Musiqi məktəbindən iddialara cavab
Xətai rayonu 30 saylı 7 illik musiqi məktəbiylə bağlı saytımızda dərc edilmiş "Direktor məktəbə içkili gəlir, ya da gəlib məktəbdə içir" — QALMAQAL" başlıqlı yazıya qarşı tərəf mövqeyini bildirib.
Məktəbin direktoru Yusif Məmmədov redaksiyamızla əlaqə saxlayaraq, kollektiv barədə xoşagəlməz (qeyri-etik olduğundan həmin ifadələri bura yaza bilmirik) ifadələr işlətdikdən sonra kollektiv adından göndərilən məktubu olduğu kimi diqqətinizə çatdırırıq.
Hörmətli redaksiya.
Biz, 30 nömrəli UMM-nin müəllim heyəti Ölkə.az saytında dərc olunan məqalədən hiddətlənərək kollektiv imzaladığımız məktubumuzu Sizə təqdim edir və onun dərc edilməsini artıq dərəcədə xahiş edirik.
İlk növbədə bilmək istərdik ki, bu materialı dərc etməzdən əvvəl niyə qeyd olunan faktlar yoxlanılmayıb. Heç olmasa telefonla bəzi faktları müəyyənləşdirmək mümkün olardı.
Keçək əsas məsələlərə.
* Qeyd olunan bir qrup müəllimin adından yazılan materiallarda niyə soyadlara və ixtisaslara istinad edilmir? Biz isə öz soyadlarımızı və ixtisaslarımızı qeyd edərək imzalarımızla təsdiq edirik.
* Direktorun sərxoş halda işə gəlməyi və işdən tez getməyi məsələsi cəfəngiyatdır. Yazıb bildiririk ki, Azərbaycan Respublikası Mədəniyyət və Turizm Nazirliyi, Bakı Şəhər Mədəniyyət və Turizm Baş İdarəsi və Yerli İcra Hakimiyyəti orqanları tərəfindən tədris ilinə hazırlıqla bağlı saysız-hesabsız baxışlar, yoxlamalar və s. ilə yanaşı Baş İdarə tərəfindən nizam-intizam məsələlərinə ciddi nəzarət edilir, gözlənilmədən idarəyə çağırışlar və qəfil yoxlamalar edilir.
* 20 manat həcmində pul yığılmaq barədə yazdığınız isə dərs günü başlamamış (material 14 sentyabrda dərc olunub) və şagirdlər məktəbə gəlməmiş necə yığıla bilər?
* 5 manat məsələsinə gəldikdə isə qışa hazırlıqla əlaqədar, pəncərələrin təmiri üçün bu pulun yığılması təklifi müəllimlər tərəfindən verilmişdir və xüsusi ilə qeyd edilmişdir ki, bu mütləq deyil, həcm məsələsinə gəldikdə isə könüllü imkan daxilindədir.
* Qara siyahı və dərs bölgüsünə gəldikdə isə, Sizə bildiririk ki, bu məsələlər həm Nazirlik tərəfindən, həm də Bakı Şəhər Mədəniyyət və Turizm Baş İdarəsi tərəfindən ciddi surətdə nizamlanır və təsdiq olunur.
Məlumat üçün bildiririk ki, məktəbin direktoru Yusif Məmmədov cəmi 6 aydır ki bu vəzifəyə təyin olunub.
Hörmətlə 30 nömrəli UMM-nin müəllim heyəti
