Videosu könülləri fəth etdi: "Möcüzə ilə sağ qalmışam... İtlərə sevgimin hekayəsi..." - MÜSAHİBƏ

Ölkə.Az heyvansevər R.Namazovla söhbətləşib:

- Heyvan sevgisi sizdə nə vaxtdan başladı?

- Bu sevgi məndə başıma gələn bir hadisədən sonra yaranıb. İllər əvvəl taksi fəaliyyətilə məşğul olduğum günlərdən birində bir kişi müştərim vardı. 30 ildir heyvanlara baxan bu şəxs məndən 2 gün heyvanlara yemək verməyi xahiş elədi. Dedi ki, taksi pulunu ödəyəcəyəm. Mən də onlara 2 gün yemək verdim və daha sonra ayrıla bilmədim. Hələ də həmin adam heyvanları yemləyir. Bu hadisə təxminən 10 il əvvəl olub.
Heç bu barədə uzun müddət çəkib paylaşmamışam. Uşaqlarımla, ailəmlə birgə heyvanların yanına gedir, onları yemləyirdik. Sonradan belə qərara gəldim ki, çəkib paylaşım, yardım etmək istəyənlər məlumatlansınlar.

- Ümumilikdə nə qədər itə baxırsınız?

- 600 itim var. Bu itlərə ancaq Sumqayıtda zavodların ərazisində baxıram.

Artıq 1000-ə yaxın heyvanın həyatını xilas etmişəm. Tikə-tikə olan itləri sağaltmışam. Çoxusu ölümə məhkum edilmiş balalardır.

Bu dəqiqə Şəkidən və Tovuzdan it gələcək. Görsəniz, dəhşətə gələrsiniz. Yəni pis vəziyyətdə olan itləri bir aya sağaldıb təhvil verirəm. İndi 10 bidon su alıb gedirəm fermadan da yemək doldurub aparım onlara.

İstəsəniz, bir gün gəlin, sizi qucaqlasınlar, bağırlarına bassınlar, ondan sonra dünyalar sizin olacaq. 

- Dediniz ki, illərdir heyvanlarla məşğul olursunuz. Nə üçün bu vaxta qədər sığınacaq yaratmamasınız?

- Sığınacaq olmasa da, 80-90 nəfərdən ibarət heyvansevər qrup yaratmışam. O qrup vasitəsilə yardımlaşırıq. Kim küçədə köməksiz heyvan görürsə, xəbər edir, o heyvanı ayağa qaldırırq. Yəni bu işdə tək deyiləm. Mənim kimi 90 nəfər insan var.

- İnsanlar yardım edəndə yığılan pulların hara xərclənməsi ilə bağlı narahatlıqları olurmu?

- 90 nəfərin içərisidə 2 nəfər ayrılıb ki, pulların nəyə xərcləndiyini yazır. Məsələn, bu gün qısırlaşdırılmaq üçün 10 it göndərmişik. Dünən də göndərmişdik.
Əgər qrupda bir aya 2000 pul yığılırsa, ay ərzində xərclənən pul 6 min olur. O pulun 4000 minini mən qoyuram. Bu pulları da 1 manat, 50 qəpik və s. köməklik edənlərin sayəsində yığırıq. 

Nəinki o pullar, hətta "TikTok"dan atılan hədiyyələri də onlara xərcləyirəm. Həftədə bir dəfə 2 saat canlı yayım açıram. Kimsə gül atıbsa, hər həftənin altı bazar günü o hədiyyələrlə heyvanlara 200 manatlıq bazarlıq edirəm.

- Dolanışığınızı yalnız taksi fəaliyyətilə məşğul olmaqla təmin edirsiniz?

- 15 ildən çoxdur taksi sürücüsü işləyirəm, bir də şagirdləri məktəbə aparıb gətirirəm. 4 övladım var. Pensiyamla uşaq oxuduram. 300 manat maaş alıram, heyvansevər olduğuma görə, "premiya" da verirlər. Yoldaşım da şükür ki, işləyir, anam da pensiyaçıdır. Yəni heyvanlar üçün yığılan pula ehtiyacım yoxdur.

- Hər zaman belə bir fikir səsləndirilir ki, heyvanlar insanlardan daha sədaqətlidir, edilən yaxşılığı unutmurlar...

- Bunu dillə ifadə etmək mümkün deyil. O situasiyanı yaşasanız bilərsiniz. Mən maşınla ərazinin bir kiometr uzağından da keçsəm, qaçacaqlar ki, başlarına bir dəfə də olsa, tumar çəkim. Az qalır, mənə yaxın gəlmək üçün növbəyə dursunlar.

Ötən gün dəniz kənarından 7-8 bala tapmışam. Duzlu su içib ölürdülər. Aparıb altlarına xalça salmışam, zavodun həyətində yer tapmışam. Mən onun 8 balasını xilas eləmişəm. 12 balanı maşının altından çıxarmışam. Qışdan yaya 80 heyvanı sağ çıxardım. Yarım metr qarda getdim onlara yemək verdim. Niyə çox istəməsin? Elə olub ki, itin boğazına daş bağlayıb zirzəmiyə atıblar, suyun içindən çıxarmışam.

Axşam zibil yeşiyinin içərisindən 4 bala pişik çırmışam. Gözləri açılmamış balaları zibil yeşiyinə atıblar. Bəs dünya dağılmasın neyləsin? 

Allahın möcüzələri də mənə çox olur.

- Məsələn, necə bir möcüzə?

- Bir dəfə maşınımın təkərinin boltlarını açmışdılar. Bir boltla Qazaxa gedib yarıdan qayıtmışam. Hamı şoka düşüb ki, sənin bir boltla getməyin mümkün deyildi, yolda ölməli idin. İtin mənimlə ağlayıb danışmağı olub, videolar da var.

- Dediniz, heyvanları sağaldırsınız. Baytarlıq təhsiliniz varmı?

- Düzü, heç bir anlayışım yoxdur. Sadəcə, yaxşı həkim dostlarım var, onlara müalicə yazdırıram. Bu dəqiqə baytar 8 itə sistem qoşub. İnsanların verdiyi pullar onlara gedir. 
Hazırda banka borcum da var. Pulum çatmayıb, gedib kredit götürmüşəm. Təkəri nisyə götürmüşəm, amma demişəm ki, təki heyvanların qarnı doysun.

- Son olaraq nə demək istərdiniz?

- Heyvanlara rəhmsiz davranmasınlar. Dünən məktəbdən şagird gətirməyə getmişdim. 6 it orada dayanıb. Uşaqlar daşlayıb, heyvanlar da uşağın üstünə cumub. Hərə əlinə bir kürək alıb itlərin üstünə gedirdi. Onlara ağzıma gələni dedim. O heyvan durduq yerə kimə neyləyir? Valideyn tərbiyəsi çox önəmlidir. Bir qocalar, bir də uşaqlar heyvanara qarşı aqressiv davranırlar. Qocaların beynini necə doldurublarsa, elə bilirlər biz qatilik. Onlara yemək verib sevgilərini qazananda qatil oluruq.

Billurə Yunus