Teatr direktorundan ədəbsizlik

Ötən gün saytımızda "Lənkəran teatrında ara qarışdı: "Mənim əxlaqıma söz deyən kaftarlar..." başlıqlı yazıdan sonra sözügedən teatrda vəziyyət bir qədər də gərginləşib.

Ölkə.Az-ın əldə etdiyi məlumata görə, teatrın direktoru Tofiq Heydərov aktrisa Aynur Əhmədovaya sərt şəkildə iradını bildirib. Bu gün əməkdaşımız baş verənlərin nədən ibarət olduğunu öyrənmək üçün Tofiq Heydərovla əlaqə saxlayıb. Heydərov rəhbərlik etdiyi mədəniyyət ocağında gedən əxlaq söhbətlərinə cavab vermək əvəzinə, özü də ədəbsizlik edib. Hər halda jurnalisti xəbər yazmaqda ittiham edib, üzünə telefon qapamağın başqa adı yoxdur:

"O nədir götürüb sosial şəbəkə üçün yazılmış şeyi yazmısız. Guya Lənkəran teatrında bomba partlayıb. Hələ əvvəlcə bunun izahatını verin mənə. Teatrda nə baş verir, bilmirəm. Sizə də heç nə deyən deyiləm. Sağ olun".

Xatırladaq ki, teatrın aktrisası Aynur Əhmədova ötən gün status yazaraq teatrın yaşlı əməkdaşlarının onun namusu haqda xoşagəlməz ifadələr səsləndirdiklərini bildirmişdi:

"Hər uğurlu qastroldan, beynəlxalq festivaldan geri dönəndə Lənkəran teatrının qocaldıqca ağlını itirən, gənclərin qənimi, gənc aktyor, aktrisa görəndə sanki qutuda ilan görən, paxıllıqdan xəstəlik tapan, içini qurd yeyən, kamilləşmək əvəzinə cahilləşən, ağsaqqal deyil, ağ çaqqallıq edən bəzi-bəzi aktyor və aktrisaları!!! Məncə yetər, məncə daha bəsdir! Nə qədər teatrın həyətində özünüzü günə verib, qeybət edəcəksiz. Nə sözünüz var, üzümə deyin, mənim kimi! Siz özünüz də gözəl bilirsiz ki, mən Aynur Əhmədova Lənkəranda əxlaqım və sənətimlə çox böyük hörmət sahibiyəm. 19 ildir bu teatrda başım sizin əlinizdən nələr çəkir, nə edim ki, gedəcək yerim yoxdur. Ölün, qurban olun mənim plastik maaş kartıma ki, maaşa ehtiyacım var, daha sizin kimi titul, fəxri ad, mükafat acı deyiləm. Məcbur və məhkumam sizin kimi təhlükəli və qorxulu insanlarla işləməyə.Siz artıq saxlama müddəti bitən məhsullar kimi iylənirsiz, adam sizin dedi-qodunuzdan iyrənir. Mənim rollarıma kim nə desə, vecimə də deyil, mənim əxlaqıma söz deyən kaftarlar, sizi məhv edərəm!!!! Qorxun Allahdan!"

Mövzunu diqqətdə saxlayacağıq.