KORONAVİRUSA YOLUXANLARIN SAYI - CANLI STATİSTİKA

Azərbaycanın avtomobil parkında “hava niyə açılmır?” — EKSPERT RƏYİ

Azərbaycanın avtomobil parkında “hava niyə açılmır?”
20:18
27.09.2019
4625
İqtisadiyyat
A
Artıq təsdiqlənmiş “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”na əsasən, ətraf mühitin qorunması məqsədilə aidiyyəti qurumların qarşısında köhnə avtomobillərin istismardan yığışdırılması, utilizasiya edilməsi, eləcə də, yeni avtomobillərin ölkəyə gətirilməsini təmin etmək məsələsi qoyulub.

"Ölkə.Az" oxu.az-a istinadən bildiriri ki, ekoloji avtomobillər arasında isə hibrid və elektromobillərə xüsusi önəm verilməsi qeyd edilib.

Bu proqrama əsasən, yol hərəkəti tam təhlükəsiz olmalı və insan sağlamlığına zərər vurmayan nəqliyyat vasitələrinə üstünlük verilməlidir.

Gürcüstanda, eləcə də, digər ölkələrdə hibrid avtomobillərə əlavə rüsumlar tətbiq edilmir.

İdxal edilən yeni hibrid avtomobillərin gömrük rüsumu və aksiz vergisi niyə ləğv edilmir? Ekspertlər bu istiqamətdə hansı təkliflər irəli sürür?

Nəqliyyat üzrə ekspet Tural Yusifov mövzu ilə bağlı Oxu.Az-a bir sıra təkliflər səsləndirib.

Onun sözlərinə görə, ekoloji avtomobillərə dövlət rüsumları sıfırlanmalıdır:  

“Ümumiyyətlə, ekoloji avtomobil deyəndə burada yalnız hibrid və ya elektrikli avtomobillər nəzərdə tutulmur. Eyni zamanda, hidrogenlə çalışan avtomobillər də nəzərdə tutulur. Havaya sıfır dərəcəsində zərərli tullantılar buraxan ən sərfəli ekoloji avtomobil hidrogen və elektrikli çalışan maşınlardır.

Məsələn, elektrikli avtomobilləri bir müddətdən sürdükdən sonra onun batareyasının utilizasiyası məsələsi ortaya çıxır. Ümumiyyətlə, bizdə hibrid avtomobillərinin ölkəyə gətirilməsində heç bir güzəşt yoxdur. Ancaq elektrikli avtomobilərin gətirilməsinə əlavə dəyər vergisi ləğv edilərək, 15 faiz idxal rüsumu tətbiq edilir. Amma bu da çoxdur.

Çünki elektrik avtomobilləri avtomobil istehsalçılarına olduqca baha başa gəldiyinə görə, onların qiyməti heç də ucuz deyil. Yeni avtomobillərin qiyməti təxminən 35-40 min dollardan başlayır. Buna görə də elektrik avtomobillərinə dair bütün qeydiyyat və idxal rüsumlarını sıfırlamaq lazımdır”.

Ekspert rüsumların ləğvi ilə yanaşı, bir sıra güzəştlərin də tətbiq edilməli olduğunu bildirib:

“Hətta deyərdim ki, ekoloji avtomobil sahiblərinə bir sıra güzəştlərin tətbiq edilməsi arzuolunandır. Məsələn, əgər sənin elektrikli avtomobilin varsa, sən pulsuz park xidmətindən yararlana bilərsən, digər avtomobillər üçün qadağan olunan ərazilərə girişinə icazə verilməlidir. Həm də əgər elektrikli avtomobillərlə taksi fəaliyyəti göstərirsənsə, sadələşdirilmiş vergi sıfırlanmalıdır. Bu, əslində, təklif kimi qalmamalı, belə də olmalıdır”.

Şəhər üçün hibrid avtomobillərinin əlverişli olduğunu deyən ekspert hibrid avtomobillərini yeddi il müddətinə aksiz vergisindən azad edilməsini təklif edir:

“Düşünürəm ki, hibrid avtomobillər yeddi illik əlavə dəyər vergisi və ya aksiz vergisindən azad etmək lazımdır. Çünki onların həm də benzin mühərrikləri var. Şəhərdə hərəkət sürəti aşağı olduğu üçün hibrid avtomobillər olduqca əlverişlidir. Yuxarı sürət həddi qoyulan yollarda isə sadəcə olaraq benzindən istifadə edilir”.

T.Yusifov bu məsələlərin 2024-cü ilə qədər mütləq şəkildə öz həllini tapmalı olduğunu da diqqətə çatdırıb:

“Bu məqamın növbəti ilin dövlət büdcəsində nəzərə alınıb-alınmamasını deyə bilmərəm, amma 2024-cü ildən sonra bu məsələni nəzərə ala bilməmək şansımız olmayacaq. Çünki artıq 2024-cü ildən sonra dizel və benzin mühərrikli avtomobillər istehsal olunmayacaq. Artıq elektrik mühərrikli, hidrogen və alternativ enerji ilə işləyən hibrid mühərrikli avtomobillər istehsal olunacaq. 

Artıq təsdiqlənmiş olan “Azərbaycan Respublikasında yol hərəkətinin təhlükəsizliyinə dair 2019 – 2023-cü illər üçün Dövlət Proqramı”nın tətbiqi isə 2023-cü ilə qədər nəzərdə tutulub.

Proqramın tərkibində stimullaşdırıcı məqam var.

Müəyyən xırda məqamların müzakirə edilməsi vacib olsa da, stimullaşdırılma prosesinə başlamaq olar. Bu, həm ölkədə köhnə avtomobil parkının yenilənməsinə təkan verəcək, həm də ekologiyanın təmizlənməsinə xidmət edəcək”.

Elektrikli, hibrid avtomobillərin servis məsələləri ilə bağlı məqama gəldikdə, ekspert qeyd edib ki, rəsmi servislərdə heç bir problem olmur:

“Rəsmi servis öz brendinin baş ofisinə bağlıdır. Brendin adını qorumaq üçün də heç bir servisdə qeyri-peşəkar mütəxəssislər olmur. Mütəxəssislərin sertifikatlaşması, ixtisas artırılması, bu və ya digər avtomobillər haqqında maksimum məlumatlı olmaları üçün təlim kursları təşkil edir.

Avtomobillərin ehtiyat hissələrinin tapılmaması məsələsi isə tələbata görə öz həllini tapacaq. Əgər təlabat varsa, ehtiyyat hissələri tapılacaq”.

Nəqliyyat üzrə ekspert Elməddin Muradlı bu məsələdə aidiyyəti qurumlardan çox Dövlət Gömrük Komitəsinin rolunun vacibliyinə toxunub. Onun sözlərinə görə, komitə vətəndaşların ekoloji avtomobil almasına əlverişli şərait yaratmır:

“Ekoloji avtomobil almaq istəyən vətəndaş fikirləşir ki, bu avtomobilləri ölkəyə gətirsə, gömrükdə ondan nə qədər idxal rüsumu tutulacaq. Hesab-kitab olduqca baha başa gəldiyi üçün insanlar risk eləyib bu avtomobilləri ala bilmirlər.

Dövlət Proqramının təsdiq olunmasından artıq 10 ay keçsə də, proqramda adları qeyd edilən nazirliklərdən heç bir hərəkət yoxdur. İlk olaraq avtomobil satışı ilə məşğul olan şirkətlərə şərait yaradılmalıdır ki, onlar ekoloji avtomobilləri ölkəyə gətirsin və rəsmi servis xidmətlərini də aktivləşdirsinlər”.

Ekspert deyir ki, təkcə Bakıda ekoloji çirklənmənin 70-80 faizi nəqliyyatın payına düşür:

“Bu barədə Ekologiya Nazirliyinin nümayəndələri də öz çıxışlarında məlumat veriblər. Kimyaçı alimlər təsdiq edir ki, bu avtomobillər havaya 240 adda zərərli qaz buraxır ki, onlardan bəziləri birbaşa ölümcül təsirə malikdir. 

Ekspert Gömrük Komitəsinin əsaslı addımlar atmadığını iddia edir:

“Komitə stimullaşdırma üçün atılmalı addımları gecikdirir. Bildiyim qədərilə gələn ildən etibarən elektromobillər üçün gömrük rüsumu sıfırlanacaq. Güzəşt tətbiq ediləcək. Amma maraqlısı odur ki, ölkədə elektromobillər üçün hələ əlverişli şərait yaradılmayıb. Yaxşı olardı ki, hazırda daha çox istifadə edilən hibrid avtomobillər üçün güzəştlər tətbiq edərdilər, elektromobillərə hələ ehtiyac yoxdur”.

Xatırladaq ki, Dövlət Gömrük Komitəsinin sədri Səfər Mehdiyev çıxışında Azərbaycana gətirilən hibrid və digər ekoloji təmiz avtomobillərin idxal rüsumlarına gələn ilin dövlət büdcəsi zərfində yenidən baxılacağını deyib. Cari ilin yanvar ayının 1-dən Azərbaycana idxal olunan elektrikli avtomobillərə yalnız 15%-lik əlavə dəyər vergisi (ƏDV) tətbiq edilir.

Ölkə.Az

ŞƏRH YAZ
0

SOCAR-ın rəhbər şurası ölkə başçısının çıxışından irəli gələn vəzifələri müzakirə etdi — FOTO

SOCAR-ın rəhbər şurası ölkə başçısının çıxışından irəli gələn vəzifələri müzakirə etdi
19:27
Bu gün
219
İqtisadiyyat
A
Avqustun 7-də Azərbaycan Respublikası Dövlət Neft Şirkətinin rəhbər şurasının üzvlərinin “SOCAR Tower”də iclası keçirilib.

"Ölkə.Az" SOCAR-ın rəsmi saytına istinadla xəbər verir ki, iclasda Azərbaycan Respublikasının Prezidenti İlham Əliyevin 6 avqust 2020-ci il tarixində Koronavirusla mübarizə sahəsində görülən tədbirlər və sosial-iqtisadi vəziyyətlə bağlı keçirdiyi müşavirədə dövlət şirkətləri və o cümlədən, SOCAR barədə səsləndirdiyi fikirlərdən irəli gələn vəzifələr müzakirə olunub.

Qeyd edilib ki, Azərbaycan Respublikasının Prezidenti İlham Əliyevin rəhbərliyi və dəstəyi ilə son 15 ildə SOCAR lokal milli şirkətdən beynəlxalq şirkətə çevrilib, qlobal və regional əhəmiyyətli bir çox meqa-layihələri həyata keçirməyə nail olub. Hazırkı dövrdə inzibati iqtisadiyyat modelindən tam uzaqlaşmağın və koorparativ idarəetmə sistemini təkmilləşdirməyin əhəmiyyəti vurğulanıb. Effektli bazar iqtisadiyyatı modelini əsas götürərək, müasir rəqəmsal şirkətə transformasiyamız bundan sonra daha da sürətlənməsi, əməliyyat və investisya layihələrinin gəlirliyinin təmin olunması barədə fikir mübadiləsi aparılıb.

Hələ bir müddət əvvəl SOCAR 2035-ci ilə qədər olan dövrü əhatə edən yeni strategiyasını “McKinsey” şirkəti ilə birlikdə hazırlamağa başlayıb və yaxın zamanda hökumətə təqdim etməyi planlaşdırır. Strategiyanın əsas prinsipləri şirkətin dayanıqlı inkişafı, təkmilləşmiş effektiv idarətmə sisteminin tətbiqi, sosial və ekoloji məsuliyyətin təmin olunması, ölkəmizin yanacaq enerji tələbatı ehtiyaclarının dəyərləndirilməsi və şirkətin gəlirliliyinin təmin olunması ilə yanaşı borcların idarə olunmasıdır. Bunun üçün idarəetmə modelinin bütövlükdə təkmilləşdirilməsi, funksional idarəetməni mərkəzləşdirməklə yanaşı, əməliyyatlarımızın çevikliyinə nail olunması, ən əsası da bürokratik proseslərin sadələşdirilməsi mütləq şərtdir. SOCAR artıq bir müddətdir ki, bu istiqamətdə irəliləyir və indi, dövlət başçısının haqlı iradlarını əsas götürərək, atdığı addımları daha da sürətləndirmək əzmindədir.

ŞƏRH YAZ
0

Mikayıl Cabbarov sahibkarlarla onlayn görüş keçirdi — FOTO

Mikayıl Cabbarov sahibkarlarla onlayn görüş keçirdi
16:36
Bu gün
239
İqtisadiyyat
A
Avqustun 7-də İqtisadiyyat naziri Mikayıl Cabbarov sahibkarlarla onlayn görüş keçirib.

İqtisadiyyat Nazirliyindən verilən məlumata görə, görüşdə İqtisadiyyat Nazirliyinin rəhbər vəzifəli şəxsləri, eləcə də, pandemiyadan zərər çəkmiş sahələrdə fəaliyyət göstərən 280-dən çox sahibkar iştirak edib.

Tədbirin əsas məqsədi yeni şəraitdə biznesin fəaliyyəti, istehsal və xidmət sahələrində tətbiq edilən davranış qaydaları, pandemiyanın özəl sektora mənfi təsirlərinin aradan qaldırılması yollarının müzakirəsi olub.

Görüşdə çıxış edən İqtisadiyyat naziri qeyd edib ki, 2020-ci il Azərbaycan üçün uğurlu başlasa da, pandemiya bütün ölkələrdə olduğu kimi, milli iqtisadiyyatı da yeni çağırışlarla üz-üzə qoyub, məcburi məhdudlaşdırmalar iqtisadi fəallığın zəifləməsinə, biznesin maliyyə itkiləri ilə qarşılaşmasına gətirib çıxarıb.

Pandemiyanın milli iqtisadiyyata, məşğulluğa və sahibkarlıq subyektlərinə mənfi təsirlərinin minimallaşdırılması üçün Azərbaycan Respublikasının Prezidenti cənab İlham Əliyev dövlət orqanları qarşısında çox ciddi vəzifələr qoyub.

Nazirlər Kabineti tərəfindən iqtisadiyyata geniş dəstək paketini nəzərdə tutan proqramlar, biznesin qısa və orta müddətdə dəstəklənməsini əhatə edən çoxşaxəli mühüm sənədlər qəbul edilib.

Dövlət başçısının rəhbərliyi ilə həyata keçirilən siyasətin mərkəzində insan amilinin dayandığını vurğulayan nazir sıx dövlət-vətəndaş həmrəyliyinə söykənərək insanların sağlamlığının qorunması istiqamətində həyata keçirilən tədbirlərin önəmini diqqətə çatdırıb.

Pandemiyanın iqtisadiyyata neqativ təsirləri barədə məlumat verən İqtisadiyyat naziri 2020-ci ilin birinci yarımilliyi üzrə ÜDM-də azalmanın qeydə alındığını, əksər iqtisadi sektorlarda azalma müşahidə olunduğunu qeyd edib.

Vurğulanıb ki, iqtisadiyyata təhdidlərin qarşısının alınması istiqamətində qeyri-neft sektorunda iqtisadi fəallığın canlandırılması, iş yerlərinin qorunması baxımından stimullaşdırıcı effektli layihələrin və tədbirlərin maliyyələşdirilməsi, investisiya yönümlü kreditləşdirmə, özəl investisiya qoyuluşunun təşviq edilməsi, tikinti-məşğulluq və digər istiqamətlərdə təkanverici tədbirlərin görülməsi qarşıda duran əsas hədəflərdəndir.

Özəl sektorun iqtisadiyyatın aparıcı qüvvəsi olduğunu vurğulayan Mikayıl Cabbarov, dövlət başçısının tapşırığına uyğun olaraq, Nazirlər Kabinetinin sahibkarlıq subyektlərinə yeni maliyyə dəstəyinin göstərilməsi barədə qərar qəbul etdiyini bildirib.

Qərara əsasən, mövcud şəraitin sahibkarlığa mənfi təsirlərini minimallaşdırmaq və məşğulluğun qorunmasına dəstək məqsədilə pandemiyadan zərər çəkmiş sahələrdə çalışan vergi ödəyicilərinə işçi sayına münasibətdə bir aylıq əməkhaqqı fondu həcmində, fərdi (mikro) sahibkarların isə daha çox ehtiyacı olan hissəsinə təkrarən 250 manat həcmində maliyyə dəstəyi göstəriləcəkdir.

Bunlarla yanaşı, Nazirlər Kabinetinin qərarı ilə 2020-ci il 1 aprel tarixindən 2021-ci il 1 yanvar tarixinədək sahibkarlar dövlət və bələdiyyə torpaq sahələrinin, hüquqi şəxslər və fərdi sahibkarlar (o cümlədən həmin kateqoriyadan olan sənaye məhəllələrinin iştirakçıları) dövlət əmlakının icarə haqqından azad edilir. İqtisadiyyat naziri, həmçinin, sahibkarlıq subyektlərinin maliyyə resurslarına çıxış imkanlarının artırılması, pandemiyadan zərər çəkmiş sahələrə dövlət dəstəyinin gücləndirilməsi məqsədilə sahibkarlığın maliyyələşdirilməsi alətlərinin genişləndirildiyini diqqətə çatdırıb.

Qeyd olunub ki, sahibkarların dövlət zəmanətli krediti asan və şəffaf formada əldə etməsi üçün yaradılmış Elektron Kredit Platforması vasitəsilə artıq bir ay ərzində 12 milyon manatdan çox kredit verilməsi təsdiq edilib.

Bildirilib ki, hazırkı şəraitdə cəmiyyət, eləcə də sahibkarlar yaranmış yeni tələblərə uyğunlaşmalıdır. Pandemiyanın nə zaman bitəcəyi məlum deyil. Cəmiyyət yeni həyat tərzinə hazır olmalı, sahibkarlar da biznes fəaliyyətini yaranmış şəraitə uyğunlaşdırmalıdırlar.

Qapalı məkanlarda maska taxılmalı, obyektlər mütəmadi olaraq dezinfeksiya edilməli, antiseptik vasitələrdən istifadə olunmalı, işçi heyətin maska və əlcəkdən istifadəsi təmin edilməli, vətəndaşların maskasız obyektlərə daxil olmasının və sıxlığın qarşısı alınmalı, fiziki məsafə qorunmalıdır. Yeni həyat tərzinin rəqəmsal həllərin tətbiqini tələb etdiyini deyən İqtisadiyyat naziri məsafəli xidmətin imkanlarının genişləndirilməsinin vacibliyini vurğulayıb.

Ticarət və xidmət obyektləri yeni qaydalara nə qədər tez vərdiş etsələr, bu onların biznesi üçün bir o qədər səmərəli olar.

Görüşdə çıxış edən sahibkarlar yaranmış vəziyyətin onların fəaliyyətinə göstərdiyi mənfi təsirləri qeyd edib, istehsal və xidmət sektorlarında yeni qaydaların tətbiqinin təkcə sahibkarlardan deyil, eləcə də cəmiyyətin hər bir üzvündən asılı olduğunu bildirib, iqtisadi itkilərin aradan qaldırılması, iqtisadi fəallığın bərpası üçün dövlətdən əlavə dəstək gözlədiklərini diqqətə çatdırıblar.

Biznesin fəaliyyətinin yeni, fərqli şəraitdə davam edəcəyini vurğulayan iş adamları bu çətin dövrdə dövlət-biznes əməkdaşlığının daha zəruri xarakter daşıdığını qeyd ediblər.

Görüşlə bağlı əvvəlcədən elan edilmiş e-mail ünvana sahibkarlardan çoxsaylı sual və təkliflər daxil olub, həmçinin, tədbir zamanı əlavə təkliflər səsləndirilib. Müraciətlərin əsas hissəsi pandemiyadan zərər çəkmiş sahələrin əhatə dairəsinin genişləndirilməsi, vergi güzəştlərinin müddətinin uzadılması, vergi borclarının ödənilməsi üçün güzəşt müddətlərinin müəyyən edilməsi, sosial ödəmələr üzrə əlavə tətilin verilməsi, dövlət zəmanətli kreditlərin müddətinin uzadılması və s. məsələlərlə bağlı olub.

İqtisadiyyat naziri Mikayıl Cabbarov sahibkarların suallarını cavablandırıb, təkliflərlə bağlı fikirlərini bildirib. Görüşdə pandemiyanın özəl sektora təsirlərinin minimallaşdırılması, biznesin dirçəldilməsi və inkişafı yolları müzakirə olunub.

 

ŞƏRH YAZ
0
BAĞLA