\"Der Spiegel\": Yer kürəsini gözləyən fəlakət artıq uzaqda deyil
"Ölkə.Az" musavat.com-a istinadən bildirir ki, bu cümlə Almaniyanın "Der Spiegel" jurnalının yazarı Kurt Ştukenberqin məqaləsində yer alıb.
"Kaliforniya, Oreqon və Vaşinqton ştatlarındakı yanğınlar iqlim böhranı ilə mübarizədə daha bir əngəli - onun görünməzliyini ortadan qaldırdı. İqlimdəki istiləşmə artıq dəhşətli simasını daha əyani şəkildə göstərir. Bunu Avropadakı anormal istilərdən, ötən il Avstraliyanın az qala yarısını kül edən yanğınlardan görmək olar", -deyə, yazıda qeyd olunub.
"Bu hər kəs üçün bir siqnal olmalıdır. Son on ildə Oreqonda 500 min hektarlıq ərazi yanmışdı. Son bir həftədə isə milyon hektarlıq ərazi külə dönüb", - deyə, Oreqon ştatının qubernatoru Keyt Braun bildirib.
Kaliforniyada isə yüz minlərlə insan iqlim dəyişikliyinin Yer kürəsinin cənnət guşələrindən sayılan bu bölgəsini yaşamaq üçün yararsız hala gətirdiyini kədərli gözləri ilə seyr edirlər.
Kaliforniya Meşə təsərrüfatı və yanğın əleyhinə təhlükəsizlik nazirliyinin nümayəndəsi Linett Braunun sözlərinə görə, bu il ştatda yanğın mövsümü əvvəlki illərə nisbətən tam 75 gün uzanıb.
"Əgər yaxın dövrlərdə biz zəhərli karbon qazının atmosferə atılmasının qarşısını ala bilməsək, artıq 2070-ci ildə Yer kürəsinin 3,5 milyard əhalisi həyatda qalmaq mümkün olmayan regionlarda yaşamalı olacaq", - deyə, yazıda qeyd olunub.
