Anatoli Peşko: “Xoşbəxtsiniz ki, Azərbaycanın bu cür prezidenti və hökuməti var”
Ukrayna siyasətçiləri və mediası mütəmadi olaraq, COVID-19-la savadlı mübarizə baxımından Azərbaycanı ölkəmiz üçün nümunə kimi qeyd edirlər. Niyə Azərbaycan bu sahədə uğur qazanır, amma Ukraynada vəziyyət belə deyil? Ukraynalı mütəxəssislər bunu araşdırırlar.
Media.Az Ukraynanın məşhur ictimai və siyasi xadimi, tibb elmləri namizədi, iqtisad elmləri doktoru, akademik Anatoli Peşkodan vəziyyəti şərh etməsini istəyib.
- On minlərlə ukraynalı əmək miqrantının Polşa-Ukrayna sərhədindən keçməsi ilə bağlı kadrlar, Kiyevin “Borispol” hava limanında insanların maneədən necə keçdiyi barədə videolar bütün dünyaya yayıldı. Niyə Avropa ölkəsi olan Ukraynada (Avropa kursu hətta qanunvericiliklə təsdiqlənib), heç olmasa ölkəyə qayıdan vətəndaşlarını yoxlamaq və karantinə almaqla koronavirusla bağlı vəziyyətə nəzarət etmək mümkün olmur?
- Bilirsiniz, biz Ukraynanın Avropa olduğunu deməyi sevsək də, əslində, hər şey belə deyil. Biz hətta Avropanın kandarında da deyilik. Təəssüf ki, Ukraynanı yalnız Afrikanın ən geridə qalmış ölkələri ilə müqayisə etmək olar. Biz unudulmuş, bədbəxt bir dövlətik. Bu barədə danışmaq mənim üçün ağırdır, amma fakt faktlığında qalır.
Koronavirusa gəlincə, yaratdığı təhlükəni minimuma endirmə düşüncəsi olmadan qeyd etmək istəyirəm ki, maraqlı tərəflər COVID-19-dan öz məqsədləri üçün istifadə edirlər. Gərginlik süni şəkildə uzadılır. İnfeksiya təqdim edildiyi qədər də ölümcül deyil. Ötən illərdə daha təhlükəli - SARS, MERS virusları var idi. Lakin virus hay-küyü altında qanunvericiliyin pozulması ilə “Torpaq bazarının açılması haqqında” qanun qəbul edildi.
Dünya hökumətlərinin reaksiyasına gəldikdə isə, elan olunan pandemiyaya Azərbaycanda olan reaksiyanı bəyənirəm. Azərbaycanda xalqın maraqlarını düşünən milli hökumətinizin olması sizin xoşbəxtliyinizdir. Prezidentiniz İlham Əliyev ölkədə həyatın yaxşılaşdırılmasına çalışır. Bizdə - Ukraynada hər şey fərqlidir.
- Prezident Vladimir Zelenski bir müddət əvvəl demişdi ki, Azərbaycan Ukraynaya yardım edə bilər...
- Ukraynalılar buna görə minnətdar olacaqlar. Bu yardımın birbaşa Ukrayna xalqına, cəmiyyətimizə istiqamətlənməsni istərdim.
