KORONAVİRUSA YOLUXANLARIN SAYI - CANLI STATİSTİKA

Düşmən qüvvələrin maraqlarına xidmət edən təxribatların qarşısı bundan sonra da qətiyyətlə alınacaq — Abutalıb Səmədov

Düşmən qüvvələrin maraqlarına xidmət edən təxribatların qarşısı bundan sonra da qətiyyətlə alınacaq
17:49
16.07.2020
2939
Siyasət
A
Son günlər Ermənistan ən çox güvəndiyi dövlətlərdən və qurumlardan gözlədiyi dəstəyi ala bilmədi və təcrid vəziyyətinə düşdü.

 Azərbaycan Prezidenti İlham Əliyevin sədrliyi ilə Nazirlər Kabinetinin 2020-ci ilin birinci yarısının sosial-iqtisadi inkişafının yekunnlarına və qarşıda duran vəzifələrə həsr olunan iclasda çıxış edən dövlət başçısı bildirdi ki, Ermənistan-Azərbaycan sərhəddinin Tovuz rayonu hissəsində təxribat törədərək  kəndlərimizi ağır silahlardan atəşə tutan erməni  hərbi birləşmələrinin  hücumunun qarşısı qəhrəman ordumuz tərəfindən qətiyyətlə alındı, erməni hərbi hissələrinə ağır zərbələr vuruldu. Düşmənin ağır hərbi texnikaları, istekamları, müdafiə qurğuları ordumuz tərəfindən darmadağın edildi və qarşı tərəf  yüzlərlə hərbçisini itirərək geri çəkilmək məcburiyyətində qaldı. 

Ermənistan bu təxribatın səbəbkarı kimi Azərbaycanı göstərməyə cəhd etsə də dünya ictimaiyyətini öz yalanlarına inandırmağa  nail ola bilmədi. Çünki hamıya aydındır ki, Ermənistan hakimiyyətinin Tovuz rayonu ilə sərhəddə təxribat törədərək atəşkəs rejimini kobud şəkildə pozması məhz Paşinyan hökumətinin  respublikada vəziyyətə nəzarəti əhəmiyyətli dərəcədə itirdiyi, ölkənin xaosa sürükləndiyi, pandemiyaya qarşı mübarizənin uğursuzluqla davam etdiyi və daxili narazılığın son dərəcə artdığı dövrə təsadüf edir.  Prezidentin qeyd etdiyi kimi  bu şəraitdə Ermənistan rəhbərliyinə hansısa böhranlı vəziyyət lazımdır ki,  ictimai fikri bu əsas məsələlərdən yayındırsın və bu təxribata şüurlu şəkildə əl atıldı. Əsas hədəf aktivləşən müxalifətin fəaliyyətini maksimum məhdudlaşdırmaq və susdurmaqdır. Bu məqsədlə Azərbaycanın düşmən obrazı qabardılır, erməni xalqı həmrəyliyə dəvət edilir, siyasi partiyaların fəaliyyətini  dayandırmaqla bağlı çağırışlar səslənir.

Ermənistanın atəşkəsi kobud şəkildə pozmasına gözlənildiyi kimi ATƏT Minsk Qrupu həmsədr ölkələri, Avropa Şurası, və digər beynəlxalq təşkilatlar adekvat reaksiya vermədilər və bu təcavüzkar addımı qınadıqlarını  bildirmədilər. Ən xırda və əhəmiyyətsiz məsələlər barədə  odlu-alovlu bəyanatlar verən bu təşkilatlardan fərqli olaraq GUAM təşkilatının katibliyi bəyanat verərək Ermənistanın təcavüzkar hərəkətlərini qəti şəkildə pislədi. Qardaş Türkiyə Cümhuriyyəti Ermənistanın atəşkəsi pozmasını şiddətlə qınadığını və həmişə olduğu kimi Azərbaycanın yanında olduğunu birmənalı şəkildə bəyan etdi. Pakistan dövləti həmişə olduğu kimi Azərbaycanın haqq işinə öz dəstəyini bildirdi. Eyni zamanda digər ölkələrin rəsmi nümayəndələri də Azərbaycanı dəstəklədilər. Türkdilli Dövlətlərin Əməkdaşlıq Şurası açıqlama verdi. Bu bəyanatlar ən çox güvəndiyi dövlətlərdən və qurumlardan belə gözlədiyi dəstəyi ala bilməyən və təcrid vəziyyətinə düşən  Ermənistanda ciddi narahatlıqla qarşılandı.

Ağır döyüşlər zamanı dəyərli komandirlər-General Polad Həşimov, polkovnik İlqar Mirzəyev, zabit və əskərlərimiz şəhid oldular. Eyni zamanda mülki əhalini ağır silahlardan atəşə tutaraq faşizmin və barbarlığın əyani təzahürünə çevrilən ermənilərin artilleriya atəşi nəticəsində Ağdam kəndinin sakini, 76 yaşlı Əziz Əzizovu da itirdik.

 İtkilər verdik, şəhidlərimizi hər yerdə sevgi və sayğı ilə qarşıladıq, birliyimizi, vətənimiz naminə hər an şəhid olmağa hazır olduğumuzu nümayiş etdirdik. Siyasi partiyalar Ali Baş Komandan Prezident İlham Əliyevin erməni təxribatlarının qarşısının alınması istiqamətində həyata keçirdiyi siyasəti qətiyyətlə dəstəklədiklərini, onun ətrafında sıx birləşdiklərini bəyan etdilər, xalqımızı həmrəyliyə, Vətənimizə qarşı uzanan qanlı erməni əllərini kəsib atmağa hər an hazır olmağa səslədilər, qəhrəman ordumuzla qürur duyduqlarını, onun yanında olduqlarını  bildirdilər. 

 Bakı şəhərində  on minlərlə insanın iştirak etdiyi yürüş silahlı qüvvələrimizə xalqımızın verdiyi dəyərin və dəstəyin parlaq nümayişi oldu və hamımızı qürurlandırdı. 
 Çox təəssüf ki, xalqımızın düşmənlərinə xidmət edən bir qrup təxribatçı ordumuzun gücünə güc qatan və Azərbaycan tarixinə qızıl hərflərlə həkk olunacaq bu möhtəşəm vətənpərvərlik yürüş-mitinqinin pozulması və hakimiyyətə qarşı etiraza çevrilməsi üçün əlindən gələni etdi. Təxribatçılar Milli Məclisin içərisinə girdilər, polislərə və KİV təmsilçilərinə qarşı zorakılıq etdilər, maşınları aşırdılar və Azərbaycanı dəhşətli faciələr yaşadığımız günlərə-ötən əsrin 90-cı illərinə qaytarmağa cəhd göstərdilər. 

Azərbaycana düşmən olan qüvvələrə, ilk növbədə Ermənistan maraqlarına xidmət edən və ağır hərbi əməliyyatların aparıldığı dövrdə paytaxtda sabitliyi pozmağa, ölkəni xaosa sürükləməyə çalışan təxribatçıların qarşısı Prezident İlham Əliyevin rəhbərliyi ilə güc strukturları tərəfindən qısa müddətdə qətiyyətlə alındı, vətəndaşlara və dövlət əmlakına qarşı hüquqazidd hərəkətlər edən şəxslərin həbs edilməsi istiqamətində addımlar atıldı. Azərbaycan hakimiyyəti  bir daha göstərdi ki, dövlətimizi  nüfuzdan salan, xalqımıza fəlakətlər gətirən, düşmən qüvvələrin maraqlarına xidmət edən təxribatların qarşısı bundan sonra da qətiyyətlə alınacaq.

 Abutalıb Səmədov
Azərbaycan Naminə Alyans partiyasının sədri.

ŞƏRH YAZ
0

Hulusi Akarı Zakir Həsənov qarşıladı — FOTO

Hulusi Akarı Zakir Həsənov qarşıladı
00:57
Bu gün
302
Siyasət
A
Xəbər verdiyimiz kimi, bu gün Türkiyə Milli Müdafiə naziri Hulusi Akar, Baş Qərargah rəisi ordu generalı Yaşar Güler, qoşun növü komandanları və digər yüksək rütbəli zabitlər Azərbaycana səfər edib.

"Ölkə.Az" xəbər verir ki, qonaqları Azərbaycanın Müdafiə naziri Zakir Həsənov qarşılayıb.

Qeyd edək ki, Türkiyənin geniş tərkibdə hərbi nümayəndə heyəti Azərbaycan-Türkiyə quru qoşunları və hərbi hava qüvvələrinin birgə döyüş atışlı taktiki və taktiki-uçuş təlimlərinin Yüksək Səviyyəli Müşahidəçi günü çərçivəsində təlimlərin birinci mərhələsinin son epizodunu izləyəcək.


ŞƏRH YAZ
0

"Mən istintaqa çağırılmamışam" — Xarici İşlər nazirinin müavini

00:34
Bu gün
244
Siyasət
A
"Mən istintaqa çağırılmamışam. Ümumiyyətlə, nə bu gün, nə də bundan əvvəl heç bir orqana dəvət edilməmişəm və heç bir ifadə verməmişəm".

"Ölkə.Az" xəbər verir ki, bunu APA-ya açıqlamasında Azərbaycan Xarici İşlər nazirinin müavini Ramiz Həsənov deyib.

R.Həsənov bildirib ki, mediada onun DTX-də istintaqa çağırılması və fəaliyyətinin araşdırılması ilə bağlı yayılmış məlumat həqiqəti əks etdirmir: "Ümumiyyətlə, mənim fəaliyyət sahəm tamam başqadır. Mətbuat bu cür məlumatları tirajlayarkən dəqiqləşdirmə aparmalıdır. Bu, tamamilə yanlış məlumatdır və mətbuatın dəqiqləşdirmədən belə xəbərləri yazmasına təəssüf edirəm".

Qeyd edək ki, "Musavat.com" Xarici İşlər nazirinin iki müavininin bu gün DTX-də saatlarla istintaq altında olması barədə xəbər yayıb. Xəbərdə qeyd olunub ki, Xarici İşlər nazirinin müavinləri Ramiz Həsənov və Nadir Hüseynov XİN-də baş verən pozuntularla bağlı DTX-yə çağırılıb və saatlarla ifadə veriblər.

Məlumata görə, aparılan istintaq hərəkətlərinin nəticəsi olaraq yaxın günlərdə Xarici İşlər Nazirliyinin ali rəhbərliyinə aid vəzifəli şəxslərin həbsi gözlənilir.

Xatırladaq ki, Dövlət Təhlükəsizlik Xidmətinin Xarici İşlər Nazirliyində bu il iyulun 3-də keçirdiyi əməliyyat nəticəsində nazirliyin İşlər İdarəsinin müdiri Fərhad Mollazadə və Konsulluq İdarəsinin rəisi Faiq Bağırov da daxil olmaqla bir neçə əməkdaşı saxlanılıb. Daha sonra saxlanılanlar barəsində məhkəmə həbs qətimkan tədbiri seçib.

Bu hadisələrdən bir qədər sonra Prezident İlham Əliyevin sərəncamı ilə Xarici İşlər naziri Elmar Məmmədyarov vəzifəsindən azad edilib.

ŞƏRH YAZ
0
BAĞLA