KORONAVİRUSA YOLUXANLARIN SAYI - CANLI STATİSTİKA

“Azərbaycan Prezidenti ilə Paşinyan arasında əlaqə kanalı yoxdur” — Hikmət Hacıyev

“Azərbaycan Prezidenti ilə Paşinyan arasında əlaqə kanalı yoxdur”
15:10
01.08.2020
498
Siyasət
A
Bu yaxınlarda Azərbaycan-Ermənistan dövlət sərhədi ərazisinin Tovuz bölgəsində baş verən eskalasiya erməni təxribatının nəticəsi idi. Bu hərbi avantürası ilə rəsmi İrəvan qarşıya bir sıra məqsədlər qoydu. Onları şərti olaraq daxili və xarici məqsədlərə bölmək olar.

"Ölkə.Az" xəbər verir ki, bunu Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Ermənistan silahlı qüvvələrinin 12 iyul tarixində Azərbaycan-Ermənistan sərhədinin Tovuz rayonu istiqamətində törətdiyi hərbi təxribatla bağlı Rusiyanın "Milli müdafiə" jurnalının avqust buraxılışına verdiyi müsahibədə deyib.

Hikmət Hacıyevin sözlərinə görə, daxilə yönəlmiş məqsəd Ermənistandakı çətin siyasi və sosial-iqtisadi, həmçinin COVID-19 ilə bağlı acınacaqlı vəziyyət fonunda pisləşən durumdur.

"Bildiyiniz kimi, 2018-ci ildə Paşinyan Ermənistan xalqına verdiyi populist vədlər dalğasında hakimiyyətə gəldi. Lakin zaman göstərdi ki, onun hökuməti bu vədləri yerinə yetirmək, ölkədə həyatı yaxşılığa doğru dəyişmək iqtidarında deyil. COVID-19 ilə bağlı vəziyyət Ermənistan hökumətinin səmərəsizliyini əyani şəkildə göstərdi. Buna görə artan çətinliklər fonunda Paşinyan hökuməti əhalinin diqqətini daxili problemlərdən yayındırmağa çalışdı".

H.Hacıyev xarici səbəblər arasında Azərbaycanın beynəlxalq aləmdəki böyük uğurlarını qeyd edib.

"Beynəlxalq mövqelərimizi gücləndirməyimiz, xüsusilə Ermənistan-Azərbaycan, Dağlıq Qarabağ münaqişəsi və Azərbaycanın ərazi bütövlüyünə dəstək Ermənistanda qısqanclıq yaradır. Bu fonda, dağıdıcı siyasət yürüdən, Azərbaycan ərazilərinin işğalını davam etdirən Ermənistan yeni bir gərginlik ocağı yaratmaqla, beynəlxalq ictimaiyyətin diqqətini Dağlıq Qarabağdakı və digər işğal olunmuş ərazilərdəki vəziyyətdən yayındırmağa çalışır, lakin bu dəfə Azərbaycan-Ermənistan dövlət sərhəddində.

Bu cür təxribatlarla rəsmi İrəvan Azərbaycanın guya Ermənistan ərazisinə hücumlar etdiyi və üzvü olduğu hərbi-siyasi təşkilatları Ermənistan-Azərbaycan münaqişəsinə cəlb etməklə bağlı rəy yaratmağa çalışır.

Bundan əlavə, Ermənistanın hədəfləri arasında neft və qaz boru kəmərləri, "Şərq-Qərb" kimi strateji beynəlxalq layihələrə təhlükə yaratmaq var idi. Əminliklə deyə bilərik ki, Ermənistan məqsədlərinə çatmadı və təxribatı tam fiaskoya çevrildi".

PA rəsmisi, həmçinin deyib ki, döyüşə ilk başlayan Ermənistan silahlı qüvvələri idi. İyulun 12-də artilleriyalarından istifadə edərək Azərbaycan Ordusunun mövqelərinə hücum etdilər. Bu hücum cavab atəşi ilə dəf edildi.

“Xüsusilə vurğulamaq istəyirəm ki, Azərbaycanın Ermənistanla dövlət sərhədində heç bir hərbi planı və hədəfi yoxdur. Demilitarizasiya məqsədi ilə Ermənistanla sərhədin bu hissəsinin qorunması Azərbaycanın sərhəd qoşunlarına tapşırılıb. Azərbaycan-Ermənistan dövlət sərhədində eskalasiya Azərbaycanın maraqlarına cavab vermir. Əksinə, qeyd etdiyim kimi, bu sektorda gərginlik ocağının yaranması Ermənistanın maraqlarına uyğundur".

Bundan əlavə, Prezidentin köməkçisi Ermənistanın baş naziri Nikol Paşinyanın Bakı ilə İrəvan arasında xüsusi rabitə xəttinin yaradıldığı və bunun vasitəsilə lazım gələrsə, yaranmış silahlı insidenti həll etmək üçün Azərbaycan rəhbəri ilə əlaqə saxlana biləcəyinə dair fikirlərinə aydınlıq gətirib.

“Azərbaycan Prezidenti ilə Ermənistanın baş naziri arasında belə bir əlaqə kanalı yoxdur. İki ölkənin səlahiyyətli nümayəndələri arasında müəyyən bir rabitə kanalı var. Təcrübə göstərdi ki, Ermənistanla əlaqəli amillər, xüsusən də İrəvanda daimi kadr sıçrayışı nəticəsində bu rabitə kanalı praktiki olaraq təsirsizdir. Əslində əlaqə saxlayacaq heç kim yoxdur. Bu, bir daha erməni tərəfinin hərəkətlərində səmimi olmadığını sübut edir”.

H.Hacıyev vurğulayıb ki, 12 iyul döyüşləri zamanı Azərbaycan Ordusu ərazi bütövlüyünün qorunmasını, dövlət sərhədinin toxunulmazlığını və ölkə vətəndaşlarının təhlükəsizliyini təmin edib: "İnanırıq ki, bu, "yeni ərazilər üçün yeni müharibə" arzusunda olanlara yaxşı dərs olacaqdır".

Prezidentin köməkçisi Azərbaycanın Dağlıq Qarabağ məsələsinin ədalətli həlli üçün necə hərəkət etmək niyyətində olduğunu da açıqlayıb. O deyib ki, Azərbaycan, Ermənistan-Azərbaycan, Dağlıq Qarabağ münaqişəsinin siyasi və diplomatik həllinə sadiq qalır. Ancaq danışıqlar naminə danışıqlar qəbul edilmir.

"Münaqişənin həlli üçün Azərbaycan ərazilərinin işğaldan azad edilməsi məsələlərinin müzakirəsi məqsədi ilə ATƏT-in Minsk Qrupu çərçivəsində əsaslı danışıqlar tələb olunur.

Azərbaycan Ermənistanın işğalçı qüvvələrinin Dağlıq Qarabağdan və ona bitişik rayonlardan çıxarılmasını və məcburi köçkünlərin öz torpaqlarına təhlükəsiz şəkildə qaytarılmasını tələb edir. Öz növbəsində, beynəlxalq ictimaiyyət təcavüzkar bir ölkə kimi Ermənistana beynəlxalq səviyyədə tanınan sərhədləri güclə dəyişdirməyin yolverilməz olduğuna dair açıq siqnal verməlidir.

Sonda bir daha Azərbaycan Respublikasının Prezidenti İlham Əliyevin Valday Beynəlxalq Müzakirə Klubunun plenar iclasında söylədiyi mövqeyi səsləndirmək istərdim: "Qarabağ Azərbaycandır və nida!".
 

ŞƏRH YAZ
0

MTRŞ ARB və "Xəzər" TV-ni cəzalandırdı

MTRŞ ARB və
18:58
Bu gün
44
Siyasət
A

Milli Televiziya və Radio Şurasının (MTRŞ) videoformatda iclası keçirilib.

MTRŞ-dan "Ölkə.Az"a bildirilib ki, iclasda 1-10 avqust 2020-ci il tarixlərində ümum-ölkə televiziya kanallarının monitorinqinin nəticələri müzakirə olunub.

5 avqust 2020-ci il tarixdə “Xəzər” televiziya kanalının efirində saat 18.00 – 19.00 arası müddətdə 16 dəqiqə 50 saniyə reklam yayımlanması ilə “Televiziya və radio yayımı haqqında” Azərbaycan Respublikasının Qanununun 35.7-ci maddəsinin tələbləri pozulub. Şura həmin Qanunun 23.1-ci maddəsini rəhbər tutaraq “Xəzər” televiziya kanalının efirində 23 avqust 2020-ci il tarixdə proqramların yayımının 3 saatlıq müddətədək (saat 08:00-dan saat 11:00-dək) dayandırılması haqqında qərar qəbul edib.

Həmçinin, 8 avqust 2020-ci il tarixdə “ARB” televiziya kanalının efirində saat 09.00 – 10.00 arası müddətdə 16 dəqiqə 20 saniyə reklam yayımlanması ilə “Televiziya və radio yayımı haqqında” Azərbaycan Respublikasının Qanununun 35.7-ci maddəsinin tələbləri pozulub. Şura həmin Qanunun 23.1-ci maddəsini rəhbər tutaraq “ARB” televiziya kanalının efirində 17 avqust 2020-ci il tarixdə proqramların yayımının 3 saatlıq müddətədək (saat 08:00-dan saat 11:00-dək) dayandırılması haqqında qərar qəbul edib.

ŞƏRH YAZ
0

Ceyhun Bayramov yeni səfirin etimadnaməsini qəbul etdi

Ceyhun Bayramov yeni səfirin etimadnaməsini qəbul etdi
18:56
Bu gün
51
Siyasət
A

Avqustun 14-də Xarici İşlər naziri Ceyhun Bayramov Yaponiyanın Azərbaycan Respublikasına yeni təyin olunmuş səfiri Cuniçi Vadanı qəbul edib.

Nazirlikdən "Ölkə.Az"a verilən məlumata görə, C.Vada etimadnaməsinin surətini nazir Ceyhun Bayramova təqdim edib.

C.Bayramov Cuniçi Vadanı Azərbaycana səfir təyin olunması münasibətilə təbrik edib və ona gələcək fəaliyyətində uğurlar arzulayıb.

Görüşdə Azərbaycan və Yaponiya arasında ikitərəfli münasibətlərin müxtəlif sahələrdə uğurlu inkişafı qeyd olunub. Xüsusilə siyasi, iqtisadi, mədəni, turizm, kənd təsərrüfatı, təhsil və digər sahələrdə əməkdaşlığın cari səviyyəsindən məmnunluq ifadə edilib və əlaqələrin daha da inkişaf etdirilməsi üzrə fikir mübadiləsi aparılıb.

C.Bayramov Ermənistan-Azərbaycan Dağlıq Qarabağ münaqişəsi ilə bağlı Yaponiya səfirinə məlum verərək, bölgənin təhlükəsizliyinə ən böyük hədə olan münaqişənin həlli ilə bağlı Azərbaycanın beynəlxalq hüququn norma və prinsiplərinə əsaslanan mövqeyini qarşı tərəfin diqqətinə çatdırıb. BMT Təhlükəsizlik Şurasının qətnamələri başda olmaqla, beynəlxalq ictimaiyyətin münaqişənin həlli ilə bağlı sərgilədiyi mövqe haqqında qarşı tərəfə məlumat verilib.

C.Vada C.Bayramovu Xarici İşlər naziri təyin olunması münasibətilə təbrik edib. O, Azərbaycanda diplomatik fəaliyyəti dövründə iki ölkə arasında əlaqələrin daha da inkişafı naminə səylərini əsirgəməyəcəyini bildirib.

Görüşdə qarşılıqlı maraq doğuran digər məsələlər ətrafında fikir mübadiləsi aparılıb.

 

ŞƏRH YAZ
0
BAĞLA