Əzrayılın gecəsinə 40 min
İntiqam VALEHOĞLU
Yaşadığım ölkənin adının Azərbaycan olduğunu bildiyimdən indiyə kimi hələ bir nəfərdən eşitməmişəm ki, filan aktyor filan filmə çəkildi və bunun hesabına lüks həyat yaşayır. Elə sonralar mətbuatdan da həmişə aktyorların maddi durumları ilə bağlı narazılıq dolu müsahibələrini oxumuşam. Məsələn, ağlıma da gəlməzdi ki, Telman Adıgözəlov boyda aktyorun maddi sıxıntıları var. Yaxud Rafael Dadaşovun məclislərdə tamada kimi iştirak etməsi ağlıma da gəlməzdi. İş elə gətirdi ki, adını çəkdiyim və çəkmədiyim aktyorlarla təmasda oldum, ən əsası məvaciblərini öyrəndim və... düşüncəmdəki aktyor obrazı özünü kasıb, həmişə borc içində, məhəllə dükanlarındakı borc dəftərlərinin daimi "sakini" olan biriylə əvəzləndi.
Kukla teatrının aktyoru Rəhim Rəhimovla bağlı bu günlərdə oxuduğum xəbər də mənim üçün qeyri-adi olmadı. Bilməyənlər üçün deyim ki, 37 yaşlı aktyorun böyrəyində yaranmış problem onun həyatına təhlükə yaradıb. Böyrək çatışmazlığının aradan qaldırılması üçün nə az, nə çox 40 min manat vəsait lazımdır. Əslində, ilk baxışdan elə də kiçik məbləğ deyil. Ancaq nəzərə alsaq ki, Rəhim yetərincə istedadlı aktyordur, artıq peşəkar aktyor kimi yetişib, bir neçə film və serial, eyni zamanda işlədiyi teatrdakı işləriylə özünü təsdiqləyib, deməli, 40 min elə də böyük məbləğ olmamalıdır. Düzdür, Rəhim elə böyük rollar oynamayıb, obrazlar canlandırmayıb. Ancaq yetərincə açılmayan potensialı var. Ən əsası isə mədəniyyətimiz üçün lazımlı biridir.
Düşünə bilərik ki, 40 min manat hansısa milyonçunun bir müğənniyə bir gecə üçün xərclədiyi məbləğin yanında heç nədir. Halbuki həmin milyonçu həmin müğənninin həyatında bəlkə də bir milyonunçudur. Haqlısınız. Haradasa mən də belə düşünürəm. Onu da nəzərə almaq lazımdır ki, Rəhim mədəniyyətimizə bir gecəlik yox, bir ömürlük lazımdır.
İnanın səmimiyyətimə ki, Rəhimlə şəxsi tanışlığım yoxdur. Yalnız oynadığı bəzi rolları görmüşəm, aktyor həmkarlarından haqqında müsbət fikirlər eşitmişəm. Nə qədər ağır səslənsə də, bu durum yaradıcılığının və ömrünün ən gözəl çağında olan Rəhimi bizdən almağa doğru aparır. Bu durum 19 ildir teatra xidmət edən birini əlimizdən almağa doğru gedir.
Deyirlər ki, ölüm və həyat Allahın əlindədir. Doğrudur. Amma bu dəfə əzrayılın əl-qolunu bağlamaq həm də imkanlı şəxslərin əlindədir. Əl-qolunu bağlatdırıb gecələr hüzurunuza gətirdiyiniz "mələklərin" əvəzinə, bu dəfə əzrayılın əl qolunu "bağlaya" bilərsiniz. Cəmi 40 min manata... Nə deyirsiniz? Həm də bir gecəlik deyil, daha uzun müddətə və savablı əsaslarla...
