Ağalar Məmmədovun kitabı rekord qırdı
Filosof Ağalar Məmmədovun ilk dəfə 2012-ci ilin dekabr ayında işıq üzü görən "AŞMA: fəlsəfi məqalələr və müsahibələr toplusu” ikinci dəfə çap edilib
"Qanun Nəşrlər Evi"nin çap etdiyi kitab ilk satış mərhələsini uğurla başa vurub.
Ölkə.Az xəbər verir ki, oxucuların geniş marağı nəzərə alınaraq kitabın genişləndirilmiş II çapını gerçəkləşdirib. Bu dəfə kitabın tərtibatı və keyfiyyəti daha yüksək səviyyədə hazırlanıb.
Kitabda bütövlükdə 80-dən çox fəlsəfi məqalə və 4 müsahibə yer alıb. Kitabda “Fəlsəfə işığında dil”, “Kulturo-etik yazılar”, “İslamın çadrasız üzü”, “Zaman, allah-insan, ölüm”, “Siyasi-ideoloji yazılar” kimi 10-dan çox əsas başlıq yer alıb.
"AŞMA: fəlsəfi məqalələr və müsahibələr toplusu” Dalğa Gənclər Hərəkatının (Dalğa GH) təşəbbüsü ilə çap edilmişdir. Kitab məqtul (qətl edilmiş) yazıçı-pubilisist Rafiq Tağının xatirəsinə həsr olunub. Kitabda Dalğa GH-nın fəaliyyəti barədə də məlumat verilməklə yanaşı, Dalğa GH-nın həmtəsisçisi, Azərbaycan Avropa Hərəkatının prezidenti Ramin Hacılının ön sözü də Rafiq Tağı və müəllifin baxışları istiqamətindədir.
"Aşma"nın genişləndirilmiş II nəşrinin məhz "Aşura" günü çapdan çıxması hansısa mesajdan xəbər verirmi? Nələri aşmalıyıq? Müəllif oxucuları nəyə səsləyir? Aşuraya qarşı Aşma?! Buna “Aşma”nın gücü çatacaqmı? Bütün bu kimi suallara kitabı alıb oxuyanlar qərar verə bilərlər...
Qeyd edək ki, kitabın II nəşrinə müəllifin I nəşrdə çap olunmayan 1 məqaləsi və 1 müsahibəsi də daxil edilib.
“Aşma”nı şəhərin bütün kitab mağazalarından əldə etmək mümkündür.
Fatimə İbrahimova
Ölkə.Az
