\"Allah mənə övladım Mehranın xoş gününü görməyi nəsib etsin”

İfaçı özəl günündə "Ölkə.Az"-ın əməkdaşının suallarını cavablandırıb. O, ilk təbrikini yaxın dostundan aldığını deyib:

“Ad günümdə ilk təbriki gecə saat 12-də neçə illər çiyin-çiyinə çalışdığım, yaxın dostum Mədinə Məlikdən almışam. Bundan başqa həyat yoldaşım, oğlum və digər ailə üzvlərim, sənət dostlarım da məni təbrik etdi”.

Əməkdaşımızın “Təbrikini gözlədiyiniz, ancaq sizi yada salmayan insan varmı?”,- sualına o, hər zaman diqqət mərkəzində olduğunu və heç bir zaman unudulmadığını söyləyib.

“Məni təbrik edən və etməyən bütün insanlara can sağlığı arzulayıram. Mənim xoş günümdə məni yada salan çox insan var. Sosial şəbəkələrdəki dostluğumda olan insanlar da məni təbrik edib, xoş arzularını yazıblar. Ümumiyyətlə, məni təbrik edən tanıdığım, tanımadığım hər bir insana təşəkkürümü bildirirəm”.

N.Əzizbəyli həyatının yeni ilində özünə ən əsası cansağlığı arzu etdiyini deyib. “Özümə ən birinci möhkəm can sağlığı, güc, qüvvə arzu edirəm. O olduqdan sonra hər şey yerli-yerində olur. Bir də arzu edirəm ki, Allah mənə yeganə övladım Mehranın ali təhsil almasını, toyunu, xoş gününü görməyi nəsib etsin”,- deyə o, qeyd edib.

Sonda müğənni evinin tezliklə təmir ediləcəyini də bildirib. “Dövlət mənim ev problemimlə yaxından maraqlandı. Sağ olsun, millət vəkili Qənirə Paşayeva ilk gündən mənə dəstək oldu. Buna görə ona sonsuz təşəkkürümü bildirirəm. Bir- iki gündən sonra evim təmirə bağlanacaq və biz müvəqqəti olaraq kirayə mənzilə köçəcəyik”. Qeyd edək ki, müğənni Nurlan Əzizbəyli 1977 - ci ildə Bakı şəhərində anadan olub. Ailəlidir 1 övladı var. O, Xalq artisti, kinorejissor, aktyor Ramiz Əzizbəylinin qardaşı oğludur.

Vüsalə Balayeva

Ölkə.Az