KORONAVİRUSA YOLUXANLARIN SAYI - CANLI STATİSTİKA

“Mikayıl Cabbarovun cavab üslubu bəyənildi...”

“Mikayıl Cabbarovun cavab üslubu bəyənildi...”
14:00
09.12.2019
2046
İqtisadiyyat
A
Son zamanlar azərbaycanlılarla ermənilər müxtəlif arenalarda tez-tez qarşılaşırlar.

"Ölkə.Az" qafqazinfo-ya istinadən xəbər verir ki, həmin qarşılaşmalarda azərbaycanlıların ermənilərə verdikləri tutarlı cavablar ölkə ictimaiyyətində böyük maraqla qarşılanır.

Xatırladaq ki, hələ oktyabrın sonlarında Kaliforniyada  azərbaycanlı Arzu Məmmədovanın sualı ermənipərəst mövqeyi ilə tanınan rusiyalı jurnalist və aparıcı Vladimir Pozneri çıxılmaz vəziyyətə salmışdı. 

Daha sonra azərbaycanlı fəal Bəxtiyar Hacıyevin  noyabrda Paris Sülh Forumunda Ermənistanın Baş Naziri Nikol Paşinyana verdiyi sual da Azərbaycanda rəğbətlə qarşılanmışdı.  Paşinyan Hacıyevin verdiyi suala cavab verməkdə çətinlik çəkərək ciddi bir arqument səsləndirə bilməmişdi. 

Ən son olaraq İqtisadiyyat naziri Mikayıl Cabbarov  dekabrın 6-da Bakıda keçirilən Avropa-Qafqaz-Asiya dəhlizinin (TRACECA) inkişafı üzrə Əsas Çoxtərəfli Sazişin imzalanmasının 20 illiyinə həsr olunmuş beynəlxalq konfransda və TRASEKA Hökumətlərarası Komissiyasının Daimi Katibliyinin XIV iclasında iştirak edən Ermənistanın ərazi idarəçiliyi və infrastruktur nazirinin müavini Armen Simonyana sərt cavab verib. 
Belə ki, erməni nazir müavini çıxışında bildirib ki, əslində bu TRASEKA məlum məsələlər üçün nəzərdə tutulub: “Amma səfər proqramı siyasiləşdirilib. Nə üçün biz Fəxri xiyabana səfər etməli idik. Biz hesab edirik ki, belə platformaların proqramlara salınması qəbuledilməzdir”-  şəklində təxribat xarakterli sual səsləndirib. 

İqtisadiyyat naziri M. Cabbarovun  isə  nazir  müavininə dərhal sərt reaksiya verərək bildirib  ki, TRACECA-nın məzmunu aydındır: “Həmkarlarım dəhlizlə bağlı geniş çıxış etdilər. Mən öz tərəfimdən tədbirin təşkilinə cavabdeh ölkə kimi, mədəni hissəni təşkil etdiyimizə görə qonşularımızın reaksiyasını yaxşı anlayıram. İlk öncə qeyd edim ki, onlar Yerevandan Bakıya gəliblər və öz gözləri ilə hər şeyi görürlər… 
Başa düşürəm ki, onların gördüklərini qəbul etməsi asan deyil. İkincisi, biz konstruktiv yanaşmaya üstünlük veririk, destruktiv deyil. Bunun nəticələri dağıdıcı təsirə malik olur ki, bu da təəssüf ki, ilk növbədə qonşu ölkədə özünü göstərir. Onlar nəqliyyat, iqtisadiyyat sahəsində bir sıra beynəlxalq layihələrdən kənarda qalıblar.

Burda TRACECA-nın mövcudluğu sərgiləndi, Azərbaycan mədəni proqramı qəbul etdiyi zaman o insanların xatirəsinə hörmət edirik ki, bu regionda mühüm rol oynayıb. Sizin paytaxtınızda isə, - faşizm üzərində qələbənin 75 illiyi yaxınlaşır və siz kimə abidə qoymusunuz? Mən sizi Heydər Əliyev Mərkəzinə dəvət edirəm ki, gəlin doğulduğunuz şəhərin, İrəvan xanlığının tarixi ilə bağlı məlumat əldə edin. TRACECA-nın karvanı isə öz yoluna davam edəcək”. 

Böyük Quruluş Partiyasının sədri, deputat Fazil Mustafa mövzu ilə bağlı “Qafqazinfo”ya bildirib ki, bu məsələlər  birinci növbədə, psixoloji üstünlüyün kimdə olmasına kömək edir: “Bu cavablarla torpağı işğaldan azad edə bilməyəcəyik.  Ancaq söhbət ondan gedir ki, psixoloji cəhətdən ermənilərin olduğu auditoriyada onlara cavabların verilməsi və orada iştirak edən digər söz sahibi insanların Azərbaycanın mövqeyi barədə bilgiləndirilməsi   olduqca vacibdir. Bu da diplomatiyanın tərkib hissəsidir.   İqtisadiyyat nazirinin verdiyi tutarlı cavab həm də onu göstərdi ki, verilən cavablar səviyyəli olmalıdır. Yəni, harada erməni gördün, oturub ona ağla ki, məni torpağıma qaytar, sülh istəyirəm və. s kimi məsələlərlə problem həll olunmur.  Burada müasir dünyanın  standartlarına uyğun cavab verməlisən ki, başqaları  da bunu təqdirlə qarşılasın. Bu baxımdan Mikayıl  Cabbarovun cavab üslubu  bəyənildi və mən də bunu  təqdir  etdim. Hesab edirəm ki, bu üslubda da  bir sıra məsələləri auditoriyalarda həll etmək daha da faydalı olardı”.

Milli Məclisin deputatı Tahir Mirkişili “Qafqazinfo”ya açıqlamasında qeyd edib ki, Azərbaycan və Ermənistan nümayəndələrinin müxtəlif beynəlxalq tədbirlərdə və yaxud platformalrda polemikaları daim olub:

“Bu əsasən iki ölkə diplomatları, rəsmiləri, deputatları və ya QHT təmsilçiləri arasında baş tutub. Beynəlxalq hüquq normaları, tarixi faktlar daim Azərbaycanın əsas arqumentləri olub. Ermənistanin arqumentləri isə daim saxta tarixi faktlar, təhrif olunmuş beynəlxalq hüquq normaları və yalanlar, dezinformasiyalar olub. Bu cür polemikalar adətən öz arqumentlərini daha yaxşı bilən, onun əsaslandıra bilən tərəfin xeyrinə işləyir. Son zamanlar bəzi beynəlxalq platformalarda azərbaycanlı ictimai fəalların Ermənistan Baş Nazirinə verdiyi suallar və bu vəziyyətdən Ermənistan Baş Nazirinin istifadə edərək öz yalanlarını və saxta tarixi faktlarını yayması bu cür kontaktlara hazırlıqsız getməyin ziyanını göstərdi. 

Ümumilikdə, bu cür təşəbbüslər müsbətdir, haqsız olan Ermənistan rəsmilərini hər tərəfdən sıxmaq lazımdır. Amma bunun üçün bir neçə şərtə əməl etmək mütləqdır. Dağlıq Qarabağ münaqişəsinin tarixini, beynəlxalq hüquq normalarını, Azərbaycanın danışıqlardakı arqumentlərini yaxşı öyrənmək lazımdır. Belə kontaktlara Azərbaycan daxilində ictimai fikrə yönələrək deyil, beynəlxalq ictimai fikrə yönəlmək üçün getmək lazımdır. Bu cür kontaktlar zamanı qarşı tərəfə öz yalanlarını yaymaq imkanı verilməməlidir, O buna cəhd etdikdə isə cavabsız qalmamalıdır. Misal üçün, Bakıda keçirilən beynəlxalq TRACECA tədbirində İqtisadiyyat naziri Mikayıl Cabbarovun Ermənistan rəsmisinə verdiyi əsaslandırılmış, arqumentli və beynəlxalq diplomatik dildə olan cavab bir daha onu göstərdi ki, arqumentin, yerin və auditoriyanın düzgün seçilməsi əsas önəmli şərtlərdəndir və onun effekti ölkəmiz üçün çox faydalıdır”.

ŞƏRH YAZ
0

SOCAR-ın rəhbər şurası ölkə başçısının çıxışından irəli gələn vəzifələri müzakirə etdi — FOTO

SOCAR-ın rəhbər şurası ölkə başçısının çıxışından irəli gələn vəzifələri müzakirə etdi
19:27
07.08.2020
390
İqtisadiyyat
A
Avqustun 7-də Azərbaycan Respublikası Dövlət Neft Şirkətinin rəhbər şurasının üzvlərinin “SOCAR Tower”də iclası keçirilib.

"Ölkə.Az" SOCAR-ın rəsmi saytına istinadla xəbər verir ki, iclasda Azərbaycan Respublikasının Prezidenti İlham Əliyevin 6 avqust 2020-ci il tarixində Koronavirusla mübarizə sahəsində görülən tədbirlər və sosial-iqtisadi vəziyyətlə bağlı keçirdiyi müşavirədə dövlət şirkətləri və o cümlədən, SOCAR barədə səsləndirdiyi fikirlərdən irəli gələn vəzifələr müzakirə olunub.

Qeyd edilib ki, Azərbaycan Respublikasının Prezidenti İlham Əliyevin rəhbərliyi və dəstəyi ilə son 15 ildə SOCAR lokal milli şirkətdən beynəlxalq şirkətə çevrilib, qlobal və regional əhəmiyyətli bir çox meqa-layihələri həyata keçirməyə nail olub. Hazırkı dövrdə inzibati iqtisadiyyat modelindən tam uzaqlaşmağın və koorparativ idarəetmə sistemini təkmilləşdirməyin əhəmiyyəti vurğulanıb. Effektli bazar iqtisadiyyatı modelini əsas götürərək, müasir rəqəmsal şirkətə transformasiyamız bundan sonra daha da sürətlənməsi, əməliyyat və investisya layihələrinin gəlirliyinin təmin olunması barədə fikir mübadiləsi aparılıb.

Hələ bir müddət əvvəl SOCAR 2035-ci ilə qədər olan dövrü əhatə edən yeni strategiyasını “McKinsey” şirkəti ilə birlikdə hazırlamağa başlayıb və yaxın zamanda hökumətə təqdim etməyi planlaşdırır. Strategiyanın əsas prinsipləri şirkətin dayanıqlı inkişafı, təkmilləşmiş effektiv idarətmə sisteminin tətbiqi, sosial və ekoloji məsuliyyətin təmin olunması, ölkəmizin yanacaq enerji tələbatı ehtiyaclarının dəyərləndirilməsi və şirkətin gəlirliliyinin təmin olunması ilə yanaşı borcların idarə olunmasıdır. Bunun üçün idarəetmə modelinin bütövlükdə təkmilləşdirilməsi, funksional idarəetməni mərkəzləşdirməklə yanaşı, əməliyyatlarımızın çevikliyinə nail olunması, ən əsası da bürokratik proseslərin sadələşdirilməsi mütləq şərtdir. SOCAR artıq bir müddətdir ki, bu istiqamətdə irəliləyir və indi, dövlət başçısının haqlı iradlarını əsas götürərək, atdığı addımları daha da sürətləndirmək əzmindədir.

ŞƏRH YAZ
0

Mikayıl Cabbarov sahibkarlarla onlayn görüş keçirdi — FOTO

Mikayıl Cabbarov sahibkarlarla onlayn görüş keçirdi
16:36
07.08.2020
323
İqtisadiyyat
A
Avqustun 7-də İqtisadiyyat naziri Mikayıl Cabbarov sahibkarlarla onlayn görüş keçirib.

İqtisadiyyat Nazirliyindən verilən məlumata görə, görüşdə İqtisadiyyat Nazirliyinin rəhbər vəzifəli şəxsləri, eləcə də, pandemiyadan zərər çəkmiş sahələrdə fəaliyyət göstərən 280-dən çox sahibkar iştirak edib.

Tədbirin əsas məqsədi yeni şəraitdə biznesin fəaliyyəti, istehsal və xidmət sahələrində tətbiq edilən davranış qaydaları, pandemiyanın özəl sektora mənfi təsirlərinin aradan qaldırılması yollarının müzakirəsi olub.

Görüşdə çıxış edən İqtisadiyyat naziri qeyd edib ki, 2020-ci il Azərbaycan üçün uğurlu başlasa da, pandemiya bütün ölkələrdə olduğu kimi, milli iqtisadiyyatı da yeni çağırışlarla üz-üzə qoyub, məcburi məhdudlaşdırmalar iqtisadi fəallığın zəifləməsinə, biznesin maliyyə itkiləri ilə qarşılaşmasına gətirib çıxarıb.

Pandemiyanın milli iqtisadiyyata, məşğulluğa və sahibkarlıq subyektlərinə mənfi təsirlərinin minimallaşdırılması üçün Azərbaycan Respublikasının Prezidenti cənab İlham Əliyev dövlət orqanları qarşısında çox ciddi vəzifələr qoyub.

Nazirlər Kabineti tərəfindən iqtisadiyyata geniş dəstək paketini nəzərdə tutan proqramlar, biznesin qısa və orta müddətdə dəstəklənməsini əhatə edən çoxşaxəli mühüm sənədlər qəbul edilib.

Dövlət başçısının rəhbərliyi ilə həyata keçirilən siyasətin mərkəzində insan amilinin dayandığını vurğulayan nazir sıx dövlət-vətəndaş həmrəyliyinə söykənərək insanların sağlamlığının qorunması istiqamətində həyata keçirilən tədbirlərin önəmini diqqətə çatdırıb.

Pandemiyanın iqtisadiyyata neqativ təsirləri barədə məlumat verən İqtisadiyyat naziri 2020-ci ilin birinci yarımilliyi üzrə ÜDM-də azalmanın qeydə alındığını, əksər iqtisadi sektorlarda azalma müşahidə olunduğunu qeyd edib.

Vurğulanıb ki, iqtisadiyyata təhdidlərin qarşısının alınması istiqamətində qeyri-neft sektorunda iqtisadi fəallığın canlandırılması, iş yerlərinin qorunması baxımından stimullaşdırıcı effektli layihələrin və tədbirlərin maliyyələşdirilməsi, investisiya yönümlü kreditləşdirmə, özəl investisiya qoyuluşunun təşviq edilməsi, tikinti-məşğulluq və digər istiqamətlərdə təkanverici tədbirlərin görülməsi qarşıda duran əsas hədəflərdəndir.

Özəl sektorun iqtisadiyyatın aparıcı qüvvəsi olduğunu vurğulayan Mikayıl Cabbarov, dövlət başçısının tapşırığına uyğun olaraq, Nazirlər Kabinetinin sahibkarlıq subyektlərinə yeni maliyyə dəstəyinin göstərilməsi barədə qərar qəbul etdiyini bildirib.

Qərara əsasən, mövcud şəraitin sahibkarlığa mənfi təsirlərini minimallaşdırmaq və məşğulluğun qorunmasına dəstək məqsədilə pandemiyadan zərər çəkmiş sahələrdə çalışan vergi ödəyicilərinə işçi sayına münasibətdə bir aylıq əməkhaqqı fondu həcmində, fərdi (mikro) sahibkarların isə daha çox ehtiyacı olan hissəsinə təkrarən 250 manat həcmində maliyyə dəstəyi göstəriləcəkdir.

Bunlarla yanaşı, Nazirlər Kabinetinin qərarı ilə 2020-ci il 1 aprel tarixindən 2021-ci il 1 yanvar tarixinədək sahibkarlar dövlət və bələdiyyə torpaq sahələrinin, hüquqi şəxslər və fərdi sahibkarlar (o cümlədən həmin kateqoriyadan olan sənaye məhəllələrinin iştirakçıları) dövlət əmlakının icarə haqqından azad edilir. İqtisadiyyat naziri, həmçinin, sahibkarlıq subyektlərinin maliyyə resurslarına çıxış imkanlarının artırılması, pandemiyadan zərər çəkmiş sahələrə dövlət dəstəyinin gücləndirilməsi məqsədilə sahibkarlığın maliyyələşdirilməsi alətlərinin genişləndirildiyini diqqətə çatdırıb.

Qeyd olunub ki, sahibkarların dövlət zəmanətli krediti asan və şəffaf formada əldə etməsi üçün yaradılmış Elektron Kredit Platforması vasitəsilə artıq bir ay ərzində 12 milyon manatdan çox kredit verilməsi təsdiq edilib.

Bildirilib ki, hazırkı şəraitdə cəmiyyət, eləcə də sahibkarlar yaranmış yeni tələblərə uyğunlaşmalıdır. Pandemiyanın nə zaman bitəcəyi məlum deyil. Cəmiyyət yeni həyat tərzinə hazır olmalı, sahibkarlar da biznes fəaliyyətini yaranmış şəraitə uyğunlaşdırmalıdırlar.

Qapalı məkanlarda maska taxılmalı, obyektlər mütəmadi olaraq dezinfeksiya edilməli, antiseptik vasitələrdən istifadə olunmalı, işçi heyətin maska və əlcəkdən istifadəsi təmin edilməli, vətəndaşların maskasız obyektlərə daxil olmasının və sıxlığın qarşısı alınmalı, fiziki məsafə qorunmalıdır. Yeni həyat tərzinin rəqəmsal həllərin tətbiqini tələb etdiyini deyən İqtisadiyyat naziri məsafəli xidmətin imkanlarının genişləndirilməsinin vacibliyini vurğulayıb.

Ticarət və xidmət obyektləri yeni qaydalara nə qədər tez vərdiş etsələr, bu onların biznesi üçün bir o qədər səmərəli olar.

Görüşdə çıxış edən sahibkarlar yaranmış vəziyyətin onların fəaliyyətinə göstərdiyi mənfi təsirləri qeyd edib, istehsal və xidmət sektorlarında yeni qaydaların tətbiqinin təkcə sahibkarlardan deyil, eləcə də cəmiyyətin hər bir üzvündən asılı olduğunu bildirib, iqtisadi itkilərin aradan qaldırılması, iqtisadi fəallığın bərpası üçün dövlətdən əlavə dəstək gözlədiklərini diqqətə çatdırıblar.

Biznesin fəaliyyətinin yeni, fərqli şəraitdə davam edəcəyini vurğulayan iş adamları bu çətin dövrdə dövlət-biznes əməkdaşlığının daha zəruri xarakter daşıdığını qeyd ediblər.

Görüşlə bağlı əvvəlcədən elan edilmiş e-mail ünvana sahibkarlardan çoxsaylı sual və təkliflər daxil olub, həmçinin, tədbir zamanı əlavə təkliflər səsləndirilib. Müraciətlərin əsas hissəsi pandemiyadan zərər çəkmiş sahələrin əhatə dairəsinin genişləndirilməsi, vergi güzəştlərinin müddətinin uzadılması, vergi borclarının ödənilməsi üçün güzəşt müddətlərinin müəyyən edilməsi, sosial ödəmələr üzrə əlavə tətilin verilməsi, dövlət zəmanətli kreditlərin müddətinin uzadılması və s. məsələlərlə bağlı olub.

İqtisadiyyat naziri Mikayıl Cabbarov sahibkarların suallarını cavablandırıb, təkliflərlə bağlı fikirlərini bildirib. Görüşdə pandemiyanın özəl sektora təsirlərinin minimallaşdırılması, biznesin dirçəldilməsi və inkişafı yolları müzakirə olunub.

 

ŞƏRH YAZ
0
BAĞLA