Türkiyədə həbslər davam edəcək

Ölkə.Az xəbər verir ki, istintaq çərçivəsində "HDP"-nin İstanbul millət vəkili Hüda Kaya Afyon şəhərində saxlanılıb. Eyni zamanda partiyanın Adana üzrə təmsilçisi deputat Meral Danış Beştaş isə Diyarbəkirdə saxlanılıb. Siyasi ekspertlər isə hesab edirlər ki, belə həbslər hələ də davam edəcək.

Politoloq Arzu Nağıyev Ölkə.Az-a açıqlamasında bildirib ki, “HDP" məhz terrorla əlaqəsi olduğuna görə, PKK ilə əlaqəli olduğuna görə ümumiyyətlə gərək bunu parlementə buraxmayaydılar. Onun fikrincə, həmin vaxtlar demokratiyanı, humanizmi siyasətdən üstün tutaraq belə bir addım atdılar.

“Bunun nəylə nəticələndiyi isə artıq göz qabağındadır. Demək olar ki, bütün terror hadisələrində, dövlət əleyhinə olan çıxışlarda birinci növbədə bu partiya oldu. Məlum məsələdir ki, həmin partiya məhz PKK-nın havadarları tərəfindən maliyyələşdirilir. Onların əsas məqsədləri Türkiyədə hakimiyyətə gəlməkdir. Hətta 15 iyul hakimiyyətin çevrilişinə cəhd vaxtı da bütün partiyalar bunu pislədi, təkcə "HDP" bunu dəstəklədi”, - deyə A.Nağıyev bildirib. 

Politoloq düşünür ki, bu gün müəyyən qüvvələr üçün bu partiya bir vasitədir və bu vasitədən istifadə olunur:

“Düşünürəm ki, Türkiyə xüsusi xidmət və hüquq-mühafizə orqanları çevrilişlərlə bağlı apardığı bir sıra əməliyyat axtarış fəaliyyətlərində özünü biruzə verən partiyalardan biri "HDP"-dir. Bu həbslər davam edəcək. Əsas qorxu ondan ibarətdir ki, bu qüvvələr terrorçularla birbaşa əlaqəlidirlər. Bunların həbsi gerçəkləşdikcə, xüsusi xidmət orqanları təhlükəsizlik məsələsini və dövlətə, dövlətçiliyə təhdidin qarşısını almaq üçün paralel addımlar atılmalıdır”.

Ziya Səccad
Ölkə.az