm. Çünki mənim Azərbaycan xalqından və aşıq sənətinin, ədəbiyatının alimlərinin köməyinə və doğru yol göstərməyinə ehtiyacım var.

1. Doğrudanmı Elxan Məmmədli Böyükbəyi İranda ən yaxşı aşıq sənəti bilicisi və folklorşünas kimi tanıyır?

2. Əgər belədirsə, o zaman onun kitabları bir yana, heç olmazsa bircə elmi məqaləsinin adını çəkə bilərmi? Deyə bilərmi əsas tədiqat sahəsi nədir?

3. Bildiyim qədər Elxan Məmmədli Folklor İnstitutunun Aşıq yaradıcılığı şöbəsinin müdiridir. Deyə bilərmi ki, Böyükbəylə hansı elmi əməkdaşlıq edirlər?

4. Yenə də Aşıq şöbəsinin müdiri kimi bilirmi ki, mən Folklor İnstitutuyla hansı əməkdaşlığı edirəm və indiyədək ora neçə dastan vermişəm?

5. Bunlara cavab verə bilməsə, heç olmasa deyə bilərmi ki, bu Böyükbəyin təhsili nədir?

6. Yoxsa Elxan Məmmədli Böyükbəyin bu söyüşlərini şifahi xalq yaradıcılığı hesab edir?

7. Elxan Məmmədli deyir ki, Böyükbəyin İran aşıqlarının Azərbaycanda, Azərbaycan aşıqlarının da İranda təbliğində böyük xidmətləri var. O taydan bu taya toya aşıq dəvət etmək nə zamandan sənətə xidmət olub?

8. Və Elxan Məmmədli deyə bilərmi ki, bu Böyükbəyin hansı xidmətlərinə görə Folklor İnstitutunun xəttiylə onun barəsində başqalarının rəyi toplanmış kitab hazırlayır. Bir folklorçu alim kimi İranda tanınmış aşıqlardan bircəsini tapmadımı belə kitab hazırlamağa?

9. Ümumiyyətlə onun özü İrandakı aşıqlarla bağlı indiyədək bircə məqalə yazbmı? Yoxsa bu Böyükbəyi özündən də böyük folklorçu hesab edir?

10. Elxan Məmmədli Azərbaycandan bir neçə aşığın adını çəkir və deyir ki, onları İranda Böyükbəy tanıdıb. Bəli, onlar İrana gəliblər, amma toya. Necə gəlib-getdikləri də bizə bəllidir. Amma bir halda ki, Elxan Məmmədli adlar sadalayır, mən də onun bir siyahısından kənara çıxmaq isttəmirəm. Məsələn, elə Elxan Məmmədli adını çəkdiyi aşıqlardan Aşıq Elbrus və Aşıq Əşrəfdən soruşun ki, 2014-cü ildə sizi Tehranda keçirilən aşıqlar festivalına Böyükbəy dəvət etmişdi, yoxsa Səlcuq Şəhbazi? Bu sualı eynilə əməkdar Mədəniyyət işçiləri Ağamurad İsrafilova və Sərdar Məmmədəova, Prezident təqaüdçüsü Mahmud Məmmədova, aşıqlardan Tərmeyxan Qurbanova, Nəbi Nağıyeva, Əli Tapdıqoğluna və digərlərinə də ünvanlaya bilərsiniz. Amma bununla belə, 25 ildir ki, bir aşıq kimi Azərbaycana gedib-gəlsəm də, bu tayda rəsmi icazəylə müxtəlif aşıq tədbirləri keçirəndə Aəzrbaycandan da aşıqlar dəvət etsəm də, mən bircə dəfə bunu dilimə gətirmədim. Elxan Məmmədli isə bunları görməzliyə vurdu.

11. Və bu 25 ildə bir aşıq kimi mənim də adımı dilinə gətirməməsini, əksinə hər dəfə məni yamanlamasının səbəbini nəylə izah edir Elxan Məmmədli?

12. Elxan Məmmədli deyə bilərmi ki, İrana – Böyükbəyin evinə şəxsi problemləri ilə bağlı gəldiyindən başqa onun təşkilatçlığı ilə keçirilən hansı tədbirə qatılıb? Ümumiyyətlə, o adam belə bir tədbir keçiribmi?

13. Doğrudanmı Elxan Məmmədli hesab edir ki, onun dostu Böyükbəy o tayda hətta rəhbərliyində Məhərrəm Qasımlı, idarə heyətində Qəzənfər Paşayev kimi şair və professorların, görkəmli ustad aşıqların təmsil olunduğu, hətta özünü də idarə heyətinin üzvü olduğu Azərbaycan Aşıqlar Birliyindən çox iş görür (bu fikri Böyükbəyin feysbukdakı statusuna rəy olaraq yazıb. Sonradan silib dediklərini dana bilər deyə surətini götürüb saxlayıram). Bu, öz ölkəsini aşağılamaq üçün bundan da böyük qəbahət olarmı?

İntiqam VALEHOĞLU
Ölkə.Az