Ölümünü əvvəlcədən hiss edən Elçin Həmidov

Həmidov Elçin Qəzənfər oğlu 1958-ci ildə 29 iyun-da Bakıda anadan olub.Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürür. Amma gələcəyin istedadlı aktyorunu hələ qarşıda daha böyük çətinliklər gözləyir. Əmisigildə qaldığı müddətdə evin ən ağır işlərini ona gördürürlər, doyunca yeməkdən məhrum olan Elçinin vitaminsizlikdən kirpikləri tökülməyə başlayıb. Əmisinin evində də əziyyətli günlər keçirən, valideynlərinin itkisindən özünə gəlməyə macal tapmayan Elçinin əvvəlcə bacısı, sonra isə qardaşları vəfat edir.

1974 –cü ildə Azərbaycan Dövlət Musiqili Komediya Teatrında xor artisti vəzifəsində çalışıb. 1977-ci ildə İncəsənət İnstitutunun «Dram-kino aktyoru» fakültəsinə daxil olur, 1981-ci ildə isə oranı bitirir.

1983-cü ildən Azərbaycan Dövlət Musiqili Komediya teatrında artist-vokalist kimi fəaliyyətə başlayır. Məlahətli səsə və məharətli aktyorluq bacarığına malik olan Elçin, klassik və müasir Azərbaycan bəstəkarlarının əsərlərində özünəməxsus maraqlı obrazlar yaradır.

Süleyman Ələsgərov, Şıxəli Qurbanov «Olmadı elə, oldu belə»də Gülüstan, Vasif Adıgözəlov, Əliağa Kürçaylı «Boşanaq, evlənərik»də İkram, H.Qurbanov, Cahangir Aslnoğlu «Qarğa məndə qoz var»da Zərzibonskaya, Soltan Hacıbəyov «Qızıl gül»də Azay, Səid Rüstəmov, Məmməd Səid Ordubadi «Beş manatlıq gəlin»də Nadir, Süleyman Ələsgərov, Şıxəli Qurbanov «Özümüz bilərik»də Miriş, Süleyman Ələsgərov, İsi Məlikzadə «Subaylarınızdan görəsiniz»də Mayıl, Süleyman Ələsgərov, İsi Məlikzadə «Hərənin öz ulduzu»nda Nəzir, Emin Sabitoğlu, Xalidə Hasilova «Nəğməli Könül»də Mustafa, Sərdar Fərəcov, Əli Əmirli «Səhnədə məhəbbət»də ofisiant, Oktay Rəcəbov, Aqşin Babayev ”Əlin cibində olsun”-Şəkərli, Vasif Adıgözəlov, Anar “Aldın payını çağır dayını”-Əli Əyrizadə, Faiq Sücəddinov, Tamara Vəliyeva ”Mən dəyərəm min cavana”-Dilənçi, İmre Kalman ”İdialı qaraçı” Estraqon, Üzeyir Hacıbəyli «O olmasın, bu olsun»da Rza bəy, Rauf Hacıyev «Talelər qovuşanda»da Totuş, Üzeyir Hacıbəyli “Ər və arvad” Kəblə Qubad rolları ilə tamaşaçıların rəğbətini qazanmışdır.

Elçin Həmidov istedad baxımdan varlı insan idi. Əsl bariton və soprano səsə malik olub. Tamaşalardakı çox musiqiləri özü ifa edib. Onun məlahətli səsi var idi və hər cür janrda ifa etməyi bacarırdı. O, hər bir rolu ilə tamaşaçıya gülüş, sevinc bəxş etməyə çalışırdı. Bunun üçün Elçin Həmidova epizodik olsa belə, səhnədə, televiziya ekranında görünmək kifayət edirdi. Tanınmış sənətçiləri parodiya etmək bacarığı isə onu daha da sevdirirdi.  Onun parodiyalarını uşaqdan böyüyə hər kəs çox sevərək izləyirdi. İstedadlı aktyor həmçinin "Planet Parni iz Baku" KVN teatrının əsas simalarından biri idi.O,bu teatrda gözəl obrazlar yaratmışdır.O cümlədən Məhəllə 1 və Məhəllə 2 filmlərində canlandırdığı "Məzi" obrazı komik olmaqla bərabər,həm də düşündürücüdür.Bundan başqa Elçin Həmidov televiziya verilişlərində də aparıcılıq edirdi. Onun "Tez bazar", eləcə də mətbəx verilişləri tamaşaçılar tərəfindən maraqla qarşılanırdı.

Onun son yaratdığı obraz Nikolay Vasilyeviç Qoqolun “Evlənmə” komediyasında Yaiçnitsa obrazı olub. Fevralın 23-də tamaşanın ilk və son premyerası olub.

Elçin Həmidov 2011-ci il martın 4-də qəflətən dünyasını dəyişib. Həmin vaxt teatrda "Hərənin öz ulduzu" tamaşasının məşqi olub. Elçinin işə gəlmədiyini görən dostları onun evinə yollanırlar. Xilasedicilər qapını açdıqda onun cansız bədəni ilə qarşılaşırlar. Aktyor martın 5-də Xırdalan qəbiristanlığında torpağa tapşırılır.

Elçin Həmidov heç vaxt ailə qurmayıb. Buna səbəb isə onun ölüm qorxusu olub. Həmişə deyirmiş ki, ciddi bir qadınla ailə qurmaq istəyirəm, amma qorxuram. Ölüb gedəcəm, o qadın yazıq tənha qalacaq...

Ölkə.Az