Radanın "adamuşka"sızlığı və 25 kvadratmerlik kirayələr

Bəlkə də bu dəfəki "hədəf"imiz kimlər üçünsə "müzakirə obyekti" olacaq, kimlərsə "onun ad almağı çox tezdir" deyəcəklər, bəziləri düşünəcəklər ki, sifarişlidir və sair. Yazısonrası bütün ittihamlara bir cümləylə cavab verirəm-bütün ittihamlar qarşısında vicdanım təmizdir.

İndi isə keçək "hədəf"imizə.

Rada Ziyad qızı Nəsibova 29 oktyabr 1982-ci ildə Gəncə şəhərində anadan olub. 2001-ci ildə Azərbaycan Dövlət Mədəniyyət və İncəsənət Universitetinin kulturologiya fakültəsinə daxil olub, 2005-ci ildə oranı prodüserlik ixtisası üzrə fərqlənmə diplomu ilə bitirib.

2002-2007-ci illərdə Cəfər Cabbarlı adına İrəvan Dövlət Azərbaycan Dram Teatrında aktrisa vəzifəsində çalışıb, 2007-ci ildən indiyədək Azərbaycan Dövlət Akademik Milli Dram teatrının aktrisası olaraq fəaliyyət göstərir.

Bu, Rada Nəsibovanın qısaca tərcümeyi-halı idi. Yeri gəlmişkən, 2002-ci ildən filmlərə çəkilən Nəsibova bu müddət ərzində iyirmiyə yaxın filmdə irili-xırdalı obrazlar yaradıb.

Rada Nəsibova da ötən yazımızın "hədəf"i Rövşən Kərimduxt kimi iddialı fiqur hesab edilmir. Məsələn, İsrafil İsrafilovun direktorluğu dövründə yardımçı heyətə göndərilən aktrisa bu gün də teatrın əsas heyətində deyil. Heç Azərpaşa Nemətovun da yadına düşməyib ki, istedadlı aktrisanı əsas heyətə qaytarsın. Bunun özü özlüyündə haqsızlıq olmaqla bərabər, həm də teatrın itkisidir. Bəlkə Radanın yardımçı heyətdə olmasının itki kimi təqdim edilməsi çox böyük səsləndi. Hər halda, əsas heyətdə olanların, fəxri ad alan tay-tuşlarının heç birindən əskik deyil. Nə sənətdə və xüsusən də sənətdən kənar olan digər məsələlərdə. Bir anlıq düşünün ki, eyni haqsızlığı başqa bir aktrisaya edirlər. Sizcə neçə sayta, qəzetə müsahibə verib car çəkərdi?

Bəlkə Nəsibova indi hansısa region teatrında ayda 1-2 dəfə işə getməklə məvacibini ala, 1-2 rol oynamaqla əməkdar artist ola bilərdi. Necə ki, ölkənin bir sıra region teatrlarında orta təhsilli xalq artistləri var. Və adətən bu məsələ ortaya gətirilən kimi hamı "filan xalq artistinin də ali təhsili yox idi" "arqumenti" işə düşür. Amma anlamırlar ki, özləri həmin xalq artistinin, əfsanənin səhnəyə çıxarkən ayağından qopan toz deyillər.

Aktyor, aktrisa, səhnə adamı tamaşaçının qarşısına bütün hallarda xoş, gülərüz, baxımlı çıxmağa məcburdu. Elə Rada da həmçinin. Amma tamaşaçı bilirmi ki, Rada Nəsibova illərdi Bakının darısqal kirayələrində gəncliyini qurban verir. Xəstə anasına baxır, sənətiylə məşğul olur, problemlərini təkbaşına həll edir. Və ən əsası... Bütün bunları "filankəsin "adamuşkası" statusuyla etmir. Yəni, bir az da lorulaşdırsaq, kiminsə yanında gözükölgəli deyil. Bəlkə elə buna görədir ki, nə rejissorlar, nə işlədiyi direktorlar heç vaxt ona "pis gözlə" baxa bilməyiblər. Bəlkə kiminsə "adamuşkası" olmadığı üçündür ki, bu gün Nəsibova 20-25 kvadratmerlik kirayələrin daimi sakinidir.

Bəlkə yox, doğrudan da belədir. Və o, bunu tək özü üçün yox, həm də sənət üçün edir. Dediyim kimi, istənilən region teatrında gün keçirib, elə həmin məvacibi də almaq olar, daha ucuz kirayədə yaşamaq da...

Şəxsən mənə görə R.Nəsibovanın fəxri ad alıb-almaması o qədər də önəmli deyil. Səməndər Rzayevin əməkdar artist kimi öldüyü sənətdən nə desən gözləmək olar. Amma heç olmasa o fəxri adın qazandırdığı aylıq 60 manat var ki, bax, Nəsibovanın buna məncə, daha çox ehtiyacı var, nəinki o fəxri adın özünə.

İntiqam VALEHOĞLU
Ölkə.Az