"İnanıram ki, Ali Baş Komandanımızın köməkliyi ilə tezliklə bu arzuma çatacam"

59 yaşını qeyd edən xalq artisti “Ölkə.Az”ın suallarını cavablandırıb.

- Mənsum müəllim, ilk sizi kim təbrik etdi?

- Axşam saat 12-də ilk təbrikimi həyat yoldaşımdan almışam. Övladlarım, nəvələrim hamısı yanımdaydı. Mənim üçün tort kəsdilər, şam yandırdılar (gülür). Əlbəttə, mənim üçün ailə çox müqəddəsdir, ailəmə çox bağlı  insanam. Əslində, təbriklər dünəndən başlayıb. Dostlarım, tanışlarım hamısı var olsun, unutmayıblar. Bu gün də qeyd etmişəm, iki canlı efirdə olmuşam. Düşünürəm ki, ömrümü hədər keçirməmişəm. Azərbaycan muğamına xidmət edirəm.

- Təbrikini gözlədiyiniz insan varmı?

- Mən sizə deyim ki, elə şeylərə çox diqqət edən biri deyiləm. Mənim üçün önəmli deyil, kim təbrik etdi, kim etmədi. Bu mövzularda rahat adamam. Təbrik edənlərə də, etməyənlərə də təşəkkür edirəm. Hər şey qaydasındadır.

- Yeni yaşınızdan nə gözləyirsiniz? Özünüzə nə arzulayarsınız?

- Sənətkar kimi, çox şeyə nail olmuşam. Öz sözümü deməyi azda olsa bacarmışam. 

Mənim əsas arzum Qarabağdır. Gözləyirəm ki, o səsi mənə qazandıran torpağıma gedim, o torpağın üzərində “Qarabağ şikəstəsi”ni ifa edim. İnanıram ki, Ali Baş Komandanımızın köməkliyi ilə tezliklə bu arzuma çatacam.

Vüsalə Balayeva
Ölkə.Az