Anar Heybətov dövlətçilik əleyhinə çıxışlar edib?!
İntiqam VALEHOĞLU
Həyatda heç də həmişə ədalətli olmaq mümkün deyil və kimsə bunun əksini iddia edirsə, deməli, səmimiyyətdən çox-çox uzaqdır. Ancaq elə məqamlar da var ki, burada ədalətli olmaqdan, haqqı görməməkdən savayı yol qalmır.
Məsələn, döşək üzərində mübarizə aparan iki güləşçidən biri digərinin kürəyini yerə sıxırsa, hakim isə kürəyi yerə dəyən idmançının əlini qaldırırsa...
Şagirdlərdən biri dərsini əzbər bilirsə, digəri dərsin adından da məlumatsızdırsa...
Yaxud aktyorun biri digərindən çox sevilirsə, tanınırsa, səhnə üçün daha maraqlıdırsa, onu səhnədə görmək üçün həmin teatrın tamaşalarına gələn varsa, küçədə görəndə insanlar yaxınlaşıb oynadığı rollara görə təşəkkür edirlərsə, ən əsası qazandığı uğurlar kiminsə hesabına deyil, zəhməti və istedadının sayəsindədirsə və hələ də heç bir fəxri ad almayıbsa...
Yazdığım son cümlə birmənalı olaraq Akademik Milli Dram Teatrının tanınmış aktyoru, əməkdar artist olmayan Anar Heybətova aiddir. O Anara ki, son illər çəkilən bir neçə filmin, serialın baş rollarını oynayıb, 15 ildir "Azdrama"nın səhnəsindədir, elə bu teatrın direktoru Azər Paşa Nemətovun da kursunu bitirib. Dəqiq sayını bilməsəm də, bu teatrda irili-xırdalı onlarla rollar oynayıb, iyirmiyə yaxın filmdə çəkilib, tanınır və əminliklə deyə bilərəm ki, sevilir.
O Anarın sentyabrın 25-də 40 yaşı tamam olur. Nə az, nə çox, düz qırx yaşı. Yəni bir aktyor üçün yaradıcılığın ən məhsuldar dövrü.
Fəxri ad almış, amma bu ada layiq olmayan kimlərinsə adını çəkmək istəmirəm. Xətirlərinə dəyəcəyimdən narahat deyiləm. Əksinə, belə adamları tənqid etdikcə, layiq olmadıqları pillədə olduqlarını dedikcə, "gözəgörünməz" qüvvə onları daha yuxarılara çəkir. İndi yazsam ki, filan aktyor fəxri adı bacısının xahişiylə alıb, başqa biri sadəcə dövlət tədbirlərində aparıcı olduğu üçün əməkdar artistdir, uzağı 3-4 aya xalq artisti olacaq. Yenə də Anar Heybətov, yaxud Rövşən Kərimduxt (Rövşən Kərimduxt haqda ayrıca yazımız olacaq) yada düşməyəcək.
Hər kəsə məlumdur ki, fəxri adlar Prezidentin imzasıyla verilsə də, təqdimat daha aşağı qurumlardan gedir. Teatr Mədəniyyət və Turizm Nazirliyinə, nazirlik isə ölkə başçısına həmin siyahını təqdim edir. Görəsən doğrudanmı, indiyə kimi Anar Heybətovun adı həmin siyahılarda olub? Əgər teatrdan nazirliyə göndərilən siyahıda olubsa, bəs nazirlikdəki hansı ağıllı öz ampulasında ölkənin ən tanınmış 3-4 aktyorundan birini "görməyib"? Yox, teatr aktyorun adını nazirliyə təqdim etdiyi siyahıya salmayıbsa, deməli, o siyahını tərtib edənlər vicdanlarına tüpürmüş adamlardır.
İddia etmirəm ki, Heybətov 10 il əvvəl fəxri ad almalıydı. Amma fakt budur ki, son beş ildə onun istər teatrda, istər kinoda oynadığı xeyli maraqlı rolları var və beş il ərzində fəxri ad almış həmkarlarının böyük əksəriyyətini həm sənətdə, həm də populyarlıqda qabaqlayır.
Elədirsə, layiq olduğunu adamın özünə vermək bu qədərmi çətindir? İnanıram ki, vaxtında dövlət və dövlətçilik əleyhinə çıxışlar edən əməkdar artistlərin etdiklərini Anar etməyib. Bəlkə etsəydi, səsini kəsmək üçün onun da adını siyahıya salardılar.
P.S. Bundan sonra saytımızda fəxri ada layiq olduğunu hesab etdiyimiz, ancaq fəxri ad almamış sənət adamlarıyla bağlı yazıları oxuya bilərsiniz.
P.S.S Anar Heybətovun bu yazıdan xəbəri yoxdur və reaksiyasının necə olacağının fərqində deyiləm. Amma Mədəniyyət və Turizm Nazirliyi, həmçinin "Azdrama" rəhbərliyi güman edirəm ki, fərqində olacaq.
