“Bu biabırçılıqdan sonra Elmar Məmmədyarov necə nazir vəzifəsində qala bilər?”

“Ölkə.Az” xəbər verir ki, bunu politoloq Elxan Şahinoğlu XİN-dəki həbslərlə bağlı nazir Elmar Məmmədyarovun açıqlamasını şərh edərkən deyib.

“Xarici İşlər naziri Elmar Məmmədyarov XİN-dəki həbslərlə bağlı jurnalistin sualına dörd qısa cümləylə cavab verib: “Bu haqda danışmaq istəmirəm, çünki istintaq sirridir. Mənim açıqlamam istintaqın gedişinə təsir edə bilər. Həbslərə gəlincə, çox təəssüflənirəm. İstefa verəcəyimlə bağlı deyilənlərə şərh vermək fikrim yoxdur”.

İstintaq sirrini anladıq, “həbslərə təəssüflənirəm” ifadəsi nə deməkdir? Cənab Məmmədyarov nazirlikdəki korrupsiya hallarına təəssüflənir, yoxsa ən yaxın işçilərinin həbsinə? Özünə güvənirsə, jurnalistə deməliydi ki, baş verənlərdən xəbəri olmayıb və rüşvətxor diplomatlar rəhbəri olduğu nazirlik adına ləkədir. 

“İstefa verəcəyimlə bağlı deyilənlərə şərh vermək fikrim yoxdur” isə o deməkdir ki, bu biabırçılqdan sonra öz istəyi ilə istefa vermək istəmir. Qorxur. Qərar onsuz da veriləcək, sadəcə yerinə namizəd axtarılır. Məmmədyarov düşünür ki, öz istəyi ilə istefa versə, rüşvətə görə məsuliyyət daşıdığını biruzə verəcək və bu halda istintaqa cəlb olunacaq. Belədə isə ümid edir ki, mədəniyyət naziri kimi istefaya göndərilib təhlükədən qurtulacaq. Əlbəttə, onun Amerika Birləşmiş Ştatlarına səfir göndərilmək kimi başqa arzusu da ola bilər...” - deyə, politoloq qeyd edib. 

Mürtəza
Ölkə.Az