Zahid Qubadlı: \"Qubadlı haqda danışmaq təsəllidən başqa bir şey deyil\"

Bu gün Qubadlı rayonunun işğalından 23 il ötür. Bu illər ərzində dəyişən çox şeylər var, bir şeydən başqa. O da uşaqlığı həmin torpaqlarda keçən insanların xatirələridir. Tanınmış klarnet ifaçısı Zahid Qubadlı kimi...

- Zahid bəy, il ərzində az hallarda müsahibə verirsiniz, onun da biri 31 avqusta-Qubadlının işğal gününə təsadüf edir...

- Buna müsahibə deməzdim. Sanki içimdə Qubadlım, Xanlıq kəndi haqda danışmaq ehtiyacı duyuram. Tez-tez həmkəndlilərimlə, qardaşlarımla bu barədə söhbətlərim olur. Amma danışmaq təsəllidən başqa bir şey deyil.

- Müsahibələrinizin birində qeyd etmişdiniz ki, içimdə bir nisgil, kədər var və ona görə doğum günlərimi təmtəraqlı qeyd etmirəm.

- Bəli, demişəm. Bu il qırx yaşım tamam oldu. Sağ olsun, Qubadlı rayonunun icra hakimiyyətini başçısı Malik İsaqov. Doğum günümdə icra hakimiyyətində oldum, məni fəxri fərmanla təltif elədi. Əslində, bunun öz diqqətdən savayı, həm də təsəllidir. Soyadım Rəhimzadədir, "Qubadlı" təxəllüsünü götürməyimlə də özümə təsəlli verirəm.

- Qubadlı deyəndə ilk ağlınıza gələn nə olur?

- Mənim bütün uşaqlıq xatirələrim Qubadlıyla bağlıdır. 17 yaşıma kimi Qubadlıda olmuşam. Bunu bir neç dəfə demişəm. Hərdən düşünürəm ki, ruhum 17 yaşımdadır. Sanki bütün xatirələrim də orayla bağlıdır.

- İstərdim bir az da yaradıcılıqdan danışaq. Nə yeniliklər var?

- Bir neçə gün öncə əfsanəvi sənətkar Habil Əliyevin "İlk məhəbbət" bəstəsini ifa etmişəm. Tam təbii ifadır, sintezatorun, digər alətlərin köməyi olmadan ifa etmişəm. İstədim ki, sənətkarın adına layiq bir iş görüm. Dinləyənlər pis alınmadığını deyirlər. İnşallah, həmin bəstənin klipi də nəzərdə tutulur. Hər halda son sözü tamaşaçı deyəcək.

İntiqam VALEHOĞLU
Ölkə.Az