Azərbaycanlı rəssamın əsərləri Luvrda sərgilənəcək

Azərbaycanlı rəssam Ellada İsmayıl 21-23 oktyabr tarixləri arasında Luvrda keçirələcək beynəlxalq sərgiyə dəvət edilib.

Sərgidə rəssamın 4 əsəri nümayiş ediləcək. Fransada keçiriləcək sərgiyə dünyanın ən məşhur rəssamları, beynəlxalq sərgilərdə iştirak etmiş çox fərqli spektr yaradıcılığı olan rəssamlar dəvət edilib. Ellada İsmayıl dəvətdən məmnun qaldığını və sərgidə Azərbaycan koloritlərini göstərmək istədiyini qeyd edib.

Ellada İsmayıl uşaqlıqdan rəsmə böyük həvəs göstərib. Daha sonra bu həvəsi sənətə çevirmək üçün əvvəlcə Əzim Əzimzadə adına rəssamlıq məktəbində, sonra isə Azərbaycan Dövlət Rəssamlıq Akademiyasında təhsil alıb. O, əsasən impressionizm üslubunda işləyib. Bu günə qədər bir çox rəsm əsərinin müəllifidir.

Türkiyə, Rusiya, Gürcüstan Almaniya və Portuqaliyada təşkil edilən peşəkar sərgilərdə çıxış edib və əsərləri bir çox kolleksiyalarda saxlanılır.

"Salon biznes-art-2016" adlı beynəlxalq festival Luvrun "Karusel dyü Luvr" sərgi zalında keçiriləcək.

Xatırladaq ki, "Salon biznes-art" sərgisi əvvəllər Pyer Karden Mərkəzində keçirilirdi.